ភ្នំពេញ៖ អតីតគ្រូបង្វឹកក្រុមជម្រើសជាតិបែលហ្ស៊ិក លោក Marc Wilmots ដែលទើបមកដឹកនាំក្រុមជម្រើសជាតិអ៊ីរ៉ង់ នោះ បានអះអាងថា លោក «ស្អប់ការបរាជ័យ» ហើយពាក្យសម្តីនេះ វាប្រៀបដូចជាការគំរាមកំហែងបែបចិត្តសាស្រ្តមួយ មកដល់ក្រុមជម្រើសជាតិកម្ពុជា ព្រោះក្រុមទាំង ២ នេះ នឹងត្រូវប្រកួតគ្នាក្នុងវគ្គជម្រុះជុំទី ២ ពានរង្វាន់បាល់ទាត់ពិភពលោក (FIFA World Cup Qatar 2022) នៅកីឡដ្ឋាន Azadi Stadium ក្រុង Tehran ប្រទេស អ៊ីរ៉ង់ នាយប់ម៉ោង ៨:៣០ (ម៉ោងនៅប្រទេស កម្ពុជា) ថ្ងៃព្រហស្បតិ៍នេះ។
លោក Marc Wilmots ដែលបានដឹកនាំក្រុមអ៊ីរ៉ង់ ឲ្យឈ្នះក្រុមស៊ីរី ៥-០ ស្មើក្រុមកូរ៉េខាងត្បូង ១-១ និងឈ្នះក្រុមហុងកុង ២-០ នោះ បានប្រាប់ប្រព័ន្ធផ្សព្វផ្សាយថា លោកត្រូវដឹកនាំក្រុមអ៊ីរ៉ង់ឲ្យបានល្អបំផុត ហើយអ្វីដែលលោកស្អប់ និងមិនដែលមានក្នុងចិត្ត គឺការបរាជ័យ។ លោក Macr ដែលបានចុះកុងត្រាដឹកនាំក្រុមអ៊ីរ៉ង់ រហូតដល់ World Cup 2022 ជាមួយប្រាក់តម្លៃខ្លួន ១,៥ លានដុល្លារ ក្នុង ១ ឆ្នាំនោះ បានបញ្ជាក់ថា៖«គ្រប់ការប្រកួតខ្ញុំតែងតែចង់ឈ្នះជានិច្ច និងត្រូវលេងប្រយុទ្ធដល់ចប់ការប្រកួត»។
ការប្តេជ្ញាចិត្តដ៏មោះមុតរបស់លោក Marc វាបានបន្ថែមនូវបន្ទុកមួយទៀត ទៅដល់ក្រុមជម្រើសជាតិកម្ពុជា ក្នុងការទប់ទល់ជាមួយក្រុមអ៊ីរ៉ង់ ព្រោះអ៊ីរ៉ង់មិនត្រឹមតែជាក្រុមមានចំណាត់ថ្នាក់លេខ ១ ប្រចាំនៅទ្វីបអាស៊ីប៉ុណ្ណោះទេ ប៉ុន្តែក្រុមនេះសម្បូរដោយកីឡាករមានគុណភាពក្នុងការលេង ហើយឆន្ទៈ និងទម្រង់លេងរបស់អ៊ីរ៉ង់ គឺលេងប្រយុទ្ធខ្លាំង ដើម្បីរកគ្រាប់បាល់។
មូលហេតុសំខាន់មួយទៀត ដែលលោក Marc ត្រូវដឹកនាំក្រុមអ៊ីរ៉ង់ យកឈ្នះក្រុមកម្ពុជាឲ្យបាន ព្រោះជំនួបនៅយប់នេះ វាជាពេលដែលវិស័យបាល់ទាត់នៅអ៊ីរ៉ង់ ត្រូវបាន FIFA អនុញ្ញាតឲ្យស្រ្តីចូលរួមទស្សនាការប្រកួតបាល់ទាត់ដោយផ្ទាល់វិញ បន្ទាប់ពីប្រទេសមួយនេះ បានជាប់ទណ្ឌកម្ម និងមានអ្នកទស្សនាសុទ្ធតែជាបុរសអស់រយៈពេលប្រមាណ ៤០ ឆ្នាំកន្លងមកនេះ។
ការទទួលបានសេរីភាពឡើងវិញ ក្នុងការឲ្យស្រ្តីបានចូលរួមមើលបាល់ទាត់ដោយផ្ទាល់នេះ បានធ្វើឲ្យការលក់សំបុត្រប្រភេទទី ១ នាជំនួបរវាងក្រុមអ៊ីរ៉ង់ និងក្រុមកម្ពុជា លើកនេះ គឺប្រើពេលលក់ត្រឹម ១ ម៉ោងប៉ុណ្ណោះ ហើយការសម្រុកទៅទិញសំបុត្រយ៉ាងប្រញាប់ប្រញាល់នេះ ត្រូវបានគេប៉ាន់ប្រមាណថា ពហុកីឡដ្ឋាន Azadi Stadium ដែលផ្ទុកមនុស្សបាន ១០ ម៉ឺននាក់ នឹងណែនតាន់តាប់ទៅដោយហ្វូងមនុស្សជាមិនខាន។
ស្រ្តីម្នាក់ក្នុងចំណោមស្រ្តី ៣ ៥០០ នាក់ ដែលបានទិញសំបុត្រទស្សនាការប្រកួតរួចហើយនោះ បានប្រាប់ AFP ថា៖ «ខ្ញុំស្ទើរតែមិនចង់ជឿ ចំពោះការផ្តល់ឱកាសដ៏រីករាយនេះឡើងវិញ ព្រោះជាច្រើនឆ្នាំកន្លងមកនេះ ពួកយើងជាស្រ្តីបានត្រឹមមើលការប្រកួតបាល់ទាត់តាមទូរទស្សន៍ ប៉ុន្តែលើកនេះ ខ្ញុំបានមើលការប្រកួតបាល់ទាត់ដោយផ្ទាល់ហើយ»។
ទោះយ៉ាងណាក៏ដោយ លោក Felix Dalmas គ្រូបង្វឹកក្រុមជម្រើសជាតិកម្ពុជា មិនបានបង្ហាញភាពតក់ស្លុតចំពោះស្ថានការ ដែលក្រុមកម្ពុជា នឹងជួបប្រទះ សម្រាប់ការជួបក្រុមម្ចាស់ផ្ទះអ៊ីរ៉ង់នោះទេ។ លោកបាននិយាយ មុនដឹកនាំក្រុមទៅអ៊ីរ៉ង់ថា៖ «អ៊ីរ៉ង់ មិនមែនត្រឹមតែមានកីឡាករល្អលេងនៅ Champion League នោះទេ គឺគេមានកីឡាករល្អៗជាច្រើន ប៉ុន្តែពួកយើងមានអារម្មណ៍រំភើបសប្បាយរីករាយ ដែលបានលេង និងប្រកួតជាមួយក្រុមដ៏អស្ចារ្យមួយនេះ»។
លោក Felix បានបន្ថែមថា៖ «ខ្ញុំគិតថា ក្រុមយើង នឹងអាចធ្វើឲ្យការប្រកួតមួយនេះ ក្លាយជាការប្រកួតដ៏អស្ចារ្យសម្រាប់ពួកយើង គឺដោយផ្អែកលើការរៀបចំទស្សនទានបាល់ទាត់របស់ពួកយើង និងសមត្ថភាពរបស់កីឡាករយើង»៕