.jpg)
សួង វិរៈ របស់ណាហ្គាវើល បានព្យាយាមគ្រប់គ្រងបាល់ពីការរារាំងរបស់ សារ៉េត គ្រី របស់ក្រុមស្វាយរៀង។
ភ្នំពេញៈ ការប្រកួតលីកកំពូលកម្ពុជា ឆ្នាំ ២០១៩ នឹងត្រូវប្រកួតបញ្ចប់ជើងទី ១ នៅថ្ងៃសៅរ៍ និងថ្ងៃអាទិត្យនេះ ហើយវាក៏ជាពេលដែលក្រុមកំពុងឈរនៅលេខ ១ ព្រះខ័នរាជស្វាយរៀង និងក្រុមឈរនៅលេខ ២ ណាហ្គាវើល ត្រូវវិលមកជួបគ្នាផងដែរ ចំណែកក្រុមឈរនៅលេខ ៣ អង្គរថាយហ្គឺរ និងក្រុមឈរនៅលេខ ៤ បឹងកេត សុទ្ធតែមានភាគរយខ្ពស់ក្នុងការស្វែងរក ៣ ពិន្ទុបន្ថែម។
ក្រុមណាហ្គាវើល ធ្លាប់បានផ្តល់ភាពសោកសៅឲ្យក្រុមព្រះខ័នរាជ ស្វាយរៀង សម្រាប់ការជួបគ្នាកាលពីរដូវកាលឆ្នាំ ២០១៨ តាមរយៈការយកឈ្នះ ៤-០ នៅលើទឹកដីខេត្តស្វាយរៀងក្នុងជើងទី ២ ក្រោយពេលក្រុមទាំង ២ នេះស្មើគ្នា ០-០ ក្នុងការប្រកួតជើងទី ១ លើទឹកដីណាហ្គាវើល។
ប៉ុន្តែសម្រាប់ការប្រកួតរដូវកាលឆ្នាំ ២០១៩ នេះ ព្រះខ័នរាជស្វាយរៀងបានក្លាយជាក្រុមតែមួយគត់ដែលមិនទាន់ស្គាល់ការចាញ់សោះ ហើយការឈ្នះ ១០ និងស្មើ ២ ដងបានធ្វើឲ្យពួកគេកំពុងឈរនៅលេខ ១ ដោយមាន ៣២ ពិន្ទុ ដាច់ឆ្ងាយពីក្រុមណាហ្គាវើលដែលមាន ២៧ ពិន្ទុ។
ជាមួយគម្លាតពិន្ទុនាំមុខនេះ ណាហ្គាវើល គឺជាក្រុមចុងក្រោយដែលគេរំពឹងថា នឹងអាចកាត់បន្ថយភាពខ្លាំងរបស់ស្វាយរៀង ដើម្បីធ្វើឲ្យការប្រកួតប្រជែងគ្នា នៅជើងទី ២ មានការប្រកៀកប្រកឹតគ្នាវិញ ព្រោះពេលនេះក្រុមឈរនៅលេខ ៣ អង្គរថាយហ្គឺរ ទើបមាន ២៤ ពិន្ទុទេ ឯក្រុមឈរនៅលេខ ៤ បឹងកេត មានត្រឹម ២៣ ពិន្ទុ ខណៈវិសាខា ឈរនៅលេខ ៥ មានត្រឹម ២២ ពិន្ទុគឺតិចជាងក្រុមស្វាយរៀងរហូតដល់ ១០ ពិន្ទុឯណោះ។
