ភ្នំពេញ៖ កីឡាករជើងខ្លាំងវ័យក្មេងរបស់កម្ពុជា ម៉ឺន មេឃា និងឈុតសេរី វ៉ាន់ថង សុទ្ធតែបានបង្កើតការភ្ញាក់ផ្អើលដល់អ្នកទស្សនា នៅលើសង្វៀន CNC ខណៈអ្នកទាំង ២ បានបង្ហាញការប្រកួតយ៉ាងល្អ យកឈ្នះលើគូប្រកួត ដើម្បីឈ្នះបានខ្សែក្រវាត់ និងពានរង្វាន់រៀងៗខ្លួននោះ។
សម្រាប់ការប្រកួត ក្នុងកម្មវិធីខុសគ្នា នៅលើសង្វៀន CNC តែមួយ កាលពីថ្ងៃសៅរ៍ កន្លងមកនេះ ម៉ឺន មេឃា ពិតជាធ្វើបានយ៉ាងល្អ ក្នុងការយកឈ្នះលើជើងខ្លាំងរបស់ថៃ Link Loom ក្នុងវគ្គផ្តាច់ព្រ័ត្រដណ្តើមខ្សែក្រវាត់ទម្ងន់ ៦០ គីឡូក្រាម នៃព្រឹត្តិការណ៍ «កម្ពុជាសង្វៀនគុនខ្មែរ» ដើម្បីឈ្នះបាន ខ្សែក្រវាត់ ជាលើកដំបូង នៅក្នុងអាជីពរបស់ខ្លួន អមជាមួយប្រាក់រង្វាន់ ៦ ០០០ ដុល្លារ។
នៅក្នុងការប្រកួតនេះ មេឃា បានជម្នះចូលម៉ាត់ ទាត់ និងវាយកែង ប្តូរជាមួយការចូលចាប់បុកជង្គង់របស់ Link Loom យ៉ាងស្វិតស្វាញបំផុត ហើយក្រៅពីទទួលបានការគាំទ្រយ៉ាងកងរំពងពីអ្នកទស្សនា មេឃា ទទួលបានភាពកក់ក្តៅ កាន់តែខ្លាំងពីការចូលរួមលើកទឹកចិត្តដោយផ្ទាល់ពីក្រុមគ្រួសារ សិស្សរួមក្លិប ពិសេសឪពុកបង្កើតរបស់គេគឺ អេ ភូថង ដែលបានទៅជួយស្រែកប្រាប់ បច្ចេកទេសប្រកួតដល់កូនទាំងខ្លួនលោកមានជំងឺជាប់ខ្លួន។
យ៉ាងណាក៏ដោយ ការរួមគ្នាលើកទឹកចិត្តទាំងពូជនេះ ពិតជាបានផ្តល់ភាពក្តុកក្តួលរំជួលចិត្តចំពោះ ម៉ឺន មេឃា នៅពេលពិធីករបានប្រកាសថា ម៉ឺន មេឃា ត្រូវបានចៅក្រមទាំង ៥ នាក់ ផ្តល់ពិន្ទុឲ្យឈ្នះជាឯកច្ឆន្ទ ៥-០ លើ Link Loom ដែលធ្លាប់ផ្តួល វ៉ាន់ វឿន ឲ្យសន្លប់ទឹកទី ៣ និងឈ្នះ ពិន្ទុ លន បញ្ញា នោះ។
ជាមួយការឈ្នះបានខ្សែក្រវាត់ជាលើកដំបូង ក្នុងអាជីពនេះ ម៉ឺន មេឃា បាននិយាយមុនពេលបំពាក់ខ្សែក្រវាត់ ទាំងអួលដើមកថា៖ «ខ្ញុំពិតជាមានអារម្មណ៍ធូរខ្លាំង និងសប្បាយចិត្តមែនទែន ចំពោះការឈ្នះបានខ្សែក្រវាត់នេះ។ ខ្ញុំមានការលំបាកផងដែរ នៅពេលគាត់ដើរចូលបោះជង្គង់ ប៉ុន្តែផ្លែវាយចេញរបស់គាត់ មិន សូវជាធ្ងន់ប៉ុន្មានទេ អ៊ីចឹងហើយខ្ញុំបានចូលប្តូរដៃជាមួយគាត់»។
