ក្រុងលីវើភូល: លោក Jose Mourinho បានបង្ហើបប្រាប់ថា កីឡាកររបស់ក្រុម Manchester United មិនមានភាពខ្លាំងគ្រប់គ្រាន់ក្នុងការប្រជែងជាមួយនឹងក្រុម Liverpool ឡើយ ក្រោយពីបានរងបរាជ័យក្នុងលទ្ធផល ៣-១ នាកីឡដ្ឋាន Anfield កាលពីថ្ងៃអាទិត្យ ក្រោមស្នាដៃក្រុមកំពុងនាំមុខលើតារាងក្របខ័ណ្ឌ Premier League មួយនេះ។
លោក Mourinho បានអះអាងនៅមុនពេលការប្រកួតថា Liverpool បានប្រើប្រាស់សំណាងរបស់ខ្លួននៅរដូវកាលនេះ ប៉ុន្តែ បើទោះបីមានគ្រាប់សំណាង២គ្រាប់ពីសំណាក់ខ្សែបម្រើបម្រុង Xherdan Shaqiri នៅរយៈពេល១៧នាទីចុងក្រោយក៏ដោយ ប៉ុន្តែ ក្រុមភ្ញៀវ នៅតែមិនស័ក្តិសមក្នុងការទទួលបានលទ្ធផលក្រៅពីការរងបរាជ័យក្នុងការប្រកួតលីកជាលើកទី៥នៅរដូវកាលនេះឡើយ។
លោក Mourinho បានឲ្យដឹងថា៖ «កីឡាករបានផ្តល់រាល់អ្វីៗទាំងអស់ ហើយនៅពេលដែលពួកគេផ្តល់រាល់អ្វីៗទាំងអស់ ខ្ញុំមិនដែលខកចិត្តជាមួយពួកគេឡើយ។ ខ្ញុំមានអារម្មណ៍ល្អចំពោះពួកគេ ពួកគេលេងដោយប្រើគុណភាពរបស់ពួកគេ ដែលដូចគ្នាដែលគូប្រជែងរបស់យើងបានលេងជាមួយនឹងគុណភាពរបស់ពួកគេ»។
គ្រូបង្វឹករូបនេះបានបន្ថែមទៀតថា៖ «ពួកគេ (Liverpool) មានល្បឿនលឿន រឹងមាំ វាយសម្រុកខ្លាំង និងខ្លាំងផ្នែករាងកាយ ពួកគេរត់បានដល់ទៅ ៣២១ គីឡូម៉ែត្រ ក្នុងមួយម៉ោង ពេលមាន និងគ្មានបាល់»៕ IS