.jpg)
លោក អ៊ូ រតនា ពេលឡើងបំពាក់មេដាយដល់ក្រុមវ៉ូវីណាមកម្ពុជា វៀតណាម និងក្រុមឥណ្ឌូនេស៊ី។ សហការី
ភ្នំពេញៈ ក្រុមអត្តពលិកកីឡាវ៉ូវីណាមកម្ពុជា បានបង្កើតនូវកំណត់ត្រាដ៏ថ្មីសន្លាងមួយទៀត គឺការឈ្នះមេដាយមាសរហូតដល់ ១១ រួមជាមួយមេដាយប្រាក់ ១១ និងសំរឹទ្ធ ១៤ ពីការប្រកួតកីឡាវ៉ូវីណាមជើងឯកអាស៊ី លើកទី ៤ ឆ្នាំ ២០១៨ (The 4th AVF ASIAN Vovinam Cahmpionship 2018) នៅកោះបាលី ប្រទេសឥណ្ឌូនេស៊ី ដែលបានបញ្ចប់ កាលពីយប់ថ្ងៃចន្ទ។
ការឈ្នះបានមេដាយសរុបចំនួន ៣៦ សម្រាប់ការចូលរួមការប្រកួតជើងឯកអាស៊ី ជាលើកដំបូងនេះ បានក្លាយជាលទ្ធផលដ៏ល្អបំផុត បន្ថែមទៅលើការឈ្នះបានមេដាយ មាស ៤ ប្រាក់ ៩ និងសំរឹទ្ធ ៩ ពីការប្រកួតកីឡាវ៉ូវីណាមជើងឯកពិភពលោកនៅប្រទេសឥណ្ឌា កាលពី ឆ្នាំ ២០១៧ ហើយប្រតិភូកីឡាវ៉ូវីណាមកម្ពុជា នឹងនាំយកមេដាយយ៉ាងច្រើននេះ មកដល់មាតុប្រទេសវិញ នៅព្រឹកម៉ោង ១០ ថ្ងៃព្រហស្បតិ៍ ខាងមុខនេះ។
លោក អ៊ូ រតនា អនុប្រធានសហព័ន្ធកីឡាវ៉ូវីណាមកម្ពុជា និងជាប្រធានប្រតិភូដឹកនាំការប្រកួតនេះ បានប្រាប់ភ្នំពេញប៉ុស្តិ៍ តាមតេឡេក្រាម ពីឥណ្ឌូនេស៊ី មកថា៖ «ជ័យជម្នះដែលយើងទទួលបាននេះ វាជាមោទនភាពយ៉ាងខ្លាំងក្លា បន្ទាប់ពីក្រសួងអប់រំ យុវជន និងកីឡា បានអនុញ្ញាតឲ្យសហព័ន្ធយើង មានគ្រូជាប់កិច្ចសន្យា ជាម្ចាស់ក្បាច់គុនមកបង្ហាត់ ធ្វើឲ្យក្រុមអត្តពលិកកម្ពុជាយើង ពេលនេះមានសមត្ថភាពខុសប្លែកពីមុន។ កាលពី ៤ ឆ្នាំមុន យើងលេងតែដដែលនូវវិញ្ញាសាប្រហែល ១០ ប៉ុន្តែពេលនេះយើងលេងបានច្រើនវិញ្ញាសា គឺយើងអត់ខ្លាចទេ»។
គួរបញ្ជាក់ថា សម្រាប់ការប្រកួតជើងឯកអាស៊ីនេះ ក្រុមអត្តពលិក វ៉ូវីណាមកម្ពុជា ទាំង ២០ នាក់ បានចូលរួមប្រកួតគ្រប់វិញ្ញាសាទាំង ៣៧ (ប្រយុទ្ធ ១៣ វិញ្ញាសា) ហើយការឈ្នះបានមេដាយមាស ១១ ប្រាក់ ១១ និងសំរឹទ្ធ ១៤ នេះ បានជួយឲ្យកម្ពុជា ឈរនៅចំណាត់ថ្នាក់លេខ ២ បន្ទាប់ពីវៀតណាម ជាម្ចាស់ក្បាច់គុន ហើយមីយ៉ាន់ម៉ា ឈរនៅលេខ ៣ ក្នុងចំណោមប្រទេសចូលរួមសរុបចំនួន ១៧ ក្នុងទ្វីបអាស៊ី។