ជុំវិញការប្រើយុទ្ធសាស្រ្តរំដោះខ្លួន ចេញពីការចូលចាប់បុកជង្គង់របស់ Link Loom ដែលទទួលបានពានលេខ ២ អមជាមួយប្រាក់រង្វាន់ ៣ ០០០ ដុល្លារនោះ កីឡាករ ម៉ឺន មេឃា បានបញ្ជាក់ថា៖ «ខ្ញុំបានរៀនធ្វើ ២ ទៅ ៣ សប្តាហ៍ ដើម្បីទប់ក្បាច់ជង្គង់របស់គាត់នេះ ហើយខ្ញុំក៏បានសិក្សាតាមរយៈ ការមើលវីដេអូនៃការប្រកួតរបស់គាត់ផងដែរ»។
ដោយឡែកកីឡាករវ័យក្មេង ឈុតសេរី វ៉ាន់ថង ដែលទើបតែទទួលបានជោគជ័យ ក្នុងការប្រឡងបាក់ឌុបនោះ បានកែប្រែស្ថានភាពនៃការប្រកួតរបស់ខ្លួន បានយ៉ាងល្អបំផុត ក្នុងការយកឈ្នះលើ អេលីត សាន់ វិញ ដើម្បីឈ្នះបានពានរង្វាន់ ម៉ា សេរី អមជាមួយប្រាក់រង្វាន់ ១ ០០០ ដុល្លារ។
នៅក្នុងការប្រកួត កាលពីព្រលប់ថ្ងៃសៅរ៍នោះ ឈុតសេរី វ៉ាន់ថង របស់ក្លិបរាហូកីឡា ខេត្ត បាត់ដំបង ត្រូវបានលោកអាជ្ញាកណ្តាល ទេស សារិន ចាប់ រាប់នៅពាក់កណ្តាលទឹកទី ២ បន្ទាប់ពីរូបគេត្រូវបានអ្នកលេង កណ្តាប់ដៃធ្ងន់ អេលីត សាន់ ដែលទើបផ្តួលកីឡាករថៃឲ្យសន្លប់ ក្នុងកម្មវិធី Max Muay Thai បានម៉ាត់ស្តាំចូលថ្គាម និងថែមដោយកណ្តាប់ដៃឆ្វេង ឡើងចង់វង្វេងនោះ។
ទោះបីជាយ៉ាងណា ឈុតសេរី វ៉ាន់ថង អាចពង្រឹងស្មារតីបានល្អប្រសើរវិញភ្លាមៗ និងបានវ៉ៃប្តូរជាមួយ អេលីត សាន់ យ៉ាងស្វិតស្វាញបំផុត នៅចុងទឹកទី ២ នោះ។ ចំណែកការប្រកួត ៣ ទឹកចុងក្រោយ ពិសេសទឹកទី ៤ និងទឹកទី ៥ វ៉ាន់ថង បានម៉ាត់ និងវ៉ៃកែង ធ្វើឲ្យ អេលីត សាន់ ចង់គាំងៗ ម្តងផងដែរ ដើម្បីដណ្តើមយកប្រៀបមកវិញ ហើយការព្យាយាមវាយស្រង់ដើមបានយ៉ាងល្អនេះ ធ្វើឲ្យចៅក្រមទាំង ៥ រូប សម្រេចផ្តល់ពិន្ទុឲ្យរូបគេ ឈ្នះ អេលីត សាន់ ដោយឯកច្ឆន្ទ ដើម្បីឈ្នះពានរង្វាន់ ម៉ា សេរី សម្រាប់ការប្រកួតលើកទី ៣ ប្រចាំឆ្នាំ ២០១៩ នេះ៕