.jpg)
លោក Jose Mourinho គ្រូបង្វឹកនៃក្រុម Manchester United បញ្ចេញប្រតិកម្មក្នុងពេលប្រកួតជាមួយនឹងក្រុម Chelsea។ AFP
ក្រុងឡុងដ៍: លោក Jose Mourinho បានចាត់ទុកការរបូតឲ្យមានគ្រាប់បាល់តាមស្មើនៅនាទី ទី៩៦ ដើម្បីបញ្ចប់ក្នុងលទ្ធផល ២-២ នៅលើទឹកដីក្រុម Chelsea គឺជា «លទ្ធផលដ៏គួរឲ្យខ្ពើម» សម្រាប់ក្រុម Manchester United ប៉ុន្តែ មិនបានបន្ថែមភ្លើងទៅលើជម្លោះមួយរវាងកីឡាករ និងបុគ្គលិករបស់ក្រុមទាំង២ ក្រោយពីគ្រាប់បាល់បញ្ចូលទីរបស់ខ្សែបម្រើ Ross Barkley ឡើយ។
លោក Mourinho ត្រូវបានរារាំងដោយបុគ្គលិកលើទីលានប្រកួត នៅពេលដែលសមាជិកម្នាក់ក្នុងចំណោមសមាជិកគ្រូបង្វឹករបស់លោក Maurizio Sarri នៃក្រុម Chelsea គឺលោក Marco Ianni បានរត់ពីមុខគ្រូបង្វឹកសញ្ជាតិព័រទុយហ្គាល់រូបនេះ ដើម្បីអបអរ ខណៈដែលក្រុមម្ចាស់ផ្ទះបានសង្គ្រោះកំណត់ត្រាមិនស្គាល់ចាញ់ ក្រោមការដឹកនាំរបស់លោក Sarri។
បន្ទាប់មក អ្នកចាត់ការទូទៅរបស់ក្រុម Man United រូបនេះ ក៏បានធ្វើកាយវិការជាមួយនឹងការលើកម្រាម៣ទៅកាន់អ្នកគាំទ្ររបស់ Chelsea ផងដែរ ដើម្បីចង់បង្ហាញពីការឈ្នះពានក្របខ័ណ្ឌ Premier League ដែលលោកបានជួយឲ្យក្លិបនេះឈ្នះ ក្នុងការដឹកនាំ២លើករបស់លោក។
ខ្សែបម្រើអង់គ្លេស Ross Barkley របស់ Chelsea ដណ្តើមបាល់ជាមួយនឹងខ្សែបម្រើអេស្ប៉ាញ Ander Herrera (ស្តាំ) របស់ក្រុម Manchester United។ AFP
លោក Mourinho បានឲ្យដឹងថា៖ «ខ្ញុំមិនបានទទួលនូវការគោរពត្រឡប់មកវិញពីអ្នកគាំទ្ររបស់ Chelsea ឡើយ ប៉ុន្តែ នោះមិនមែនជាការទទួលខុសត្រូវរបស់ខ្ញុំឡើយ»។
លោក Sarri បានបញ្ជាក់ថា លោកបានរួមដំណើរជាមួយនឹងលោក Ianni បន្ទាប់ពីការប្រកួតនេះ ដើម្បីសុំការអភ័យទោសទៅកាន់លោក Mourinho។
គ្រូបង្វឹកសញ្ជាតិអ៊ីតាលីរូបនេះបានឲ្យដឹងថា៖ «ក្រោយពីការប្រកួតនេះ ខ្ញុំបាននិយាយជាមួយនឹងលោក Joseh ហើយខ្ញុំយល់ឃើញថា យើងជាអ្នកខុស»៕ IS
