ភ្នំពេញ: កីឡាករកម្ពុជា២រូប បានជួបលទ្ធផលខុសគ្នា ដោយលី ភា មកពីក្លិបសំរោងកោងខេត្តបាត់ដំបង បានចាញ់ពិន្ទុកីឡាករថៃ Phat Chhayak Phoum ប៉ុន្តែសូត្រ ប៊ុនធី ដណ្តើមបានលទ្ធផលល្អ តាមរយៈការផ្តួលកីឡាករជើងខ្លាំងថៃនៅត្រឹមទឹក ១ ប៉ុណ្ណោះក្នុងការប្រកួតវគ្គជម្រុះសន្សំពិន្ទុខ្សែក្រវាត់ខារ៉ាបាវទម្ងន់ ៦០ គីឡូក្រាមនៃសង្វៀនអាស៊ីអាគ្នេយ៍កាលពីល្ងាចថ្ងៃសៅរ៍។
ប៊ុនធី បានប្រើក្បាច់ជង្គង់ផ្ទួនៗ និងបន្ថែមដោយកែងស្តាំ ១ ដែលបណ្តាលឲ្យកីឡាករថៃ Phat Maha សន្លប់ធំក្នុងទឹកទី ១ តែម្តង។
ដោយឡែក សម្រាប់លទ្ធផលព្រឹកថ្ងៃអាទិត្យ ក្នុងកម្មវិធី Bo-ostrong Fighters on Fire កីឡាករមាស សុជាតិ មកពីក្លិបឃ្លាំងមឿងខេត្តពោធិ៍សាត់ បានផ្តួលកីឡាករថៃ Ha Chhlam ឲ្យសន្លប់ត្រឹមពាក់កណ្តាលទឹកទី ១ យ៉ាងផុយស្រួយផងដែរ។
ជ័យជម្នះរបស់កីឡាករសូត្រ ប៊ុនធី គឺជាការប្រជែងយកតំណែងលំដាប់ពិន្ទុនៅលើកំពូលតារាង មានការប្រែប្រួលយ៉ាងច្បាស់ ដោយ ប៊ុនធី រកបាន ៣ ពិន្ទុបន្ថែមទៀត ហើយសរុបចំនួន ៣ ប្រកួត រូបគេបានឈ្នះទាំង ៣ ប្រកួត មាន ៩ ពិន្ទុ។
គូប្រជែងក្នុងពូលតែ ១ គឺកីឡាករសុខ សាវិន ៣ ប្រកួត ឈ្នះ ២ ប្រកួត ចាញ់ ១ ប្រកួត មានតែ ៧ ពិន្ទុ តាមពីក្រោយ និងសល់ការប្រកួត ១ លើកម្នាក់ទៀតដូចគ្នា មុននឹងបូកសរុបយកអ្នកមានពិន្ទុខ្ពស់ជាងគេតែម្នាក់ទៅវគ្គផ្តាច់ព្រ័ត្រ។
សម្រាប់កីឡាករ ២ នាក់ទៀតគឺឃីម បូរ៉ា មកពីខេត្តបន្ទាយមានជ័យ និងកីឡាករលី ភា មកពីខេត្តបាត់ដំបង បានឈ្នះ ១ ប្រកួតដូចគ្នា ពីការប្រកួត ៣ លើករបស់ខ្លួន ហេតុនេះពួកគេអស់ឱកាសប្រកួតប្រជែងក្នុងពូលដូចគ្នា។ ក្រោយទទួលបានលទ្ធផលឈ្នះជាទីគាប់ចិត្ត សូត្រ ប៊ុនធី បាននិយាយថា៖ «ការប្រកួតរបស់ខ្ញុំនឹងឈានដល់វគ្គផ្តាច់ព្រ័ត្រ ពីព្រោះឧបសគ្គធំគឺការប្រកួតតឹងតែងរបស់ខ្ញុំបានឆ្លងផុតរួចហើយ»។
ការហ៊ានអះអាងរបស់សូត្រ ប៊ុនធី ដោយសារតែលើកក្រោយដល់វេនត្រូវប៉ះប្រកួតជាមួយកីឡាករថៃម្នាក់ទៀតគឺ Phat Chhayak Phoum ដែលជាការប្រកួតចុងក្រោយ ខណៈដែលដៃគូប្រកួតនេះសូត្រ ប៊ុនធី ធ្លាប់ឈ្នះកន្លងមកផងដែរ។
សូត្រ ប៊ុនធី បានបន្ថែមថា៖ «ដើមទឹកទី ១ ខ្ញុំស្ទាបស្ទង់បន្តិច ប៉ុន្តែបន្តមក ឃើញមានឱកាសល្អ ខ្ញុំប្រើស្នៀតបោះជង្គង់ចូលពោះ និងទ្រូងយ៉ាងពេញទំហឹង ហើយព្រលែងមួយកែងស្តាំទៀត ធ្វើឲ្យដៃគូសន្លប់ធំតែម្តងដែលសូម្បីខ្លួនខ្ញុំក៏ស្មានមិនដល់ថា ទទួលបានលទ្ធផលឈ្នះភ្លាមៗដែរ»។
ក្នុងការប្រកួតជាក់ស្តែងរវាងលី ភា និងកីឡាករថៃ Ha Chhlam ទោះបីជា លី ភា ចាញ់ ប៉ុន្តែបានតស៊ូជាមួយគ្នាយ៉ាងស្វិតស្វាញចំនួន ៥ ទឹកពេញ។ លទ្ធផលនេះ នាំឲ្យរូបគេអស់ឱកាសបានឡើងទៅវគ្គបន្តពីព្រោះចាញ់ ២ និងឈ្នះ ១ ពីការប្រកួត ៣ លើក៕