ភ្នំពេញៈ ការប្រកួតបាល់ទាត់លីកពាក់កណ្តាលអាជីព Keller Williams Cambodia League 2019 (KW Cambodia League) បានរកឃើញក្រុមទាំង ៤ ដែលឈរនៅ Top5 សម្រាប់ឡើងទៅប្រកួតដណ្តើមយកពានតូច ជាផ្លូវការហើយ ខណៈពានធំត្រូវបានគេមើលឃើញថានឹងធ្លាក់ទៅលើកណ្តាប់ដៃក្រុមចំណូលថ្មី ISI Group United ដោយគ្មានអ្វីត្រូវប្រែប្រួលនោះទេ។
សម្រាប់ការប្រកួតប្រចាំសប្តាហ៍ទី ១៤ នៅកីឡដ្ឋានវេស្ទើន និង ទីលាន KMH កាលពីថ្ងៃអាទិត្យក្រុមម្ចាស់ជើងឯកឆ្នាំចាស់ Avatar FC ក្រុមជើងឯករង ២ សម័យកាល Khmer United A ក្រុម Riel Phnom Penh និងអតីតក្រុមម្ចាស់ជើងឯកឆ្នាំ ២០១៦ Bayon Wanderes សុទ្ធតែរកបាន ៣ ពិន្ទុបន្ថែម ដើម្បីបិទច្រកក្រុមផ្សេងទៀតក្នុងការប្រជែងឡើងមកឈរនៅ Top5។
ជាមួយគ្នានោះក្រុម ISI Group United ត្រូវបានគណៈកម្មការសម្រេចឲ្យឈ្នះក្រុម បោះបង់ចោលការប្រកួត Anvaya ៣-០ ដោយស្វ័យប្រវត្តិ ហើយការឈ្នះបាន ៣ ពិន្ទុបន្ថែមដោយមិនចំណាយកម្លាំងនេះបានធ្វើជួយឲ្យក្រុម ISI មានភាគរយស្ទើរ ១០០ ភាគរយទៅហើយក្នុងការលើកពាននៅឆ្នាំនេះ។
ពេលនេះក្រុម ISI Group United កំពុងឈរនៅលេខរៀងទី ១ ដោយមាន ៤០ ពិន្ទុ និងតាមយ៉ាងប្រកៀកដោយក្រុម Avatar ដែលមាន ៣៩ ពិន្ទុ បន្ទាប់ពី Avatar បានលត់ក្រុមទន្សោង ៦-០ ដើម្បីបង្ហាញពីការខកចិត្តក្នុងការការពារពានរបស់ខ្លួននោះ ព្រោះពួកគេបានដឹងច្បាស់ណាស់ថា ក្រុមគ្រួសារកីឡាករតាំងគោកដែលត្រូវប្រកួតចុងក្រោយជាមួយក្រុម ISI នោះគឺគ្មានលទ្ធភាពក្នុងការទប់ដំណើរទៅលើកពានរបស់ក្រុម ISI បាននោះទេ។
ជាមួយគ្នានេះលោក សុវណ្ណ អ្នកចាត់ការទូទៅក្រុម ISI Group United ក៏មិនបានចាប់អារម្មណ៍ទៅលើក្រុមគ្រួសារកីឡាតាំងគោកដែលកំពុងឈរនៅលេខរៀងទី ១៤ នោះទេ។ លោកធ្លាប់បានប្រាប់ភ្នំពេញប៉ុស្តិ៍ថា៖ «យើងមិនមានអ្វីត្រូវបារម្ភទៅលើការជួបក្រុមគ្រួសារកីឡាតាំងគោកនោះទេ ព្រោះសមាសភាពកីឡាករក្នុងក្រុមនេះមិនអាចបង្កការលំបាកដល់ពួកយើងឡើយ»។
ចំណែកក្រុម Khmer United A ដែលមានការខកចិត្តដូចគ្នាទៅនឹងក្រុម Avatar ព្រោះមិនអាចសម្រេចគោលបំណងឈ្នះពានធំជាលើកដំបូងនោះបានព្យាយាមលេងដោយគ្មានការយោគយល់ជាមួយក្រុមសិស្សប្អូន Khmer United B ដើម្បីទទួលបានជ័យជម្នះ ៥-២ និងបន្តឈរនៅលេខ ៣ មាន ៣៥ ពិន្ទុ។
យ៉ាងណាមិញក្រុម Riel PP បានយកឈ្នះក្រុម Khmer United U22 ក្នុងលទ្ធផល ៤-០ ដើម្បីឈរនៅលេខ ៤ មាន ៣៤ ពិន្ទុ ខណៈ Bayon Wanderers ត្រូវបានសម្រេចឲ្យឈ្នះក្រុមបោះបង់ចោលការប្រកួត Home Sport ៣-០ ដើម្បីឈរនៅលេខ ៥ មាន ២៨ ពិន្ទុ។
ចំណែកក្រុម Mambo Phnom Penh បានលត់ក្រុម Sen Sok Empire FT ១០-២ ហើយក្រុមបាសាក់ក៏បានយកឈ្នះក្រុម ATK ៣-០ ដើម្បីមាន ២៤ ពិន្ទុ ស្មើក្រុម Mambo ប៉ុន្តែក្រុមទាំង ២ នេះ អស់ឱកាសទៅប្រកួតពានតូច KW Cambodia Cup 2019 ហើយ ព្រោះតាមលទ្ធផល និងពិន្ទុសម្រាប់ការប្រកួតប្រចាំសប្តាហ៍ទី ១៤ នេះគឺបានបញ្ជាក់យ៉ាងច្បាស់ថា មានតែក្រុម Avatar FC, Khmer United A ក្រុម Riel Phnom Penh និងក្រុម Bayon Wanderes ប៉ុណ្ណោះដែលអាចដណ្តើមយកពានតូច ក្រោយក្រុមទាំង ៤ នេះអស់ឱកាសដណ្តើមយកពានធំពីក្រុម ISI Group United។
ទាក់ទៅនឹងការប្រកួតដណ្តើមយកពានតូច KW Cambodia Cup 2019 នេះ គណៈកម្មការរៀបចំការប្រកួតបានប្រាប់កាលពីម្សិលមិញថា ការប្រកួតដណ្តើមយកពានតូចនេះ យើងកំណត់ឲ្យក្រុមទាំង ៤ ដែលឈរនៅលេខ ២ ដល់លេខ ៥ ធ្វើការចាប់ឆ្នោតនៅក្រោយការប្រកួតសប្តាហ៍ទី ១៥ ចុងក្រោយនាថ្ងៃអាទិត្យខាងមុខនេះ ខណៈការប្រកួតកាលពីឆ្នាំ ២០១៧ Khmer United A បានលើកពានតូចនេះហើយ Avatar ជាអ្នកលើកពានធំប្រចាំឆ្នាំ៕