ក្រុងសឺវិល: លោក Gareth Southgate ជឿជាក់ថា តំបន់ប្រយុទ្ធរបស់ក្រុមបាល់ទាត់ជម្រើសជាតិអង់គ្លេស បានវាយឆ្លើយតបទៅនឹងការរិះគន់ផ្សេងៗ កាលពីថ្ងៃចន្ទ តាមរយៈការស៊ុតបាល់បញ្ចូលទី៣គ្រាប់ក្នុងការបង្ហាញពីទម្រង់លេងដ៏រំភើបមួយក្នុងតង់ទី១ពេលប្រកួតជាមួយនឹងក្រុមជម្រើសជាតិអេស្ប៉ាញ។
ខ្សែប្រយុទ្ធ Raheem Sterling បានស៊ុតបាល់បញ្ចូលទី២គ្រាប់នៅចន្លោះគ្រាប់បាល់របស់ខ្សែប្រយុទ្ធ Marcus Rashford ស្របពេលដែល Harry Kane ក៏បានបង្ហាញពីទម្រង់លេងដ៏ល្អផងដែរ តាមរយៈការបញ្ជូនបាល់ដ៏ល្អចំនួន២លើក ក្នុងពេលក្រុមខ្លួនយកឈ្នះ ៣-២ ក្នុងទីក្រុង Seville។
ក្រុមជម្រើសជាតិអេស្ប៉ាញ មិនធ្លាប់បានរបូតគ្រាប់បាល់៣គ្រាប់ក្នុងការប្រកួតលើទឹកដីខ្លួនឯងឡើយ នៅមុនពេលបញ្ចប់តង់ទី១ឡើយ ហើយបើទោះបីខ្សែបម្រើ Paco Alcacer បានវាយបក១គ្រាប់វិញក៏ដោយ ប៉ុន្តែ ជ័យជម្នះរបស់អង់គ្លេស ត្រូវបានធ្វើឲ្យមានសុវត្ថិភាព នៅត្រឹមពេលដែលខ្សែការពារ Sergio Ramos តែតបាល់បញ្ចូលទីនៅវិនាទីចុងក្រោយ។
Sterling, Rashford និង Kane សុទ្ធសឹងបានប្រឈមមុខនឹងការរិះគន់ជាច្រើនក្នុងរយៈពេលប៉ុន្មានសប្តាហ៍ថ្មីៗនេះ។
Sterling មិនបានរកគ្រាប់បាល់ឲ្យក្រុមអង់គ្លេសសោះ ក្នុងរយៈពេល៣ឆ្នាំ ពោលគឺ១១០២ថ្ងៃ ខណៈដែលការមិនអាចរកបានគ្រាប់បាល់ក្នុងការប្រកួតអន្តរជាតិរបស់ Kane បច្ចុប្បន្ន បន្តរហូតដល់៧ប្រកួត។
នៅខណៈនោះផងដែរ Rashford ត្រូវបានស្តីបន្ទោសចំពោះការខ្ជះខ្ជាយឱកាសមាស២លើកនៅពេលប្រកួតជាមួយនឹងក្រុមក្រូអាស៊ី កាលពីថ្ងៃសុក្រ។
លោក Southgate បានឲ្យដឹងថា៖ «កីឡាករទាំង៣នាក់ យល់ច្បាស់ពីសំណួរដែលត្រូវបានចោទសួរ ហើយកីឡាករទាំង៣ បានឆ្លើយតបជាមួយនឹងការបង្ហាញពីទម្រង់លេងកម្រិតកំពូល។ យើងអាចគ្រប់គ្រងបាល់ច្រើនជាងពួកគេ។ ល្បឿនរបស់ពួកគេពិតជាផ្តល់នូវការគំរាម ប៉ុន្តែ ការសម្រេចចិត្ត ការបញ្ជូនបាល់ និងការបញ្ចប់ សុទ្ធសឹងស្ថិតក្នុងកម្រិតកំពូល»៕ IS