.jpg)
កីឡាករហ្វីលីពីន Kevin Belingon (ឆ្វេង) ទាត់ទៅលើកីឡាករ Bibiano Fernandes។ សហការី
ក្រុងសិង្ហបុរី: កីឡាករយុទ្ធគុនចម្រុះរបស់កម្ពុជា បានបន្តជួបការខកចិត្តក្នុងការប្រកួតសង្វៀនដាក់ទ្រុងរបស់ ONE Championship (ONE) ខណៈដែលកីឡាករហ្វីលីពីន Kevin Belingon បានក្លាយជាម្ចាស់ខ្សែក្រវាត់ពិភពលោករបស់ ONE ក្នុងទម្ងន់ ៦៥,៨ គីឡូក្រាម ក្រោយពីបានផ្តួលម្ចាស់ការពារខ្សែក្រវាត់ Bibiano Fernandes របស់ប្រេស៊ីល កាលពីថ្ងៃសុក្រ។
ក្នុងការប្រកួតគូបើកឆាកដ៏រំភើបនៃព្រឹត្តិការណ៍ ONE: HEART OF THE LION នៅសង្វៀន Singapore Indoor Stadium កីឡាករហូឡង់ Anthony Engelen បានចំណាយពេលត្រឹមតែ ៣៩ វិនាទីក្នុងទឹកទី ១ ប៉ុណ្ណោះ ដើម្បីផ្តួលកីឡាករកម្ពុជាមាស ម៉ើ ឲ្យសន្លប់ ក្នុងការប្រកួតក្នុងទម្ងន់ ៧០,៣ គីឡូក្រាម។
ការរងបរាជ័យនេះមានន័យថា មាស ម៉ើ បានរងបរាជ័យ ៣ លើកពីការប្រកួតក្នុងកម្មវិធីរបស់ ONE នៅក្រៅប្រទេសទាំង ៣ លើកចុងក្រោយរបស់ខ្លួន។ ក្នុងការប្រកួតគូឯកប្រចាំព្រឹត្តិការណ៍ ជើងខ្លាំងហ្វីលីពីន Belingon ដណ្តើមបានជ័យជម្នះដោយពិន្ទុមិនឯកច្ឆន្ទ ក្នុងការប្រកួតដណ្តើមខ្សែក្រវាត់ពិភពលោករួមរបស់ ONE ដើម្បីបញ្ចប់ការគ្រប់គ្រងខ្សែក្រវាត់ក្នុងទម្ងន់ ៦៥,៨ គីឡូក្រាមរបស់កីឡាករហ្វីលីពីន Bibiano Fernandes ត្រឹមរយៈពេល ៥ ឆ្នាំ។
ក្រោយពីបានក្លាយជាម្ចាស់ខ្សែក្រវាត់ពិភពលោកថ្មីពីស្ថាប័ន ONE ក្នុងទម្ងន់ ៦៥,៨ គីឡូក្រាម កីឡាករ Belingon បានបញ្ជាក់ប្រាប់ឲ្យដឹងថា៖ «Bibiano [Fernandes] គឺជាគូប្រកួតដ៏ខ្លាំងម្នាក់ ខ្ញុំពិតជាបានជួបការលំបាកក្នុងការផ្តួលរូបគេនៅរាត្រីនេះ។ ខ្ញុំមិនហ៊ានមើលស្រាលរូបគេឡើយ ហើយវាជាកិត្តិយសក្នុងការប្រកួតជាមួយគូប្រជែងដ៏ខ្លាំងបែបនេះ»។
មាស ម៉ើ (ឆ្វេង) និង Anthony Engelen។ សហការី
កីឡាករវ័យ ៣១ ឆ្នាំរូបនេះបានបន្ថែមទៀតថា៖ «ខ្ញុំដឹងថា Bibiano ជាកីឡាករដ៏ខ្លាំង ប៉ុន្តែ ខ្ញុំគិតថា ខ្ញុំពិតជាស័ក្តិសមក្នុងការឈ្នះ។ ផែនការនៃការប្រកួតគឺការផ្តួលឲ្យរូបគេសន្លប់។ យើងបានមើលឃើញភាពទន់ខ្សោយក្នុងការប្រកួតកាលពីមុនរបស់គេ។ ខ្ញុំបានរក្សាប្រើគ្រប់ស្នៀត ប៉ុន្តែ គេបានការពារយ៉ាងល្អ»។
ជ័យជម្នះនេះ មានន័យថា Belingon ធ្វើឲ្យកំណត់ត្រាឈ្នះរបស់គេកើនដល់ ២០ លើក និងចាញ់ ៥ លើក ខណៈដែល Fernandes នៅតែមានកំណត់ត្រាឈ្នះ ២២ លើកដដែល ប៉ុន្តែ ចាញ់ ៤ លើក។
ក្នុងការប្រកួតគូឯករង អតីតបេក្ខភាពប្រកួតដណ្តើមខ្សែក្រវាត់ពិភពលោក Christian “The Warrior” Lee បានធ្វើឲ្យអ្នកគាំទ្រនៅសង្វៀន Singapore Indoor Stadium ជួបការរំភើបយ៉ាងខ្លាំង ក្រោយពីរូបគេបានផ្តួលកីឡាករជប៉ុន Kazuki Tokudome តាមរយៈការវាយឲ្យសន្លប់ដោយបច្ចេកទេសនៅទឹកទី ១។
Lee បានប្រើប្រាស់ស្នៀតក្លេភ្លាមៗក្នុងពេលចាប់ផ្តើមការប្រកួតនេះ នៅមុនពេលប្រើប្រាស់កណ្តាប់ដៃវាយយ៉ាងសន្ធាប់ទៅលើគូប្រកួតរបស់ខ្លួនឲ្យដួលនៅលើសង្វៀន នៅមុនពេលអាជ្ញាកណ្តាលបានផ្អាកការប្រកួតនេះ៕IS
