ភ្នំពេញៈ អ្នកប្រយុទ្ធគុនចម្រុះរបស់កម្ពុជា មាស ម៉ើ បានសន្យាថា រូបគេនឹងប្រើប្រាស់គ្រប់ស្នៀតប្រកួតទាំងអស់ និងប្រឹងឲ្យអស់ពីសមត្ថភាព នៅពេលរូបគេធ្វើដំណើរទៅប្រកួតក្នុងសង្វៀនដាក់ទ្រុង Singapore Indoor Stadium ដើម្បីជួបជាមួយកីឡាករហូឡង់ Anthony Engelen ក្នុងព្រឹត្តិការណ៍ ONE: HEART OF THE LION នៅថ្ងៃសុក្រ។
កីឡាករវ័យ ២៨ ឆ្នាំ មាស ម៉ើ បានធ្វើដំណើរទៅកាន់សិង្ហបុរី កាលពីថ្ងៃចន្ទ ហើយគេនឹងត្រូវប្រកួតក្នុងទម្ងន់ ៧០,៣ គីឡូក្រាម ក្នុងការប្រកួតក្បាច់គុនចម្រុះ (MMA) ដែលត្រូវបានរៀបចំឡើងដោយអង្គភាពឈានមុខគេក្នុងទ្វីបអាស៊ី ONE Championship (ONE)។
មាស ម៉ើ ដែលមានស្រុកកំណើតនៅស្រុកបារាយណ៍ ខេត្តកំពង់ធំ បានប្រាប់ភ្នំពេញ ប៉ុស្តិ៍ ថា៖ «ខ្ញុំមិនហ៊ានព្យាករទុកមុនឡើយ ប៉ុន្តែខ្ញុំនឹងប្រើប្រាស់គ្រប់ស្នៀត និងព្យាយាមឲ្យអស់ពីសមត្ថភាពក្នុងការប្រកួតនេះ»។
កីឡាករប្រកួតមិនញញើតដៃគូរូបនេះ មិនធ្លាប់ប្រកួតប្រដាល់គុនខ្មែរឡើយ គឺការប្រកួតទាំងអស់របស់គេ សុទ្ធសឹងបានកើតឡើងក្នុងកីឡាយុទ្ធគុនចម្រុះ ហើយរូបគេមានកំណត់ត្រាដ៏គួរឲ្យកត់សម្គាល់ក្នុង MMA ដោយឈ្នះ ៥ លើក និងចាញ់ ២ លើក ក្នុងនោះរាប់បញ្ចូលទាំងការប្រកួតរបស់កម្មវិធី ONE ចំនួន ៤ លើកផងដែរ។
ទាក់ទងនឹងការត្រៀមលក្ខណៈសម្រាប់ការប្រកួតនេះ មាស ម៉ើ ដែលប្រកួតតំណាងឲ្យក្លិប Cambodian Top Team របស់គ្រូបង្វឹក លោកហ៊ុន ចាន់រាជ នោះ បានបញ្ជាក់ថា៖ «ខ្ញុំបានហ្វឹកហ្វាត់ត្រៀមសម្រាប់ការប្រកួតនេះ ដោយផ្តោតលើគ្រប់ស្នៀតទាំងអស់ ពោលគឺទាំងស្នៀតវាយជំហរ និងស្នៀតក្លេ»។
កីឡាកររូបនេះ បានបន្ថែមទៀតថា៖ «ខ្ញុំមិនមានការបារម្ភ និងភិតភ័យសម្រាប់ការប្រកួតនេះឡើយ ប៉ុន្តែ ខ្ញុំកំពុងផ្តោតលើការប្រកួត ហើយមិនថា គូប្រកួតខ្ញុំខ្លាំងប៉ុនណា ប៉ុន្តែ ខ្ញុំនឹងប្រឹងឲ្យអស់ពីសមត្ថភាពរបស់ខ្ញុំ»។
គួររំឭកថា ការប្រកួត ២ លើកចុងក្រោយរបស់ មាស ម៉ើ ក្នុងកម្មវិធី ONE កាលពីដើមឆ្នាំ ២០១៨ និងកាលពីខែឧសភា គឺគេបានបញ្ចប់ក្នុងលទ្ធផលខកចិត្ត ដោយបានចាញ់គូប្រកួតទាំង ២ លើក។ ចំណែកកីឡាករ Engelen វ័យ ៣៣ ឆ្នាំ ក៏មានបទពិសោធប្រហាក់ប្រហែលនឹង មាស ម៉ើ ផងដែរ ក្នុងសង្វៀនដាក់ទ្រុងនេះ ដោយរូបគេឈ្នះ ៦ លើក និងចាញ់ ៤ លើក ក្នុងនោះគេបានប្រកួតឲ្យកម្មវិធីរបស់ ONE ចំនួន ៥ លើក។
ក្រៅពីការប្រកួតនេះ នៅមានការប្រកួតចំនួន ១២ គូផ្សេងទៀត ដើម្បីផ្តល់ភាពរំភើបនៅសង្វៀន Singapore Indoor Stadium ខណៈការប្រកួតដ៏គួរឲ្យចាប់អារម្មណ៍ គឺការជួបគ្នារវាងកីឡាករប្រេស៊ីល Bibiano Fernandes និង Kevin Belingon របស់ហ្វីលីពីន ដើម្បីដណ្តើមខ្សែក្រវាត់ពិភពលោកពីស្ថាប័ន ONE ក្នុងទម្ងន់ ៦៥,៨ គីឡូក្រាម៕