ក្រុងគូឡាឡាំពួ: អ្នកប្រយុទ្ធគុនចម្រុះរបស់កម្ពុជា ឯម សុវណ្ណារី និងចាន់ រតនា សុទ្ធសឹងបានធ្វើឲ្យកម្ពុជាមានមុខមាត់លើទឹកដីនៃទីក្រុងគូឡាឡាំពួ ក្រោយពីពួកគេដណ្តើមបានជ័យជម្នះតាមរយៈការផ្តួលឲ្យ ដៃគូសន្លប់ដូចគ្នាក្នុងការប្រកួតក្នុងព្រឹត្តិការណ៍ ONE: Destiny of Champions ប្រទេសម៉ាឡេស៊ី កាលពីថ្ងៃសុក្រ។ កីឡាការិនីកូនខ្មែរដើមអាមេរិកសុវណ្ណារី បានចំណាយពេលច្រើនជាង ១,២០ នាទីប៉ុណ្ណោះ ដើម្បីផ្តួលកីឡាការិនីអ៊ុយក្រែន IrynaKyselova ក្នុងទម្ងន់ ៦៣,៥ គីឡូក្រាម ឲ្យសន្លប់ក្នុងការប្រកួតបើកឆាកនៅរាត្រីដដែលនោះ។
កីឡាការិនីវ័យ ២៦ ឆ្នាំរូបនេះ អាចសង្គ្រោះពីការព្យាយាមក្លេរបស់ Iryna យ៉ាងល្អ មុននឹងដណ្តើមបានឱកាសក្នុងការអង្គុយលើដៃគូវិញ ហើយសុវណ្ណារី បានវាយយ៉ាងសន្ធាប់ទៅលើផ្ទៃមុខរបស់ដៃគូដើម្បីបង្ខំឲ្យអាជ្ញាកណ្តាលបញ្ឈប់ការប្រកួតនៅដើមទឹកទី ១ តែម្តង។
ក្រោយពីដណ្តើមបានជ័យជម្នះក្នុងការបង្ហាញខ្លួនជាលើកទី ១ របស់នាងក្នុងកម្មវិធីប្រកួតដែលត្រូវបានរៀបចំឡើងដោយអង្គភាព ONE Championship (ONE) សុវណ្ណារី បានបញ្ជាក់ថា នាងពិតជារំភើបណាស់ក្នុងការដណ្តើមបានជ័យជម្នះនេះ ដើម្បីធ្វើឲ្យកម្ពុជាមានមោទនភាព។
កីឡាការិនីរូបនេះបានប្រាប់ភ្នំពេញ ប៉ុស្តិ៍ នៅឯសង្វៀន Axiata Arena ថា៖ «ខ្ញុំពិតជារីករាយណាស់។ ខ្ញុំបានត្រៀមការប្រកួតយ៉ាងល្អ ដោយយើងបានផ្តោតលើការរារាំងការប្រើប្រាស់ស្នៀតក្លេរបស់គូប្រកួត។ គម្រោងរបស់ខ្ញុំគឺប្រើប្រាស់កណ្តាប់ដៃ ប៉ុន្តែ ពេលដែលនាងចង់ប្រើប្រាស់ក្បាច់ក្លេ ខ្ញុំត្រូវតែមានការទទួលខុសត្រូវក្នុងការរារាំង»។
សុវណ្ណារី បានបន្ថែមទៀតថា៖ «ខ្ញុំពិតជាមានមោទនភាពក្នុងការប្រកួតតំណាងឲ្យកម្ពុជា។ ខ្ញុំពិតជារំភើបណាស់ក្នុងការធ្វើឲ្យកម្ពុជាមានមោទនភាពតាមរយៈការដណ្តើមបានជ័យជម្នះ»។
