ភ្នំពេញៈ ក្រុមវិសាខា មិនហ៊ានមើលរំលង ពីសមត្ថភាពលេងរបស់ក្រុមភ្នំពេញក្រោននោះទេ បើទោះបីជាក្រុមទើបរៀបចំទម្រង់លេងថ្មីមួយនេះ ទើបចាញ់ក្រុមក្រសួងការពារជាតិ (ទ័ព) រហូតដល់ ៥-១ កាលពីសប្តាហ៍មុនក៏ដោយ។ រីឯក្រុមបឹងកេត និងណាហ្គាវើល ក៏ត្រូវបន្តប្រជែងរក ៣ ពិន្ទុ ដើម្បីដណ្តើមគ្នាយកតំបន់កំពូលតារាង ក្នុងការប្រកួតជើងទី ២ លីកកំពូលកម្ពុជា ឆ្នាំ ២០១៨ នៅថ្ងៃសៅរ៍ និងថ្ងៃអាទិត្យ ចុងសប្តាហ៍នេះផងដែរ។
ក្រុមវិសាខា និងភ្នំពេញក្រោន ធ្លាប់បានស្មើគ្នា ០-០ ក្នុងការប្រកួតជើងទី ១ ប៉ុន្តែសម្រាប់ការប្រកួតជើងទី ២ ចំនួន ២ លើកកន្លងមកនេះ វិសាខា ទទួលបានលទ្ធផលជាងក្រុមភ្នំពេញក្រោន ព្រោះវិសាខា បានលត់ក្រុមអគ្គិសនីកម្ពុជា ៤-០ និងបន្តឈ្នះក្រុមអង្គរថាយហ្គឺរ ៤-១ កាលពីសប្តាហ៍មុន ឯភ្នំពេញក្រោន បានឈ្នះក្រុមសូលទីឡូអង្គរ ២-១ ទាំងលំបាក តែបានមកចាញ់ក្រុមទ័ព រហូតដល់ ៥-១។
យ៉ាងណាក៏ដោយ លោក ហុក សុជីវ័ន គ្រូបង្វឹកក្រុមវិសាខា បានមើលឃើញថា ការវិលមកជួបក្រុមភ្នំពេញក្រោន លើកនេះ កូនក្រុមរបស់លោក បានជួបបញ្ហារឿងកម្លាំង ព្រោះពួកគេទើបវិលមកពីប្រកួតពានហ៊ុន សែន ជាមួយក្រុមព្រះខ័នរាជស្វាយរៀង នៅខេត្តស្វាយរៀង កាលពីម្សិលមិញ ហើយលោកមិនអាចយកការចាញ់របស់ភ្នំពេញក្រោន ពីសប្តាហ៍មុនមកប្រៀបធៀបនឹងការប្រកួតនេះទេ។
លោក សុជីវ័ន បានប្រាប់កាលពីម្សិលមិញថា៖ «ការធ្វើដំណើរមកប្រកួតនៅខេត្ត ក្នុងពានសម្តេចហ៊ុន សែន ធ្វើឲ្យយើងជួបការលំបាកលើការរៀបចំការហ្វឹកហាត់ គឺខុសពីភ្នំពេញក្រោន ដែលគេមានភាពងាយស្រួលជាងយើង ដោយសារគេប្រកួតនៅភ្នំពេញ អ៊ីចឹងកូនក្រុមរបស់យើង អាចប៉ះពាល់ដល់កម្លាំងបន្តិចបន្តួចផងដែរ»។
