ភ្នំពេញៈ សហព័ន្ធកីឡាវាយកូនគោលកម្ពុជាបានប្រកាសពីភាពជោគជ័យនៃលទ្ធផលដែលទទួលបានពីការប្រកួតកីឡាវាយកូនគោល «ពានរង្វាន់សម្តេចក្រឡាហោម ស ខេង» ហើយបានចាត់ទុកការប្រកួតដែលទទួលបានការអនុញ្ញាតឲ្យរៀបចំពីលោកឧបនាយករដ្ឋមន្ត្រី ស ខេង មួយនេះថាជាព្រឹត្តិការណ៍ប្រវត្តិសាស្ត្រធំមួយក្នុងវិស័យកីឡាវាយកូនគោលនៅកម្ពុជា។
លោក ជា បូរ៉ា រដ្ឋលេខាធិការក្រសួងទេសចរណ៍ និងជាអគ្គលេខាធិការសហព័ន្ធកីឡាវាយកូនគោលកម្ពុជាបានថ្លែងក្នុងពិធីបិទការប្រកួតដែលយកមកធ្វើនៅសណ្ឋាគារសុខាកាលពីយប់ថ្ងៃអាទិត្យថា៖ «ការរៀបចំការប្រកួតកីឡាវាយកូនគោលពានរង្វាន់សម្តេចក្រឡាហោម ស ខេង នាឱកាសនេះបានប្រព្រឹត្តទៅយ៉ាងរលូនមានតម្លាភាព និងសុក្រឹតភាព ក្រោមបរិយាកាសប្រកបដោយភាពកក់ក្តៅ ស្និទ្ធស្នាល និងពោរពេញដោយក្ដីសោមនស្ស រីករាយបំផុត»។
លោកបន្តថា៖ «នេះជាព្រឹត្តិការណ៍ប្រវត្តិសាស្ត្រមួយក្នុងវិស័យកីឡាវាយកូនគោលកម្ពុជាដែលបានរៀបចំជាលក្ខណៈទ្រង់ទ្រាយធំ និងមានអត្ថន័យ ខ្លឹមសារដ៏ប្រពៃក្នុងគោលបំណងបង្កើនស្មារតីមិត្តភាព សាមគ្គីភាព និងភាតរភាពរវាងថ្នាក់ដឹកនាំកំពូលៗជាមួយ ឯកឧត្តម លោកឧកញ៉ា លោក លោកស្រី ព្រមទាំងចូលរួមចលនាផ្សព្វផ្សាយអំពីកីឡាទេសចរណ៍ដល់ភ្ញៀវទេសចរជាតិ អន្តរជាតិ ដែលមកទស្សនាកម្សាន្តនៅព្រះរាជាណាចក្រកម្ពុជា និងជាពិសេសដើម្បីចូលរួមអបអរសាទរទិវាខួបរំឭកអនុស្សាវរីយ៍លើកទី ៧៤ ថ្ងៃកំណើតកងកម្លាំងនគរបាលជាតិកម្ពុជា»។
តាមរយៈការប្រកួតត្រឹម ១ ថ្ងៃនៅទីលានវាយកូនគោល ហ្គ្រែនភ្នំពេញកាលពីថ្ងៃអាទិត្យនោះគឺមានកីឡាករ កីឡា ការិនីជាតិ និងអន្តរជាតិចូលរួមជិត ២០០ នាក់ ហើយថ្នាក់ដឹកនាំកំពូលៗរបស់កម្ពុជាមួយចំនួនក៏បានចូលរួមប្រកួតប្រជែងផងដែរ ខណៈការប្រកួតត្រូវបានបែងចែកជា ៣ ផ្នែកគឺការប្រកួតជាក្រុមដែលមានអ្នកចូលរួម ៧២ នាក់ ប្រកួតជាឯកត្តជនមានអ្នកចូលរួម ៨៦ នាក់ និងការប្រកួតនារីមានអ្នកចូលរួម ២១ នាក់។
ជាមួយគ្នានោះគណៈកម្មការរៀបចំការប្រកួតរបស់សហព័ន្ធកីឡាវាយកូនគោលកម្ពុជាបានធ្វើការបូកសរុបពិន្ទុទៅតាមផ្នែកនីមួយៗយ៉ាងច្បាស់លាស់ និងមានការផ្តល់ពាន និងប្រាក់រង្វាន់ទៅដល់ម្ចាស់ជយលាភីនីមួយៗផងដែរ ហើយអ្វីដែលធ្វើឲ្យអ្នកចូលរួមមានការចាប់អារម្មណ៍ខ្លាំងនោះគឺថ្នាក់ដឹកនាំទាំង ៣ រូបដែលមានងារជា «សម្តេច» ក៏បានឈ្នះពាននៅក្នុងការប្រកួតនោះផងដែរ។
តាមលទ្ធផលរបស់គណៈកម្មការគឺសម្តេចក្រឡាហោម ស ខេង ព្រមទាំងលោកឧកញ៉ា សុខ ហុង និងលោកឧកញ៉ា ឈុន អូន បានឈ្នះពានលេខ ១ លើវិញ្ញាសាលេងជាក្រុម ឯសម្តេចពិជ័យសេនា ទៀ បាញ់ ឧបនាយករដ្ឋមន្ត្រីរដ្ឋមន្ត្រីក្រសួងការពារជាតិរួមជាមួយលោក ឥត សារ៉ាត់ លោក អ៊ុក កោសា បានលេខ ២ ហើយសម្តេចវិបុលសេនាភក្ដី សាយ ឈុំ ប្រធានព្រឹទ្ធសភាកម្ពុជា លោក ជា សុផារ៉ា និងលោក អ៊ុក សាវុធ បានលេខ ៣។
ជាមួយគ្នានេះសហព័ន្ធកីឡាវាយកូនគោលកម្ពុជាដែលមានលោក ទៀ បាញ់ ជាប្រធានក៏បានចាត់ទុកព្រឹត្តិការណ៍នេះជាការរួមចំណែកលើកកម្ពស់ និងធ្វើឲ្យវិស័យកីឡាវាយកូនគោលកម្ពុជាមានការរីកចម្រើន ដើម្បីត្រៀមឆ្ពោះទៅកាន់ការប្រកួតស៊ីហ្គេមឆ្នាំ ២០២៣ នៅកម្ពុជាផងដែរ។
លោក ជា បូរ៉ា បញ្ជាក់ថា៖ «បច្ចុប្បន្នសហព័ន្ធកំពុងរៀបចំខ្លួនកសាងសមត្ថភាព និងគុណផលកីឡាឲ្យបានល្អរឹងមាំស្របតាមផែនការ កែទម្រង់ និងផែនការយុទ្ធសាស្ត្រ ៤ ឆ្នាំ រំកិល របស់គណៈកម្មាធិការជាតិអូឡាំពិកកម្ពុជាគឺកម្ពុជាឆ្ពោះទៅរកគុណផលកីឡាកម្រិតខ្ពស់។ ក្នុងន័យនេះខ្ញុំបាទសង្ឃឹមជឿជាក់ថានាថ្ងៃអនាគតកីឡាវាយកូនគោលកម្ពុជានឹងមានការរីកចម្រើនឆ្ពោះទៅកាន់ភាពជោគជ័យក្នុងការប្រកួតកីឡាស៊ីហ្គេមក្នុងឆ្នាំ ២០២៣ ខាងមុខ»៕