ក្រុងហាណូយ: គ្រាប់បាល់ បញ្ចូលទីនៅដើមតង់ទី ១ ពីខ្សែប្រយុទ្ធ Nguyen Anh Duc បានក្លាយជាគ្រាប់បាល់កាត់សេចក្តី ខណៈដែលក្រុមបាល់ទាត់ជម្រើសជាតិវៀតណាម បានផ្តួលក្រុមជម្រើសជាតិ ម៉ាឡេស៊ី ក្នុងលទ្ធផល ១-០ នាកីឡដ្ឋានជាតិ My Dinh កាលពីថ្ងៃសៅរ៍ ដើម្បីលើកពាន AFF Suzuki Cup ជាលើកទី ២។
ក្រុមជម្រើសជាតិវៀតណាម បានខ្ជះខ្ជាយគ្រាប់បាល់នាំមុខ ២ គ្រាប់ ដើម្បីបញ្ចប់ក្នុងលទ្ធផលស្មើ ២-២ ក្នុងការប្រកួតជើងទី ១ ក្នុងទីក្រុងគូឡាឡាំពួ កាលពីថ្ងៃអង្គារ សប្តាហ៍មុន ប៉ុន្តែ Anh Duc បានរក្សាការមានប្រៀបរបស់ក្រុមខ្លួន នៅពេលដែលរូបគេបានស៊ុតបាល់បំប៉ោងសំណាញ់ទីពីក្នុងប្រអប់គ្រោះថ្នាក់ ក្រោយពីលេងបានត្រឹមតែ ៦ នាទី។
អ្នកចាំទី Dang Van Lam បានសង្គ្រោះបាល់ល្អៗជាច្រើន ដើម្បីរក្សាការនាំមុខរបស់ក្រុមម្ចាស់ផ្ទះ ខណៈដែលពួកគេដណ្តើមបានជ័យជម្នះទាំង ២ ជើងក្នុងលទ្ធផល ៣-២ និងឈ្នះពានប្រចាំតំបន់អាស៊ីអាគ្នេយ៍ជាលើកទី ១ បើគិតចាប់តាំងពីឆ្នាំ ២០០៨ មក។
ក្រុមជម្រើសជាតិវៀតណាម បានមានប្រៀបរួចជាស្រេចជាមួយនឹងគ្រាប់បាល់ក្រៅដី ២ គ្រាប់ពីការប្រកួតជើងទី ១ ហើយពួកគេបានចាប់ផ្តើមយ៉ាងល្អក្នុងទីក្រុងណាណូយ តាមរយៈការរកគ្រាប់បាល់នាំមុខមុន នៅពេលដែលកីឡាករ Nguyen Quang Hai បានបញ្ជូនបាល់ទៅឲ្យ Anh Duc ដែលការស៊ុតដោយជើងឆ្វេងរបស់គេបានធ្វើឲ្យអ្នកចាំទី Farizal Marlias មិនអាចរុញបាល់ផុតសំណាញ់ទីឡើយ។
Mohamadou Sumareh ស្ទើរតែរកបានគ្រាប់បាល់តាមស្មើទៅហើយសម្រាប់ក្រុមម៉ាឡេស៊ី នៅនាទី ទី ១១ ខណៈដែលការឆ្កឹះបាល់ដោយប្រើកែងជើងរបស់គេបានរត់ខុសទីតែបន្តិចប៉ុណ្ណោះ ស្របពេលដែល Do Hung Dung គួរតែអាចរកបានគ្រាប់បាល់ ១ គ្រាប់ទៀតសម្រាប់ក្រុមម្ចាស់ផ្ទះនៅនាទី ទី ៣៣ ក្រោយពីរូបគេទទួលបានបាល់នៅជ្រុងម្ខាងនៃប្រអប់ទី ប៉ុន្តែ បានស៊ុតបាល់ខុសទី។
អ្នកចាំទី Van Lam ត្រូវបានដាក់ឲ្យចូលលេងនៅមុនពេលបញ្ចប់តង់ទី ១ ដើម្បីរុញបាល់ពីការស៊ុតរបស់កីឡាករ Syahmi Safari ឲ្យហោះរំលងរបារទី ហើយរូបគេបានបង្ហាញពីទម្រង់លេងដ៏ល្អម្តងទៀត នៅដើមតង់ទី ២ ដើម្បីសង្គ្រោះបាល់ពីការតែតរបស់កីឡាករ Sumareh នៅមុនពេលសង្គ្រោះបាល់ដ៏ល្អមួយផ្សេងទៀតដើម្បីរារាំងការស៊ុតបាល់ពិន័យ Free-kick របស់កីឡាករ Safawi Rasid។
កីឡាករ ១០ នាក់ ក្នុងនោះវៀតណាម ៦ នាក់ និងម៉ាឡេស៊ី ៤ នាក់ បានរងពិន័យកាតលឿងសម្រាប់ការប៉ះទង្គិចគ្នា ដែលបាននាំឲ្យការផ្តល់កាតក្រហមដល់កីឡាករ Shahrul Saad នៅជិតបញ្ចប់ការប្រកួត នៅពេលដែលរូបគេបានទទួលការពិន័យកាតលឿងជាលើកទី ២ របស់គេ ក្រោយពីបានប្រព្រឹត្តកំហុសទៅលើការវាយសម្រុករហ័សរបស់កីឡាករនៃក្រុមជម្រើសជាតិវៀតណាម។
អ្នកចាំទីអន្តរជាតិវៀតណាមដើមកំណើតរុស្ស៊ី Van Lam បាននិយាយបន្ទាប់ពីបញ្ចប់ ការប្រកួតថា៖ «សម្រាប់យើង ក្រោយពីរយៈពេល ១០ ឆ្នាំ យើងធ្វើបានម្តងទៀត។ រាល់ប្រជាជនវៀតណាមទាំងអស់ បាន រង់ចាំអស់រយៈពេល ១០ ឆ្នាំមកហើយហេតុនេះ យើងពិតជារីករាយណាស់។ វាជាអារម្មណ៍ដ៏អស្ចារ្យមួយក្នុងការអាចធ្វើបានម្តងទៀត ក្នុងរយៈពេល ១០ ឆ្នាំ ក្រោយពីការឈ្នះពានជាលើកចុងក្រោយ។ ក្រុមបានប្រឹងអស់ពីសមត្ថភាព»៕