ភ្នំពេញ៖ ការប្រកួតកីឡាវាយកូនឃ្លីលើតុជ្រើសរើសជើងឯក ប្រចាំឆ្នាំ ២០១៩ ដែលលើកយកមកធ្វើ នៅឆ្នាំ ២០២០ ហើយបានបញ្ចប់កាលពីល្ងាចថ្ងៃអង្គារកន្លងមកនេះ បានបង្ហាញឲ្យឃើញពីការធ្លាក់ចុះនូវបរិមាណកីឡាករ កីឡាការិនី ដែលបានចូលរួមប្រកួត ប៉ុន្តែម្ចាស់ជយលាភី ពីការប្រកួតលើកនេះ បែរជាទទួលបាននៅភាពសប្បាយរីករាយ ជាមួយនឹងប្រាក់រង្វាន់ដែលមានការកើនឡើងជាងការប្រកួតមុន។
លោក ស៊ុន សុទ្ធារិទ្ធ ដែលទើបត្រូវបានអញ្ជើញឲ្យមកធ្វើជាអគ្គលេខាធិការសហព័ន្ធកីឡាវាយកូនឃ្លីលើតុកម្ពុជាជាថ្មី ក្រោយពីលោកបានលាឈប់អស់រយៈពេលជាង ៤ ឆ្នាំនោះ បានប្រាប់ភ្នំពេញប៉ុស្តិ៍កាលពីថ្ងៃពុធថា៖ «ការរៀបចំនូវរចនាសម្ព័ន្ធថ្មីនេះ វាល្អហើយ ប៉ុន្តែចំនួនអត្តពលិកចូលរួមនៅមានភាពខ្សត់ខ្សោយ ជាងពេលដែលខ្ញុំនៅកាន់ជាអគ្គលេខាធិការកន្លងមក ហេតុនេះយើងនឹងខិតខំបំផុស ដើម្បីឲ្យបរិមាណចូលរួមលើប្រភេទកីឡានេះមានការកើនឡើងវិញ»។
បើតាមរបាយការណ៍របស់គណៈកម្មការរៀបចំការប្រកួតបានឲ្យដឹងថា ការប្រកួតកីឡាវាយកូនឃ្លីលើតុជ្រើសរើសជើងឯកឆ្នាំ ២០១៩ មានអត្តពលិកចូលរួមត្រឹម ៧៩ នាក់ ដោយក្នុងនោះ ការប្រកួតក្របខ័ណ្ឌក ១ មានកីឡាករ ៥៦ នាក់ ហើយក្របខ័ណ្ឌក ២ មានអត្តពលិក ២៣ នាក់ (ស្រី ១៤ នាក់)។
ជាមួយគ្នានេះ តាមរយៈការប្រកួតចំនួន ៦ ថ្ងៃ នៅសាលដំបូលទូក នៃពហុកីឡដ្ឋានជាតិ ដែលបានបញ្ចប់កាលពីល្ងាចថ្ងៃអង្គារនោះ ក្រុមអត្តពលិកទាំង ៥ នាក់ មកពីក្លិបក្រសួងមហាផ្ទៃ បានឈ្នះមេដាយមាសទាំងការប្រកួតជាក្រុម វាយគូ និងឯកត្តជន នៃក្របខ័ណ្ឌក ១ ហើយពួកគេ ក៏ដណ្តើមបានមេដាយប្រាក់ ២ និងសំរឹទ្ធចំនួន ២ ទៀតផងដែរ ដោយក្នុងនោះកីឡាករ សឺង តុលា ឈ្នះបានមេដាយមាស ៣ តែម្នាក់ឯង ឯ ឡាយ ភក្តី បានមាស ២ ណៃ សារ៉ាវ័យ បានមាស ១ មេដាយប្រាក់ ២ កីឡាករ សារៈ ស៊ូព្រីង បានមាស ១ ប្រាក់ ១ សំរឹទ្ធ ១ ហើយ ប៊ុន វិសាល បានមាស ១ និងសំរឹទ្ធ ១។
ការឈ្នះបានមេដាយមាស ៣ ប្រាក់ ២ និងសំរឹទ្ធ ២ នេះ បានជួយឲ្យក្រុមក្រសួងមហាផ្ទៃឈរនៅចំណាត់ថ្នាក់លេខ ១ ក្នុងនាមជាអ្នកឈ្នះបានមេដាយមាសច្រើនជាងគេ ក្នុងការប្រកួតកីឡាវាយកូនឃ្លីលើតុថ្នាក់ជាតិលើកនេះ ខណៈក្រុមអត្តពលិក All Star បានឈរលេខ ២ ដោយដណ្តើមបានមេដាយមាស ២ ប្រាក់ ២ និងសំរឹទ្ធ ៣ ពីការប្រកួតទាំង ៣ វិញ្ញាសា លើក្របខ័ណ្ឌក ២ មានឯកត្តជនយុវជន ឯកត្តជនយុវនារី និងប្រកួតគូយុវជន។
ចំណែកក្រុមអត្តពលិករបស់ក្រុមខេត្តកំពតបានឈរនៅចំណាត់ថ្នាក់លេខ ៣ ដោយដណ្តើមបានមេដាយមាស ១ ប្រាក់ ១ ហើយក្លិបសាន់នីព្រីងធីងសឺវីស ដណ្តើមបានមេដាយប្រាក់ ១ តាមពីក្រោយក្លិបអន្តរជាតិអាមេរិកកាំង ដែលបានមេដាយសំរឹទ្ធ ២ ហើយក្លិបក្រុមហ៊ុនទេសចរណ៍កម្ពុជា, រដ្ឋសភាសែនជ័យ, ដើមមៀន, សន្ធរមុខថ្មី និងក្លិបក្រុមហ៊ុនអេលីហ្សាមហាលាភ ដណ្តើមបានមេដាយសំរឹទ្ធ ១ ដូចគ្នា ប៉ុន្តែក្លិបខេត្តព្រះសីហនុ ក្លិប City Sport ក្លិបក្រុមហ៊ុនអិនធិស្ពែត និងក្លិបមិត្តសំឡាញ់ មិនដណ្តើមបានមេដាយទេ។
ជុំវិញស្ថានភាពទូទៅនៅក្នុងពិធីបំពាក់មេដាយ និងផ្តល់ប្រាក់រង្វាន់ លោក ស៊ុន សុទ្ធារិទ្ធ បន្ថែមថា៖ «កីឡាករ កីឡាការិនីរបស់យើង មានការសប្បាយចិត្ត ដោយសារទើបទទួលបានប្រធានសហព័ន្ធថ្មី គឺឯកឧត្តមនាយឧត្តមសេនីយ៍ គៀត ច័ន្ទថារិទ្ធ ដែលមានការដឹកនាំគួរឲ្យសរសើរ និងមានការឧបត្ថម្ភច្រើន ហើយឯកឧត្តមបានចំណាយថវិកាផ្ទាល់ខ្លួន ១ ពាន់ដុល្លារ ដើម្បីផ្តល់ជាប្រាក់រង្វាន់ បន្ថែមទៅលើថវិការរបស់ក្រសួងអប់រំ អ៊ីចឹងហើយគ្រាន់តែ សឺង តុលា ម្នាក់ឯងបានទទួលប្រាក់រង្វាន់សរុបជាង ៦ លានរៀល»៕