.jpg)
យ៉េន ឌីណា ត្រូវប្រឈមជាមួយជើងខ្លាំងជំនាញជង្គង់ Chhuok Chhai នៅសង្វៀន SEATV។ រូបថត សហការី
ភ្នំពេញៈ មានចំណាប់អារម្មណ៍ខ្លាំងពីមហាជនដែលតាមដានសកម្មភាពប្រដាល់ នៅពេលគណៈកម្មការបស់សង្វៀន SEATV បានផ្គូផ្គង យ៉េន ឌីណា (ប៉ោ ភារិទ្ធ) របស់សមាគមប្រដាល់ក្រសួងកសិកម្ម ឲ្យជួបជើងខ្លាំងជំនាញជង្គង់របស់ថៃ Chhuok Chhai នារសៀលថ្ងៃសៅរ៍នេះ ហើយជំនួបនេះក៏បង្កើតឲ្យមានមន្ទិលសង្ស័យផងដែរ ថាតើ យ៉េន ឌីណា នឹងទទួលបានលទ្ធផលបែបណា?
បើទោះបីជា យ៉េន ឌីណា ទើបបានយកឈ្នះជើងខ្លាំងថៃ Loom Leng ដោយពិន្ទុកាលពីពេលថ្មីៗនេះ ប៉ុន្តែ Chhuok Chhai ជាជើងខ្លាំងមានក្បាច់ជង្គង់ល្អបំផុតដែលធ្លាប់ឈ្នះ ឡុង សុភី, ផាន់ គ្រាន់, ឡៅ ចន្ទ្រា, មឿន សុខហ៊ុច និងកីឡាករដទៃច្រើនទៀត ហើយគេក៏ធ្លាប់ឈ្នះខ្សែក្រវាត់មួយពី CNC ទៀតផង ពោលគឺសឹងតែរកគូប្រកួតមិនបាន។
ប្រភពអ្នកតាមដានប្រដាល់មួយចំនួនធំ គេហ៊ានទស្សន៍ទាយជាមុនថា ប្រសិនបើគ្មានការរៀបចំយឹតយោង ឬឃុបឃិតគ្នាណាមួយគឺ យ៉េន ឌីណា គ្មានលទ្ធភាពអាចឈ្នះកីឡាករ Chhuok Chhai បាននោះទេ។
យ៉េន ឌីណា ធ្លាប់ប្រកួតបាន ៧១ ដង ឈ្នះ ៦០ និងចាញ់ ១១ ដង ហើយគេជាកីឡាករវាយក្បាច់ល្អ ប៉ុន្តែមិនសូវមានប្រជាប្រិយភាព ដោយសារកាលពីនៅវ៉ៃប្រចាំសង្វៀនអប្សរាកន្លងមកមានគេជួយលើកតម្កើងហួសហេតុ និងយឹតយោងហួសសមត្ថភាព ខណៈដែលវ៉ៃចាញ់គេដាច់នៅតែយោងឲ្យឈ្នះ។ ចំពោះ Chhuok Chhai វិញធ្លាប់ប្រកួត ៨៨ ដងឈ្នះ ៦៦ ចាញ់ ១៩ ដង និងស្មើពិន្ទុ ៣ ដង។
កីឡាករ យ៉េន ឌីណា និងគ្រូបង្វឹក អេ ភូថង មិនអាចទាក់ទងសម្ភាសបានទេពីស្ថានភាពត្រៀមខ្លួន ប៉ុន្តែអ្នកស្រី សុម៉ាលី ជាប្រពន្ធលោក អេ ភូថង ប្រាប់ថាកំពុងហ្វឹកហាត់បានល្អ ប៉ុន្តែឥឡូវគេមានបញ្ហាសុខភាពផ្តាសាយផងដែរ។
ចំណែកលោក ថៃ អ៊ូ អ្នកនាំកីឡាករថៃមកប្រកួតបានប្រាប់ថា៖ «ទាក់ទងទៅនឹងលទ្ធផលប្រកួត ខ្ញុំមិនសូវហ៊ាននិយាយទេ ព្រោះវាខុសពីគោលការណ៍។ ខ្ញុំមានភារកិច្ចត្រឹមនាំកីឡាករមកប្រកួតប៉ុណ្ណោះ ទោះជាយ៉ាងណាតាមភ្នែក និងអ្វីដែលខ្ញុំមើលពីសមត្ថភាពកីឡាករវិញ យ៉េន ឌីណា មានភាគរយតិចណាស់ ដើម្បីឈ្នះ Chhuok Chhai ប៉ុន្តែរឿងអ្វីៗ ឬការប្រែប្រួលពេលប្រកួតគឺយើងមិនអាចទស្សន៍ទាយត្រូវឡើយ»។
ចំពោះលោក ផែន យ៉ត ជាគ្រូបង្វឹករបស់ជើងខ្លាំង Chhuok Chhai បាននិយាយថា៖ «ខ្ញុំមានទំនុកចិត្តថា Chhuok Chhai នឹងឈ្នះក្នុងក្តីសង្ឃឹម ៩០ ភាគរយ»។
យោងតាមប្រភពថា សុខភាពរបស់ យ៉េន ឌីណា មានបញ្ហាផ្តាសាយនោះ លោក ញាន សុធី នាយកគ្រប់គ្រងកម្មវិធីប្រចាំសង្វៀន SEATV បានអះអាងថា៖ «គិតមកដល់ម៉ោងនេះ ខ្ញុំមិនទាន់ទទួលបានព័ត៌មានអ្វីទេ ហើយគូប្រដាល់ ១ គូនេះ គឺមិនផ្លាស់ប្តូរឡើយ។ តាមបទពិសោធរៀបចំរបស់ខ្ញុំប្រដាល់ប្រហែល ២០ ឆ្នាំនេះគឺកីឡាករកម្ពុជាឲ្យតែប៉ះកីឡាករថៃខ្លាំង ភាគច្រើនចង់គ្រុន និងមានកីឡាករខ្លះគេចពីការប្រកួតផង ពេលកម្មវិធីមកដល់»។
ដោយឡែកអ្នកប្រដាល់មុខឌឺ យុគ យក្សផ្លែ ក៏ត្រូវដាក់ឲ្យប្រកួតជាមួយអ្នកប្រដាល់ថៃ Niev Phatdam ក្នុងប្រភេទទម្ងន់ ៥៧ គីឡូក្រាមនៅថ្ងៃសៅរ៍នោះដែរ ហើយ យក្សផ្លែ មានប្រវត្តិប្រកួតច្រើនជាងថៃម្នាក់នេះគឺធ្លាប់ប្រកួត ១៦៧ ដង ឈ្នះ ១៣៥ ចាញ់ ២៧ និងស្មើ ៥ ដង ខណៈ Niev Phatdam ធ្លាប់ប្រកួត ៦៥ ដង ឈ្នះ ៦០ ដង និងចាញ់ ៥ ដង៕
