ក្រុងលីវើភូល: ក្រុម Manchester City នឹងរក្សាបច្ចេកទេសលេងបែបវាយសម្រុករបស់ខ្លួន នៅពេលជួបជាមួយនឹងក្រុម Liverpool ក្នុងការប្រកួតក្របខ័ណ្ឌ Champions League វគ្គ ៨ ក្រុមចុងក្រោយ ជើងទី ១ របស់ពួកគេ នៅរាត្រីនេះ។ នេះបើយោងទៅតាមការបញ្ជាក់របស់គ្រូបង្វឹករបស់ក្រុមកំពុងនាំមុខលើតារាងក្របខ័ណ្ឌ Premier League មួយនេះ កាលពីថ្ងៃអង្គារ។
Liverpool គឺជាក្រុមតែមួយដែលបានផ្តួលក្រុម Man City ក្នុងក្របខ័ណ្ឌ Premier League នៅរដូវកាលនេះ ក្រោយពីបានយកឈ្នះក្នុងលទ្ធផល ៤-៣ នាកីឡដ្ឋាន Anfield កាលពីខែមករា។
ខ្សែប្រយុទ្ធដ៏មុតស្រួចទាំង ៣ របស់ក្រុមម្ចាស់ផ្ទះដែលរួមមាន Mohamed Salah, Roberto Firminoនិង Sadio Mane សុទ្ធសឹងបានរកគ្រាប់បាល់បញ្ចូលទី ខណៈដែលកីឡាករទាំង ៣ រកបានគ្រាប់បាល់សរុបដល់ទៅ ៧៥ គ្រាប់នៅរដូវកាលនេះ។
ប៉ុន្តែ លោក Guardiola សញ្ជាតិអេស្ប៉ាញ ជឿជាក់ថា បច្ចេកទេសលេងបែបវាយសម្រុក គឺជាមធ្យោបាយដ៏ល្អបំផុតសម្រាប់ Man City ក្នុងការឈានទៅវគ្គពាក់កណ្តាលផ្តាច់ព្រ័ត្រនៃក្របខ័ណ្ឌ Champions League ជាលើកទី ២ របស់ពួកគេ ប៉ុន្តែ ជាលើកទី៨ក្នុងចំណោម ៩ រដូវកាលរបស់លោកក្នុងនាមជាគ្រូបង្វឹក។
លោក Guardiola បាននិយាយកាលពីថ្ងៃអង្គារថា៖ «ខ្ញុំដឹងថា របៀបដែលយើងលេងគឺល្អសម្រាប់ Liverpool ពីព្រោះពួកគេជាក្រុមមួយដែលវាយសម្រុកបែបនេះ មិនដូចក្រុមផ្សេងក្នុងពិភពលោកឡើយ។ ប៉ុន្តែ មធ្យោបាយដ៏ល្អបំផុតក្នុងការឈ្នះ គឺត្រូវធ្វើតាមរបៀបដែលយើងបានធ្វើចាប់តាំងពីយើងស្ថិតនៅទីនេះ»។
ការប្រកួតនេះនឹងចាប់ផ្តើមនៅម៉ោង ១:៤៥ ទៀបភ្លឺ៕ IS