.jpg)
ខ្សែប្រយុុទ្ធ កែវ សុខផេង របស់វិសាខា ពេលប្រជែងជាមួយ ឈិន ឈឿន របស់ទ័ព កន្លងមក។ ស្រេង ម៉េងស្រ៊ុន
ភ្នំពេញៈ ក្រុមវិសាខា បានបង្ហាញពីមហិច្ឆតាកាន់តែខ្ពស់ ក្នុងការប្រជែងយក ៣ ពិន្ទុជាមួយក្រុមស្រេកឃ្លានការឈ្នះដាច់ខាត ណាហ្គាវើល សម្រាប់ការវិលមកជួបគ្នាជើងទី ២ លីកកំពូលកម្ពុជា ឆ្នាំ ២០១៨ ចុងសប្តាហ៍នេះ ហើយការទាមទារយក ៣ ពិន្ទុរបស់ក្រុមទាំង ២ នេះ អាចនឹងជួយឲ្យក្រុមបឹងកេត ទទួលបានផលប្រយោជន៍ ក៏ថាបាន។
ជ័យជម្នះរបស់ក្រុមវិសាខា ៣-០ លើណាហ្គាវើល កាលពីជើងទី ១ បានធ្វើឲ្យលោក មាស ចាន់ណា ជាគ្រូបង្វឹក ចាត់ទុកការប្រកួតនេះ ជាជំនួបកាត់សេចក្តីយ៉ាងសំខាន់ ព្រោះបើសិនជា ណាហ្គា អាចដណ្តើមបាន ៣ ពិន្ទុ លើកនេះ ណាហ្គាវើល នឹងមានភាគរយខ្ពស់បំផុត ក្នុងការលើកពាន ព្រោះពេលនេះណាហ្គា មាន ៥០ ពិន្ទុ តាមពីក្រោមដោយបឹងកេត មាន ៤៨ ពិន្ទុ និងវិសាខា មាន ៤៥ ពិន្ទុ។
លោក មាស ចាន់ណា ធ្លាប់បានប្រាប់ភ្នំពេញ ប៉ុស្តិ៍ថា៖ «ការប្រកួតដែលនៅសេសសល់ សុទ្ធតែមានភាពតានតឹង ជាពិសេសការជួបក្រុមវិសាខា ព្រោះក្រុមនេះមានទម្រង់លេងល្អ»។
យ៉ាងណាក៏ដោយ ការយកឈ្នះក្រុមក្រសួងការពារជាតិ ២-០ កាលពីសប្តាហ៍មុន បានធ្វើឲ្យគ្រូបង្វឹកលោក មាស ចាន់ណា មានរំពឹងដល់ ៨០ ភាគរយហើយក្នុងការអាចឈ្នះលើកពាន ក្នុងរដូវកាលនេះ ដោយលោកបានបញ្ជាក់ថា៖ «យើងត្រូវតែពង្រឹងគុណភាពលេងបន្ថែមទៀត ដើម្បីជួបក្រុមវិសាខា»។
យ៉ាងណាក៏ដោយ ក្តីរំពឹងឆ្ពោះទៅលើកពានរបស់ក្រុមណាហ្គាកំពុងតែស្ថិតនៅក្នុងភាពស្រពេចស្រពិល ព្រោះវិសាខា ក៏មានមហិច្ឆតាចង់ឈ្នះ ៣ ពិន្ទុ ដើម្បីប្រជែងឡើងទៅលេខ ២ ឬលេខ ១ ផងដែរ។ លោក ហុក សុជីវ័ន គ្រូបង្វឹកក្រុមវិសាខា បានប្រាប់កាលពីម្សិលមិញថា៖ «គេក៏ចង់ឈ្នះ យើងក៏ចង់ឈ្នះដូចគ្នា។ ទោះបីពេលនេះ យើងឈរនៅលេខ ៣ ប៉ុន្តែ ២ ប្រកួតនេះ សុទ្ធតែមានភាពតានតឹងដូចគ្នា អ៊ីចឹងយើងចង់ឈ្នះ ដើម្បីយើងអាចមានឱកាសប្រជែងឡើងទៅចំណាត់ថ្នាក់លេខ ២ ឬលេខ ១»។