ក្រុមណាហ្គាវើល ក៏ត្រូវការឈ្នះក្រុមស្វាយរៀង ដើម្បីលុបលាងភាពហ្មងសៅ ចំពោះការចាញ់ក្រុមវិសាខា ៣-២ ទាំងមិនអស់ចិត្តកាលពីសប្តាហ៍មុនផងដែរ ប៉ុន្តែការចង់ឈ្នះ ៣ ពិន្ទុនេះ វាស្ថិតនៅក្នុងភាពមិនច្បាស់នោះទេ ព្រោះពេលនេះគ្រូបង្វឹកលោក Conor Nestor កំពុងជំរុញឲ្យក្រុមស្វាយរៀង កែប្រែចំណុចខ្វះខាតរបស់ខ្លួនឲ្យបានឆាប់សម្រាប់ការជួបណាហ្គាវើលលើកនេះ បន្ទាប់ពីពួកគេបានបង្ហាញការលេងមិនសូវបានល្អក្នុងការយកឈ្នះក្រុមម្ចាស់ផ្ទះអាស៊ីអឺរ៉ុប ២-០ កាលពីថ្ងៃសៅរ៍នោះ។
លោក Conor បាននិយាយក្រោយការប្រកួតនោះថា៖ «ខ្ញុំគិតថា យើងលេងនៅតង់ទី ១ គឺនៅមានកម្រិត ហើយបើសិនជាពួកយើងបន្តធ្វើវាបែបនេះ នៅក្នុងការប្រកួតក្រោយទៀតពួកយើងប្រាកដជាមិនទទួលបានលទ្ធផលល្អនោះទេ។ ហេតុនេះពួកយើងត្រូវរៀនពីវាឲ្យបានឆាប់រហ័ស ព្រោះពួកយើងនៅមានការប្រកួតផ្សេងទៀត ហើយប្រសិនបើពួកយើងមិនរៀនសូត្រពីចំណុចខ្វះខាតទាំងអស់នេះរបស់ខ្លួនឯងទេនោះ ពួកយើងប្រាកដជាចាញ់ ការប្រកួតនៅក្នុងលីក»។
ដោយឡែកក្រុមអង្គរថាយហ្គឺរ និងបឹងកេតដែលសុទ្ធតែចាញ់ទាំងមិនអស់ចិត្តកាលពីសប្តាហ៍មុននោះត្រូវបានគេមើលឃើញថាអាចនឹងរកឃើញការឈ្នះឡើងវិញ ខណៈពួកគេត្រូវវិលទៅជួបក្រុមអគ្គិសនីកម្ពុជា និងគិរីវង់សុខសែនជ័យដែលមានកម្រិតលេងនៅស្ទើរជាងពួកគេនោះ ចំណែក វិសាខា ក៏បានដាក់ការប្រឹងប្រែង ដើម្បីយកឈ្នះក្រុមប៉ូលិសផងដែរ ដើម្បីប្រជែងឡើងទៅតំបន់កំពូលតារាងទាំង ៤ វិញ៕
កម្មវិធីប្រកួតនៅថ្ងៃសៅរ៍
-ក្រសួងការពារជាតិ v អាស៊ីអឺរ៉ុប កីឡដ្ឋានស្តាតចាស់ ១៨:០០
-អង្គរថាយហ្គឺរ v អគ្គិសនីកម្ពុជា កីឡ.ខេត្តសៀមរាប ១៥:៣០
-យុវជនបាទី.១៨ ឆ្នាំ v សូលទីឡូអង្គរ នៅសាលាកីឡាបាល់ទាត់ជាតិបាទី ១៥:៣០
៤ ប្រកួតនៅថ្ងៃអាទិត្យ
-ខេត្តកំពង់ចាម v ភ្នំពេញក្រោន វិ.ប៊ុនរ៉ានី ហ.សមេមត់ ១៥:៣០
-ស្វាយរៀង v ណាហ្គាវើល កីឡដ្ឋានខេត្តស្វាយរៀង ១៨:០០
-គិរីវង់ v បឹងកេត កីឡដ្ឋាន-គិរីវង់សុខសែនជ័យ ១៥:៣០
-វិសាខា v ប៉ូលិស កីឡដ្ឋានវិសាខា ១៨:០០
