ភ្នំពេញៈ ការប្រកួតជម្រុះក្នុងចំណោមបេក្ខជនប្រកួតប្រជែងចំនួន ២៤ នាក់ មកពី ៧ មណ្ឌល នៅទូទាំងប្រទេសកម្ពុជា គឺបានរកឃើញអ្នកឈ្នះចំនួន ៨ នាក់ចុងក្រោយហើយ សម្រាប់ឡើងទៅប្រកួតផ្តាច់ព្រ័ត្រ យកតំណែងស្តេចអុក ឆ្នាំ ២០១៨ នៅមុខប្រាសាទអង្គរវត្ត ខេត្តសៀមរាប នាមហាសង្ក្រាន្តថ្ងៃចូលឆ្នាំថ្មីប្រពៃណីជាតិខ្មែរ ខាងមុខនេះ។
តាមរយៈការប្រកួតជម្រុះពេញមួយថ្ងៃ នៅទីស្នាក់ការ NOCC កាលពីថ្ងៃអាទិត្យ កន្លងមកនេះ ស្តេចអុក ២ សម័យកាល ឈាវ បូរ៉ា របស់ខេត្តកំពង់ចាម ស៊ីវ ស៊ីន មកពីខេត្តកំពង់ស្ពឺ សុខ លឹមហេង នៅភ្នំពេញ កែវ វឌ្ឍនា នៅភ្នំពេញ ធីម ឌីណា មកពីខេត្តកំពង់ចាម អេង សេងហៀក មកពីខេត្តសៀមរាប ប៊ិន គាសេង មកពីខេត្តក្រចេះ និង ប៊ូ ប៉ុណ្ណម៉ាលីកា នៅភ្នំពេញ បានក្លាយជាបេក្ខភាព ដែលត្រូវឡើងទៅប្រកួតយកតំណែងស្តេចអុក នាពេលខាងមុខនេះ។
ផ្ទុយពីនេះ អតីតស្តេចអុកវ័យក្មេងជំនាញផ្នែក IT ហេង សៅឌី ព្រមទាំងអតីតស្តេចអុកឆ្នាំ ២០១៦ ហូយ សូណា និងអតីតស្តេចអុកឆ្នាំ ២០០០ ឆ្នាំ ២០០៨ ឆយ វីរ៉ា បានធ្លាក់ចេញពីការប្រកួតនេះ ត្រឹមវគ្គជម្រុះតាមពូលទាំង ៦ ដូចគ្នា ហើយជើងខ្លាំងធ្លាប់ទទួលបានឱកាសទៅប្រកួតផ្តាច់ព្រ័ត្រ កាលពីឆ្នាំ ២០១៧ មួយចំនួនទៀត ក៏បានធ្លាក់ត្រឹមវគ្គជម្រុះ កាលពីថ្ងៃអាទិត្យនោះដែរ។
កីឡាករ ឈាវ បូរ៉ា, ស៊ីវ ស៊ីន, សុខ លឹមហេង, កែវ វឌ្ឍនា, ធីម ឌីណា និង អេង សេងហៀក សុទ្ធតែបានឈ្នះក្នុងការប្រកួតខ្វែងរវាងពូលទាំង ៦ ដោយក្នុងនោះ ឈាវ បូរ៉ា លេខ ១ មកពីពូក C បានយកឈ្នះលេខ ២ ពូល D មាស សុភក្តិ ពេលលេខ ១ ពូល A អេង សេងហៀក បានទម្លាក់លេខ ២ ពូល F ឃុត ប្រិមប្រិយ ប៉ុន្តែលេខ ១ ពូល F ប៊ិន គាសេង បានចាញ់លេខ ២ ពូល A ស៊ីវ ស៊ីន ហើយ លេខពូល B សុខ លឹមហេង បានយកឈ្នះលេខ ២ ពូល E ឃឹម ឃឹម។
ចំណែកលេខ ២ ពូល B កែវ វឌ្ឍនា បានទម្លាក់លេខ ១ ពូល E ប៊ូ ប៉ុណ្ណម៉ាលីកា ស្របពេលលេខ ២ ពូល C ធីម ឌីណា ឈ្នះលេខ ១ ពូល D ប៉ោ សារិទ្ធ។ យ៉ាងណាក៏ដោយជើងឯករងស្តេចអុកឆ្នាំ ២០១៧ ប៊ិន គាសេង និង ប៊ូ ប៉ុណ្ណម៉ាលីកា បានឈ្នះក្នុងការប្រកួតវិលជុំរវាងអ្នកចាញ់ទាំង ៦ ទើបបានឱកាសឡើងមកប្រកួតផ្តាច់ព្រ័ត្រ នាពេលខាងមុខនេះ។
លោក គ្រូច ចន្ថារិទ្ធ គណៈកម្មការរៀបចំការប្រកួត បានអះអាងថា៖ «អ្នកឈ្នះទាំង ៨ នាក់ចុងក្រោយនេះគឺឆ្លងកាត់ការប្រកួតជម្រុះ ប្រកបដោយយុត្តិធម៌ តម្លាភាព គឺអ្នកមានសមត្ថភាព បានឈ្នះ ហើយក្នុងចំណោមបេក្ខជនស្តេចអុក ៨ នាក់ឆ្នាំ ២០១៨ នេះគឺមានជើងថ្មីជាប់បាន ៤ នាក់។ ចំណែក ៤ នាក់ទៀតជាជើងចាស់ ធ្លាប់ជាប់ ៨ នាក់ចុងក្រោយកន្លងមកមានដូចជា អេង សេងហៀក, កែវ វឌ្ឍនា, ប៊ិនគាសេង និង ឈាវ បូរ៉ា»។
ចំណែកអតីតស្តេចអុកឆ្នាំ ២០១៤ និង ២០១៥ ឈាវ បូរ៉ា និយាយថា៖ «ក្នុងចំណោមអ្នកឈ្នះ ៨ នេះ យើងមិនហ៊ាននិយាយថា អ្នកណាខ្លាំងជាងអ្នកណាទេ ព្រោះវាអាស្រ័យនៅលើពេលលេងតែម្តង គឺចាញ់ឈ្នះនៅពេលគិតភ្លាម»។
ឈាវ បូរ៉ា ដែលជាអគ្គលេខាធិការសហព័ន្ធកីឡាអុកចត្រង្គកម្ពុជា ផងនោះ បានបន្ថែមថា៖ «សម្រាប់ឆ្នាំ ២០១៨ នេះ ការប្រកួតចុងក្រោយ នៅសៀមរាប មិនទាន់ចាប់គូទេ គឺទៅចាប់ឆ្នោតនៅឯសៀមរាប ពេលប្រកួតតែម្តង ហើយក៏មិនដឹងថា ចែកជា ២ ពូល ដូចឆ្នាំមុន ឬយ៉ាងណាទេ ព្រោះខាងសហភាពសហព័ន្ធយុវជនកម្ពុជា ជាអ្នករៀបចំទាំងអស់»៕