អ្នកប្រយុទ្ធរបស់កម្ពុជាម្នាក់ទៀតនៅរាត្រីដដែលនោះ ចាន់ រតនា បានគេចផុតពីការសន្លប់ក្នុងទឹកទី ១ និងការចាញ់ដោយស្នៀតក្លេនៅដើមទឹកទី ២ នៅពេលដែលប្រកួតជាមួយកីឡាករឥណ្ឌូនេស៊ី Abro Fernandes មុននឹងវាយឲ្យដៃគូរបស់ខ្លួនសន្លប់នៅរយៈពេល ១ នាទីចុងក្រោយ។
ចាន់ រតនា ហាក់ចាញ់ប្រៀបទាំងស្នៀតក្លេ និងការវាយដោយជំហររបស់កីឡាករ Fernandes ក្នុងទឹកទី ១ តែត្រូវបានព្យាយាមគេចផុតពីស្នៀតក្លេរបស់ដៃគូខ្លួននៅដើមទឹកទី ២ ខណៈដែលពួកគេបានសម្តែងនូវការធ្លាក់ចុះថាមពលដូចគ្នាក្នុងទឹកនេះ។
ប៉ុន្តែ ការមានស្មារតីតស៊ូយ៉ាងខ្លាំង និងការស្រេកឃ្លានជ័យជម្នះ បានជំរុញឲ្យរតនា យកឈ្នះលើដៃគូទាំងត្រដាបត្រដួស តាមរយៈការប្រើប្រាស់ស្នៀតទាត់ ជង្គង់ និងកណ្តាប់ដៃដើម្បីបង្ខំឲ្យអាជ្ញាកណ្តាលបញ្ឈប់ការប្រកួតក្នុងទម្ងន់ ៦១,២ គីឡូក្រាមនេះ នៅនាទី ទី ៤:០៦ ក្នុងការប្រកួតនៃទឹកទី ២ តែម្តង។
ក្រោយពីការប្រកួត កីឡាករវ័យ ៣២ ឆ្នាំរូបនេះបានបញ្ជាក់ថា៖ «ពេលខ្ញុំត្រូវ១ដៃរបស់គាត់ក្នុងទឹកទី ១ ខ្ញុំស្ទើរតែសន្លប់ទៅហើយ ព្រោះកណ្តាប់ដៃរបស់គាត់ធ្ងន់ ប៉ុន្តែ ខ្ញុំបានខាំធ្មេញព្យាយាមចូលវាយ ដើម្បីពង្រឹងកម្លាំងស្មារតីដើម្បីរកឱកាសទាត់វិញ»។
រតនា បានបន្តថា៖ «ក្រោយមក ខ្ញុំបានព្យាយាមវាយសម្រុកលើដៃគូ ដើម្បីប្រមូលស្មារតី និងស្ទង់កម្លាំងរបស់គាត់។ ប៉ុន្តែ ក្រោយពីខ្ញុំបានគេចផុតពីការក្លេរបស់គាត់ ឃើញថា ទាំងខ្ញុំ និងគាត់ពិតជាធ្លាក់ចុះកម្លាំងដូចគ្នា ប៉ុន្តែ គាត់ហាក់ដូចជាអស់កម្លាំងស៊ុហ្វជាងខ្ញុំ ហេតុនេះ ខ្ញុំបានព្យាយាមវាយកម្លាំងចុងក្រោយរបស់ខ្ញុំ ដើម្បីដណ្តើមជ័យជម្នះនេះតែម្តង»។
ក្នុងការប្រកួតគូឯកនៃព្រឹត្តិការណ៍ ONE: Destiny of Champions នៅរាត្រី ដដែលនោះ កីឡាករជើងខ្លាំងថៃ Yodsanklai IWE Fairtex បានយកឈ្នះលើកីឡាករអូស្ត្រាលី Luis Regis យ៉ាងងាយ តាមរយៈការវាយឲ្យរូបគេដួលសន្លប់ ក្រោយពីចាប់ផ្តើមប្រកួតបានត្រឹមតែ ២,០៨ នាទីប៉ុណ្ណោះនៃទឹកទី ១៕