ក្រុងតូក្យូ៖ សិស្សសាលាជប៉ុន Misugu Okamoto មិនទាន់មានបំណងចូលរួមប្រកួតយកមេដាយនៅព្រឹត្តិការណ៍អូឡាំពិកក្រុងតូក្យូឆ្នាំ ២០២០ នៅឡើយទេ ទោះជារូបនាងបានក្លាយជាម្ចាស់ជើងឯកជិះក្ដារស្គីក្មេងបំផុតក្នុងពិភពលោកនៅចុងសប្ដាហ៍នេះក៏ដោយ។
កីឡាការិនីអាយុ ១៣ ឆ្នាំរូបនេះ បានឈ្នះពានរង្វាន់ម្ចាស់ជើងឯកពិភពលោកជិះក្ដារស្គីក្រោយពីបានឈ្នះកីឡាការិនីជប៉ុន Sakura Yosozumi ក្នុងការប្រកួតឆ្ពោះទៅព្រឹត្តិការណ៍អូឡាំពិកក្រុងតូក្យូ។
កីឡាការិនី Okamoto បានប្រកួតឈ្នះ ៥ លើកចុងក្រោយ រួមទាំងការបង្ហាញខ្លួនលើកដំបូងនៅការប្រកួត X Games ដ៏មានតម្លៃកាលពីខែមុនផងដែរ។
កីឡាការិនីវ័យក្មេងរូបនេះបានប្រាប់ AFP ថា៖ «ខ្ញុំមិនបានគិតពីការឈ្នះនេះទេ ហើយក៏មិនគិតពីការឈ្នះជាម្ចាស់ជើងឯកវ័យក្មេងបំផុតក្នុងពិភពលោកនោះដែរ។ ខ្ញុំគ្មានអារម្មណ៍ដូចជាខ្ញុំជាកីឡាការិនីល្អបំផុតក្នុងពិភពលោកនោះទេ»។
កីឡាការិនី Okamoto ទទួលបានពិន្ទុ ៦១,១៧ ឈ្នះកីឡាការិនី Yosozumi ដែលបានពិន្ទុ ៦០,០០ ហើយកីឡាការិនីអង់គ្លេស Sky Brown អាយុ ១១ ឆ្នាំ ដែលមានបំណងក្លាយជាកីឡាការិនីវ័យក្មេងបំផុតនៅព្រឹត្តិការណ៍ Summer Olympics ក្នុងរយៈពេល ៥០ ឆ្នាំនេះ បានពិន្ទុ ៥៨,១៣ និងបានលេខ ៣។
កីឡាការិនី Okamoto បានបន្តថា៖ «ខ្ញុំគ្មានគំនិតចង់ចូលរួមអូឡាំពិកនៅឡើយទេ ប៉ុន្តែខ្ញុំនឹងហ្វឹកហាត់បច្ចេកទេសថ្មីៗទៀត ដើម្បីពង្រឹងសមត្ថភាពជួយឲ្យខ្ញុំកាន់តែរឹងមាំជាងមុន»។
ទោះជាកីឡាការិនីរូបនេះមិនចង់ល្បីល្បាញក៏ដោយ ប៉ុន្តែរូបនាងចង់ឲ្យមានក្រុមយុវវ័យស្របាលគ្នាទទួលស្គាល់រូបនាងក្នុងវិស័យកីឡាជិះក្ដារស្គីនេះ និងមានការលើកចិត្តពីពួកគេក្នុងការចូលរួមអូឡាំពិកផងដែរ។
កីឡាការិនី Okamoto បាននិយាយថា៖ «ការជិះក្ដារស្គី គឺមិនត្រូវពឹងតែលើការប្រកួតប្រជែងនោះទេ ហើយខ្ញុំចង់ក្លាយជាកីឡាការិនីឆ្នើមម្នាក់ដែលមានការទទួលស្គាល់ក្នុងសង្គមព្រោះខ្ញុំនៅមានពេលវែងឆ្ងាយទៅមុខទៀត»។
គ្រូបង្វឹករបស់កីឡាការិនី Okamoto គឺលោក Ray Takahashi បានពន្យល់ពីដំណើរការនៃការគិតដែលជំរុញឲ្យកូនក្រុមវ័យក្មេងរបស់គាត់មានថាមពលបែបនេះ។
គ្រូបង្វឹករូបនេះបាននិយាយថា៖ «យើងមិនសម្លឹងមើលការជិះក្ដារស្គីថា ជាកីឡាមួយប្រភេទនោះទេគឺវាមានន័យច្រើនជាងនេះទៅទៀត»។
គ្រូបង្វឹករូបនេះបានបន្ថែមទៀតថា៖ «មានប្រវត្តិ និងវប្បធម៌សំខាន់ៗទៀតក្នុងការជិះក្ដារស្គីនេះ គឺមិនមែនឲ្យតែប្រកួតឈ្នះនៅកន្លែងប្រកួត គឺជាអ្នកជោគជ័យក្នុងការជិះក្ដារស្គីនោះទេ គឺវាមានន័យលើសពីអ្វីទាំងអស់នេះទៀត»៕ AFP/SN