.jpg)
ក្រុមសីដក់កម្ពុជា បានបង្ហាញទង់ជាតិ និងមេដាយប្រាក់ ដែលដណ្តើមបាន។ រូប CAMSOC
ភ្នំពេញ៖ ក្រុមល្បក្កតោកម្ពុជា បង្កើតបាននូវប្រវត្តិសាស្រ្តដ៏ថ្មីសន្លាងមួយនៅក្នុងការបង្ហាញវត្តមានជាលើកដំបូង ក្នុងព្រឹត្តិការណ៍ប្រកួតស៊ីហ្គេម នៅប្រទេស ហ្វីលីពីន ខណៈពួកគេបានបើកឆាកជាមួយការឈ្នះបានមេដាយប្រាក់ និងសំរឹទ្ធ កាលពីថ្ងៃអាទិត្យ ហើយក្រុមសីដក់ ក៏បានឈ្នះមេដាយប្រាក់ផងដែរ ចំណែកក្រុមបាល់ទាត់ជម្រើសជាតិកម្ពុជាអាយុក្រោម ២២ ឆ្នាំ នឹងបន្តប្រកួតជាមួយក្រុមខ្លាំងមីយ៉ាន់ម៉ា នៅយប់ថ្ងៃចន្ទនេះ។
គិតត្រឹមម៉ោង ៦ ល្ងាច កាលពីថ្ងៃអាទិត្យម្សិលមិញ ក្រុមល្បុក្កតោកម្ពុជាដែលបានចូលរួមប្រកួតលើប្រភេទកីឡា Arnis របស់ម្ចាស់ផ្ទះហ្វីលីពីននោះ ដណ្តើមបានមេដាយប្រាក់ ១ និងសំរឹទ្ធ ២ នៅក្នុងការប្រកួតវិញ្ញាសា Live Stick ដោយក្នុងនោះកីឡាករ យ៉ុង ម៉េងលី ជាអ្នកដណ្តើមបានមេដាយប្រាក់ ក្រោយរូបគេចាញ់ពិន្ទុកីឡាករម្ចាស់ផ្ទះហ្វីលីពីន នៅវគ្គផ្តាច់ព្រ័ត្រ។
ចំណែកមេដាយសំរឹទ្ធទាំង ២ រកបានដោយកីឡាករ សុខ ឈុន និងកីឡាករ ឌឹប ង៉ែត ប៉ុន្តែការឈ្នះត្រឹមមេដាយប្រាក់ និងសំរឹទ្ធនេះ នៅមិនទាន់ឈានដល់ការសម្រេចគោលដៅរបស់សហព័ន្ធកីឡាគុនល្បុក្កតោកម្ពុជានៅឡើយទេ ព្រោះពួកគេកំណត់ឈ្នះឲ្យបានមេដាយមាស ពីស៊ីហ្គេមលើកនេះ។ រីឯក្រុមកីឡាករសីដក់ បានឈ្នះមេដាយប្រាក់ ១ ខណៈប្រភេទកីឡាចំនួនចំនួនទៀត មានកីឡារាំ កាយសម្ព័ន្ធ បាល់ទះឆ្នេរខ្សាច់ វាយសី បាល់បោះ វិញ្ញាសា ៣x៣ ក៏ចាប់ផ្តើមប្រកួតជម្រុះ កាលពីម្សិលមិញនោះដែរ។
ដោយឡែកក្រុម U22 កម្ពុជា ដែលបានបើកឆាកជាមួយការស្មើជាមួយក្រុមម្ចាស់ផ្ទះហ្វីលីពីន ១-១ និងឈ្នះក្រុមទីម័រខាងកើត ៥-០ នោះ នឹងត្រូវប្រកួតជម្រុះលើកទី ៣ ជាមួយក្រុមមីយ៉ាន់ម៉ា នៅពហុកីឡដ្ឋាន Binan Football នាយប់ម៉ោង ៧ ថ្ងៃចន្ទនេះ ខណៈគ្រូបង្វឹកកម្ពុជាបានចាត់ទុក មីយ៉ាន់ម៉ា ជាក្រុមខ្លាំងមួយ ដែលពិបាកនឹងទប់ទល់។
យ៉ុង ម៉េងលី (ក្រហម) ពេលប្រកួតជាមួយកីឡាករម្ចាស់ផ្ទះហ្វីលីពីន។ CAMSOC
លោក Felix Dalmas គ្រូបង្វឹកក្រុមជម្រើសជាតិកម្ពុជា ធ្លាប់បានថ្លែងជុំវិញគុណភាពលេងរបស់ក្រុមមីយ៉ាន់ម៉ាយ៉ាងដូច្នេះថា៖ «យើងបានចាត់ទុក មីយ៉ាន់ម៉ាថា ជាក្រុមខ្លាំងមួយនៅក្នុងពូលនេះ ព្រោះការរៀបចំរបស់គេក៏ធ្វើបានល្អ ជាពិសេសគុណភាពដឹកនាំរបស់គ្រូបង្វឹក ហេតុនេះយើងគិតថា ការ-ជួបក្រុមមួយនេះអាចជាការប្រកួតប្រជែងមួយខ្ពស់»។
សម្រាប់ការប្រកួតជម្រុះ ៣ លើក ប្រចាំពូល A នេះ ក្រុមមីយ៉ាន់ម៉ា នៅមិនទាន់ ស្គាល់ការចាញ់នៅឡើយទេ ដោយពួកគេបានស្មើ ១-១ ជាមួយក្រុមម៉ាឡេស៊ី ក្នុងថ្ងៃបើកឆាក រួចបានបន្តឈ្នះក្រុមម្ចាស់ផ្ទះហ្វីលីពីន ២-១ និងឈ្នះទីម័រ ៣-១ ហើយលទ្ធផលនេះ បានជួយឲ្យពួកគេ កំពុងឈរនៅលេខ ១ ប្រចាំពូល A ជាបណ្តោះអាសន្ន ដោយមាន ៧ ពិន្ទុ។
យ៉ាងណាក៏ដោយ ឱកាសឡើងទៅវគ្គបន្តរបស់ក្រុមមីយ៉ាន់ម៉ា នឹងស្ថិតនៅក្នុងភាពស្រពេចស្រពិល បើសិនជាពួកគេ មិនអាចដណ្តើមបាន ៣ ពិន្ទុ ពីក្រុមកម្ពុជានៅថ្ងៃនេះ។ ចំណែកក្រុមកម្ពុជា ក៏ត្រូវការឈ្នះជាចាំបាច់ផងដែរ ព្រោះជ័យជម្នះលើក្រុមមីយ៉ាន់ម៉ា នឹងធ្វើឲ្យពួកគេមានភាគរយខ្ពស់បំផុត ក្នុងការទទួលបានឱកាសឡើងទៅវគ្គពាក់កណ្តាលផ្តាច់ព្រ័ត្រជាប្រវត្តិសាស្រ្ត ខណៈការជួបគ្នា ៧ លើក ការប្រកួតស៊ីហ្គេមនេះ ក្រុមកម្ពុជាបានឈ្នះ ១ ស្មើ ២ និងចាញ់មីយ៉ាន់ម៉ាចំនួន ៤ ដង៕
