ក្រុងមេនឆេស្ទ័រ: លោក Pep Guardiola បានធ្វើការរិះគន់យ៉ាងខ្លាំងទៅលើកម្រិតស្តង់ដារអាជ្ញាកណ្តាលជុំវិញការរងបរាជ័យទាំង២លើកជើងរបស់ក្រុម Manchester City ក្នុងក្របខ័ណ្ឌ Champions League ក្រោមស្នាដៃក្រុម Liverpool បន្ទាប់ពីការប្រកួតកាលពីថ្ងៃអង្គារ។
ក្រុមរបស់លោក Guardiola បានរងបរាជ័យយ៉ាងចាស់ដៃក្នុងលទ្ធផលទាំង២ជើង ៥-១ ក្រោយពីចាញ់ក្រុម Liverpool ២-១ ក្នុងការប្រកួតជើងទី២នៃវគ្គ៨ក្រុមចុងក្រោយ នាកីឡដ្ឋាន Eastlands។
ប៉ុន្តែ អ្នកចាត់ការទូទៅរបស់ក្រុម Man City រូបនេះ មានអារម្មណ៍ថា វាគួរតែមានលទ្ធផលផ្សេងពីនេះ ប្រសិនបើការសម្រេចចិត្តផ្សេងៗពីមន្ត្រីអាជ្ញាកណ្តាល ធ្វើឡើងដោយផ្តល់ការមានប្រៀបដល់ក្រុមរបស់លោកកនុងការប្រកួតទាំង ២ ជើង។
ក្រុម Liverpool បានរកគ្រាប់បាល់នាំមុខមុនក្នុងជើងទី ១ ជាមួយនឹងគ្រាប់បាល់ដែលបានកើតឡើងក្នុងពេល Mohamed Salah ស្ថិតក្នុងជំហរ Offside ស្របបេលដែលក្រុម Man City ក៏បានបាត់បង់គ្រាប់បាល់ ១ គ្រាប់ក្នុងជើងទី ២ ដោយការកាត់សេចក្តីខុសផងដែរ។
ក្រោយពីចាញ់ក្នុងជើងទី១ ៣-០ Man City បានរកគ្រាប់បាល់នាំមុខមុនតាមរយៈគ្រាប់បាល់របស់ Gabriel Jesus ហើយលោក Guardiola បានគិតថា ពួកគេបានរកគ្រាប់បាល់ម្តងទៀត នៅពេលដែលតារាឆ្នើម Leroy Sane បានស៊ុតបាល់បំប៉ោងសំណាញ់ទី។
ប៉ុន្តែ គ្រាប់បាល់នោះត្រូវបានកាត់សេចក្តីទាំងខុសថា ជាបាល់ស្ថិតក្នុងជំហរ Offiside ហើយក្រុម Liverpool បានវាយបកវិញតាមរយៈគ្រាប់បាល់ពី Salah និង Roberto Firmino។
លោក Guardiola បានឲ្យដឹងថា៖ «វាពិតជាមានភាពផ្សេងគ្នាក្នុងការនាំមុខ ១-០ ក្នុងតង់ទី១ និង ២-០។ នៅពេលដែលក្រុមទាំង ២ មានកម្រិតស្មើគ្នា ឥទ្ធិពលនៃការសម្រេចចិត្តទាំងនេះ ពិតជាធំណាស់»៕ IS