គ្រូបង្វឹករូបនេះបានបន្ថែមថា៖ «ទោះបីជាយ៉ាងណា ក៏ធ្វើអ្វីមួយ យើងត្រូវតែមានសង្ឃឹម ហើយយើងនឹងប្រឹងប្រែងធ្វើអ្វីមួយដែលល្អសម្រាប់ក្រុម ប៉ុន្តែយើងមិនអាចវាយតម្លៃថា ក្រុមភ្នំពេញក្រោន លេងអន់ជាងមុន ដោយសារចាញ់ក្រុមទ័ព ៥-១ នោះដែរ ព្រោះពី ១ ប្រកួតទៅ ១ ប្រកួត វាតែងមាន ការផ្លាស់ប្តូរ អ៊ីចឹងយើងត្រូវតែមាន ការប្រុងប្រយ័ត្នឲ្យបានខ្ពស់»។
ចំណែកក្រុមបឹងកេត ត្រូវវិលទៅជួបក្រុមប៉ូលិស ដែលពួកគេធ្លាប់ឈ្នះ ៥-១ ឯណាហ្គាវើល ប៉ះក្រុមអង្គរថាយហ្គឺរ ដែលពួកគេបានឈ្នះ ៣-០ កាលពីជើងទី ១។ បើមើលទៅលើសម្ទុះនៃការលេងរបស់បឹងកេត និងណាហ្គាក្នុងជើងទី ២ នេះ គឺក្រុមទាំង ២ នេះមានភាគរយខ្ពស់ ក្នុងការទទួលបាន ៣ ពិន្ទុបន្ថែម ព្រោះកម្រិតលេងរបស់ក្រុមប៉ូលិស និងអង្គរថាយហ្គឺរ ក្នុងជើងទី ២ នេះ ហាក់មានការធ្លាក់ចុះជាងជើងទី ១ ព្រោះកាលពីសប្តាហ៍មុន ប៉ូលិស បានចាញ់ក្រុមស្វាយរៀង ៤-០ ខណៈអង្គរថាយហ្គឺរ ចាញ់វិសាខា ៤-១។
ជាមួយគ្នានេះក្រុមទ័ព និងអាស៊ីអឺរ៉ុប ដែលទើបជួបគ្នាក្នុងពានរង្វាន់សម្តេចហ៊ុន សែន ក្នុងវគ្គ ១៦ ក្រុម ដោយទ័ព បានយកឈ្នះ ៣-១ នោះ ត្រូវវិលមកជួបគ្នា ក្នុងលីកកំពូល ចុងសប្តាហ៍នេះដែរ ខណៈជំនួបជើងទី ១ ទ័ពបានយកឈ្នះក្រុមអាស៊ីអឺរ៉ុប ២-១។ រីឯក្រុមស្វាយរៀង ត្រូវប៉ះក្រុមអគ្គិសនីកម្ពុជា ដែលពួកគេធ្លាប់ឈ្នះ ៥-១ ហើយវេស្ទើន ត្រូវប្រឈមនឹងក្រុមសូលទីឡូអង្គរ ដែលពួកគេបានចាញ់ ៤-១ កាលពីជើងទី ១៕
កម្មវិធីប្រកួតនៅថ្ងៃសៅរ៍
-ទ័ព v អាស៊ីអឺរ៉ុប កីឡដ្ឋានស្តាតចាស់ ម៉ោង ៦:០០ ល្ងាច
-ប៉ូលិស v បឹងកេត ពហុកីឡដ្ឋានជាតិ ម៉ោង ៦:០០ ល្ងាច
-សូលទីឡូអង្គរ v វេស្ទើន កីឡដ្ឋានខេត្តសៀមរាប ម៉ោង ៣:៣០រសៀល
៣ ប្រកួតនៅថ្ងៃអាទិត្យ
-អង្គរថាយហ្គឺរ v ណាហ្គាវើល កីឡដ្ឋាន ខេត្តសៀមរាប ម៉ោង ៣:៣០ រសៀល
-អគ្គិសនីកម្ពុជា v ស្វាយរៀង កីឡដ្ឋាន EDC ម៉ោង ៣:០០ រសៀល
-ភ្នំពេញក្រោន v វិសាខា កីឡដ្ឋាន RSN ម៉ោង ៦:០០ ល្ងាច