លោក ហុក សុជីវ័ន បានបន្តថា៖ «យើងមិនអាចវាយតម្លៃពីលទ្ធផលទុកមុនបានទេ ព្រោះគេក៏តាមដានការប្រកួត រកចំណុចខ្សោយរបស់យើង ហើយយើងក៏ធ្វើបែបនេះដូចគ្នា អ៊ីចឹងសំខាន់ វាអាស្រ័យទៅលើការរៀបចំពេលប្រកួតជាក់ស្តែង។ យើងផ្តោតខ្លាំងទៅលើការប្រកួត ព្រោះនេះជាជំនួបសំខាន់ ដោយយើងត្រូវប៉ះក្រុមដែលមិនទាន់ចាញ់សោះ ក្នុង ជើងទី ២ នេះ អ៊ីចឹងយើងត្រូវតែមានការប្រុងប្រយ័ត្នឲ្យបានខ្ពស់ ដោយសារយើងត្រូវការឈ្នះ»។
ជាមួយគ្នានេះ ក្រុមបឹងកេត អាចនឹងទទួលបានប្រយោជន៍ ចំពោះការប្រជែងគ្នាយក ៣ ពិន្ទុរវាងក្រុមណាហ្គាវើល និងវិសាខា លើកនេះ ព្រោះបើសិនជា ណាហ្គា ចាញ់ វិសាខា គឺបឹងកេត នឹងមានសង្ឃឹម ក្នុងការដណ្តើមយកលេខ ១ ពីណាហ្គាវើល មកវិញ ខណៈការប្រកួតលើកនេះ បឹងកេត ត្រូវទៅជួបក្រុមម្ចាស់ផ្ទះ អង្គរថាយហ្គឺរ ដែលពួកគេធ្លាប់លត់ ៤-០ កាលពីជើងទី ១។
ចំណែកក្រុមកំពុងឈរនៅលេខ ៣ មាន ៣៩ ពិន្ទុ ក្រសួងការពារជាតិ (ទ័ព) នឹងត្រូវស្វាគមន៍ ក្រុមព្រះខ័នរាជស្វាយរៀង ដែលពួកគេធ្លាប់ឈ្នះ ២-១ ទាំងចម្រូងចម្រាសកាលពីជើងទី ១។ ការប្រកួតនេះ លោកភា សុភ័ក្ត្រា គ្រូបង្វឹកក្រុមទ័ព បានប្រាប់ថា លោកនឹងកាត់បន្ថយកីឡាករបរទេស ដោយដាក់ឲ្យកីឡករខ្មែរលេងនៅតំបន់កណ្តាល ដើម្បីពង្រឹងគុណភាពពួកគេ ត្រៀមការប្រកួតផ្តាច់ព្រ័ត្រពានរង្វាន់ ហ៊ុន សែន ជាមួយក្រុមប៉ូលិស។
ជាមួយគ្នានេះ ក្រុមសូលទីឡូអង្គរ ត្រូវស្វាគមន៍ក្រុមអគ្គិសនីកម្ពុជា ដែលពួកគេធ្លាប់ឈ្នះ ៣-០ កាលជើងទី ១ ហើយប៉ូលិស និងក្រុមអាស៊ីអឺរ៉ុប ត្រូវវិលមកជួបគ្នា ដើម្បីជម្រះភាពមន្ទិលនៃការស្មើគ្នា ១-១ ឯក្រុមភ្នំពេញក្រោន ត្រូវទទួលភ្ញៀវក្រុមវេស្ទើន ដែលពួកគេធ្លាប់បានយកឈ្នះ ១-០ កាលពីប្រកួតជើងទី ១៕
កម្មវិធីប្រកួតនៅថ្ងៃសៅរ៍
-សូលទីឡូអង្គរ v អគ្គិសនីកម្ពុជា កីឡដ្ឋានសៀមរាប ១៥:៣០
-ប៉ូលិស v អាស៊ីអឺរ៉ុប ពហុកីឡដ្ឋានជាតិ ១៨:០០
-ទ័ព v ស្វាយរៀង កីឡដ្ឋានស្តាតចាស់ ១៨:០០
៣ ប្រកួតនៅថ្ងៃអាទិត្យ
-អង្គរថាយហ្គឺរ v បឹងកេត កីឡដ្ឋានសៀមរាប ១៥:៣០
-ភ្នំពេញក្រោន v វេស្ទើន កីឡដ្ឋាន RSN ១៨:០០
-វិសាខា v ណាហ្គាវើល កីឡដ្ឋានស្តាតចាស់ ១៨:០០