ជាមួយជ័យជម្នះយ៉ាងធំធេង ដែលទទួលបានពីការប្រកួតកីឡាវ៉ូវីណាមជើងឯកអាស៊ី ឆ្នាំ ២០១៨ នៅឥណ្ឌូនេស៊ីនេះ បានក្លាយជាចំណុចវិជ្ជមានយ៉ាងល្អ សម្រាប់កម្ពុជា ក្នុងការចូលរួមការប្រកួតស៊ីហ្គេម ឆ្នាំ ២០១៩ ព្រោះម្ចាស់ផ្ទះហ្វីលីពីន បានឯកភាព និងសម្រេចដាក់បញ្ចូលឲ្យមានការប្រកួតកីឡាវ៉ូវីណាមជាផ្លូវការហើយ បន្ទាប់ពីប្រភេទកីឡាមួយនេះ បានអវត្តមានពីការប្រកួតស៊ីហ្គេម កាលពីឆ្នាំ ២០១៥ និងឆ្នាំ ២០១៧។
ទាក់ទងទៅនឹងរឿងនេះ លោក អ៊ូ រតនា បានបន្តថា៖ «ផ្អែកទៅលើលទ្ធផលនេះ យើងពិតជាមានមោទនភាពខ្លាំង សម្រាប់ប្រទេសជាតិរបស់យើង ដោយសារយើងអាចបង្ហាញមុខមាត់នៅលើឆាកអន្តរជាតិបាន ដែលបញ្ជាក់ថា យើងអាចធ្វើបាន ចំណែកការប្រកួតស៊ីហ្គេម នៅហ្វីលីពីន ឆ្នាំ ២០១៩ គឺវ៉ូវីណាមកម្ពុជាយើង នឹងខិតខំបង្កើនអត្តពលិកល្អៗបន្ថែមទៀត ដើម្បីចូលរួមប្រជែងរកមេដាយជូនជាតិ»។
គួរបញ្ជាក់ថា មេដាយមាសទាំង ១១ ដែលកម្ពុជា ដណ្តើមបានពីការប្រកួតជើងឯកអាស៊ីនេះ មានវិញ្ញាសាប្រយុទ្ធទម្ងន់ ៥៤ គីឡូក្រាម របស់កីឡាករ ទិន ឌិន ប្រកួតទម្ងន់ ៤៨ គ.ក្ររបស់កីឡាការិនី ហ៊ឹម ដាណេ ប្រកួតទម្ងន់ ៥៤ គ.ក្ររបស់កីឡាការិនី អេ ព្រីយ៉ានុតភូថង ប្រកួតទម្ងន់ ៥៧ គ.ក្ររបស់កីឡាករ ប៉ិច ជំនោរ រួមទាំងការប្រកួតវិញ្ញាសាសម្តែងមេគុនបុរសរបស់កីឡាករ លី បូរ៉ាមី សម្តែងជាក្រុមបុរស ៦ នាក់ សម្តែងនារីម្នាក់បុរស ៣ នាក់ ក្រុមដាវបុរស ៤ នាក់ ក្រុមដាវនារី ៤ នាក់ ក្រុមនារី ៣ នាក់បុរស ៣ នាក់ និងសម្តែងកាំបិតធំបុរស ២ នាក់ ហើយក្នុងនោះមានអត្តពលិកមួយចំនួន បានឈ្នះមេដាយមាស លើសពី ២ អមដោយមេដាយប្រាក់ និងសំរឹទ្ធ មួយចំនួនទៀត៕
