.jpg)
កីឡាករ ឌឹម ង៉ែត និង មឿន ប៊ុនលី ដែលជាអ្នកចេញផ្សព្វផ្សាយគុនល្បុក្កតោ នៅកូរ៉េលើកនេះ។ សហការី
ភ្នំពេញៈ កីឡាករជម្រើសជាតិល្បុក្កតោ ២ នាក់បានចេញទៅបង្ហាញ និងផ្សព្វផ្សាយក្បាច់គុនល្បុក្កតោជាអត្តសញ្ញាណជាតិក្នុងព្រឹត្តិការណ៍កីឡាយុទ្ធសិល្ប៍អន្តរជាតិនៅកូរ៉េខាងត្បូងរយៈពេល ៣ ខែតាមការអញ្ជើញរបស់អង្គការ UNESCO ហើយនេះជាព្រឹត្តិការណ៍ពិសេសដែលកម្ពុជាធ្លាប់បានចូលរួមតាំងពីឆ្នាំ ២០០៩ ព្រោះល្បុក្កតោជាប្រភេទកីឡាបែបបុរាណ និងប្រពៃណី ដែលគេស្គាល់ច្រើនបំផុតនៅលើពិភពលោក។
លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា និងជាអនុប្រធានសហព័ន្ធកីឡាល្បុក្កតោកម្ពុជាបានថ្លែងប្រាប់ថា៖ «អង្គការកីឡាយុទ្ធសីល្ប៍ពិភពលោកមួយដែលមានជនជាតិកូរ៉េជាអ្នកបង្កើតត្រូវបានទទួលស្គាល់ពីអង្គការ UNESCO ដោយបានចងក្រងប្រមូលនូវប្រភេទកីឡាចំណាស់ៗមានលក្ខណៈប្រពៃណីនៅលើពិភពលោក ដើម្បីអប់រំផ្សព្វផ្សាយ និងអភិរក្ស»។
លោកបន្ថែមថា៖ «កីឡាល្បុក្កតោកម្ពុជាបានចូលរួមជាលើកដំបូងកាលពីខែកញ្ញា ឆ្នាំ ២០០៩ ហើយក៏ធ្លាប់ទទួលបានចំណាត់ថ្នាក់ល្អជូនជាតិផងដែរ ព្រោះថាល្បុក្កតោកម្ពុជាធ្លាប់បញ្ជូនអត្តពលិកទៅចូលរួមច្រើនលើកមកហើយ ដែលក្នុងនោះកម្មវិធីតម្រូវឲ្យសម្តែងដាក់ពិន្ទុ និងវាយតម្លៃពីគណៈកម្មការរៀបចំ»។
ចំណែកលោក អ៊ូ តារា អគ្គលេខាធិការសហព័ន្ធកីឡាល្បុក្កតោកម្ពុជាបានប្រាប់ភ្នំពេញប៉ុស្តិ៍ថា៖ «កម្មវិធីនេះរៀបចំដោយ The MBC Arts Co.LTD ដោយមានការឧបត្ថម្ភគាំទ្រការហូបចុក ស្នាក់នៅ និងសំបុត្រយន្តហោះរបស់អង្គការ UNESCO ក្នុងគោលបំណងលើកតម្កើងក្បាច់គុនបុរាណដែលមានវប្បធម៌ ច្បាស់លាស់ និងដើម្បីពង្រឹងចំណងមិត្តភាព និងកិច្ចសហប្រតិបត្តិការនៃវប្បធម៌ និងសិល្បៈក្បាច់គុនរបស់ប្រទេសដែលចូលរួមពិសេសគឺការធ្វើឲ្យប្រសើរឡើងនៃសន្តិភាពអន្តរជាតិតាមរយៈសិល្បៈក្បាច់គុនជាមួយនឹងការអភិវឌ្ឍប្រកបដោយនិរន្តរភាព»។
គួរបញ្ជាក់ថាកីឡាករ មឿន ប៊ុនលី និង ឌឹប ង៉ែត នៃក្រុមជម្រើសជាតិល្បុក្កតោជាបេក្ខភាពដែលត្រូវបានបញ្ជូនឲ្យទៅប្រទេសកូរ៉េខាងពីចុងសប្តាហ៍នេះ ដើម្បីបង្ហាញ និងផ្សព្វផ្សាយក្បាច់គុនល្បុក្កតោរយៈពេល ៣ ខែលើកនេះ ហើយពួកគេក៏ត្រូវធ្វើការប្រកួតប្រជែងរកមេដាយជាមួយក្រុមអត្តពលិកនៃប្រភេទកីឡាអត្តសញ្ញាណជាតិរបស់ប្រទេសមួយចំនួនទៀតផងដែរមុនពេលពួកគេវិលមកចូលរួមហ្វឹកហាត់ក្នុងការប្រមូលផ្តុំរបស់មជ្ឈមណ្ឌលជាតិហ្វឹកហ្វឺនកីឡារបស់ក្រសួងអប់រំ យុវជន និងកីឡាវិញ។
សម្រាប់ប្រភេទកីឡាបុរាណ និងប្រពៃណីដែលដាក់មកសម្តែងក្នុងព្រឹត្តិការណ៍កីឡាយុទ្ធសិល្ប៍អន្តរជាតិត្រូវបានលោក អ៊ូ តារា ប្រាប់ឲ្យដឹងថា មានកីឡាតេក្វាន់ដូ Taekkyeon និង Muyeo24 Ban របស់ម្ចាស់ផ្ទះកូរ៉េ កីឡា Capoeira របស់ប្រេស៊ីល កីឡាវូស៊ូ របស់ប្រទេសចិន កីឡា Silat របស់ម៉ាឡេស៊ី កីឡា Arnis របស់ប្រទេសហ្វីលីពីន និងគុនល្បុក្កតោរបស់កម្ពុជា៕
