.jpg)
កីឡាករសុខ សាវិន (ឆ្វេង) យកឈ្នះថៃ ដើម្បីរក្សាក្តីសង្ឃឹមនៃការឈានទៅវគ្គផ្តាច់ព្រ័ត្រ។ យឺន ពន្លក
ភ្នំពេញ: ជ័យជម្នះរបស់សុខ សាវិន លើកីឡាករថៃ Phat Nengthong ក្នុងវគ្គជម្រុះសន្សំពិន្ទុចុងក្រោយបង្អស់កាលពីល្ងាចថ្ងៃសៅរ៍ នៃសង្វៀនអាស៊ីអាគ្នេយ៍ អាចចាត់ទុកថា ឈ្នះទាំងសំណាង ព្រោះកីឡាករថៃមានប្រៀបឈ្នះពិន្ទុដាច់ទៅហើយ មុននឹងនៅចុងទឹកទី ៥ បែរជាកីឡាករកម្ពុជា មានឱកាសដ៏កម្រឡើងជង្គង់ឲ្យកីឡាករថៃ Phat Nengthong សន្លប់ដ៏មិនគួរឲ្យជឿ។
លទ្ធផលជ័យជម្នះនេះក្នុងចំណោមការប្រកួត ៤ លើក មានន័យថា សាវិន បានវាយឲ្យថៃសន្លប់ ៣ នាក់ ចាញ់ពិន្ទុថៃម្នាក់ មាន ១០ ពិន្ទុប៉ុណ្ណោះ។ បើទោះបីឈ្នះក៏ដោយ ប៉ុន្តែ កីឡាករសុខ សាវិន នៅតែមានភាគរយតិចក្នុងឱកាសទទួលបានសិទិ្ធចេញទៅប្រកួតផ្តាច់ព្រ័ត្រជាមួយកីឡាករថៃ ដោយសារតែសូត្រ ប៊ុនធី ឈ្នះបាន ៣ ប្រកួត មាន ៩ ពិន្ទុ និងនៅសល់ការប្រកួតក្នុងដៃ ១ លើកទៀត។
តាមការព្យាករ និងបូកសរុបលទ្ធផលបណ្តោះអាសន្នពីគណៈកម្មការរៀបចំប្រកួត សុខ សាវិន ត្រូវរង់ចាំលទ្ធផលប្រកួតរបស់កីឡាករក្នុងពូលជាមួយគឺសូត្រ ប៊ុនធី ជាមួយកីឡាករថៃ Phat Chhayakphoum នៅថ្ងៃទី ៣ ខែវិច្ឆិកា ឆ្នាំ ២០១៨។
លទ្ធផលនេះនឹងបញ្ជាក់ឲ្យឃើញច្បាស់ថា បើសូត្រ ប៊ុនធី ឈ្នះគឺត្រូវឡើងទៅវគ្គផ្តាច់ព្រ័ត្រជាមួយកីឡាករថៃ ប៉ុន្តែបើសូត្រ ប៊ុនធី ចាញ់ថៃគឺធ្លាក់ ហើយឱកាសឡើងទៅវគ្គផ្តាច់ព្រ័ត្របានទៅលើកីឡាករសុខ សាវិន វិញ។
ប៉ុន្តែ លោកសួន ប៊ុនសូត្រ គ្រូបង្វឹក និងជាឪពុកបង្កើតរបស់សូត្រ ប៊ុនធី បាននិយាយថា៖ «ប៊ុនធី នឹងឈ្នះកីឡាករថៃ Phat Chhayakphoum ដើម្បីមានពិន្ទុគ្រប់គ្រាន់បានឡើងទៅវគ្គផ្តាច់ព្រ័ត្រ ពីព្រោះកន្លងមកប៊ុនធី ធ្លាប់វាយឲ្យ Phat Chhayakphoum ចុះចាញ់មុនទឹកទី ៥ រួចមកហើយ។ ម្យ៉ាងវិញទៀត គេព្យាយាមហ្វឹកហាត់ និងរក្សាសុខភាព ព្រមទាំងសម្រួចស្នៀតកែងជង្គង់ជាមួយខ្ញុំរៀងរាល់ថ្ងៃ ខ្ញុំសង្ឃឹមឈ្នះ ៩០ ភាគរយ។
លោកសន អេលីត គ្រូបង្វឹកសុខ សាវិន បាននិយាយថា៖ «ការចាញ់ ១ ប្រកួតរបស់សាវិន ធ្វើឲ្យអស់សង្ឃឹមខ្លាំងណាស់ ប៉ុន្តែគេប្រឹងអស់ពីសមត្ថភាពទៅហើយ»។
លោកសន អេលីត បានបន្ថែមថា «ឥឡូវនេះ យើងរង់ចាំដង្ហើមគេដកគឺមានន័យថា គេចាញ់ ទើបយើងបានឡើង តែបើគេឈ្នះគឺយើងធ្លាក់ហើយសមត្ថភាពរបស់សូត្រ ប៊ុន ធីអាចមានកម្រិតលើកីឡាករថៃ Phat Chhayakphoum ដែរ ប្រសិនបើហ្វឹកហាត់ពេញល្អ»។
គូខ្សែក្រវាត់ ១ គូទៀតដែល ប្រកួតបង្គ្រប់តាមរូបមន្ត ឃឹម បូរ៉ា មកពីក្លិបរស្មីភូមិគាបខេត្តបន្ទាយមានជ័យ បានចាញ់ដោយសន្លប់ក្រោមស្នៀតទាត់របស់កីឡាករថៃ Phat Thana ត្រឹមទឹកទី ២។
ការបរាជ័យរបស់បូរ៉ា ត្រូវបានអ្នកទស្សនាភាគច្រើនរិះគន់ថា វាយគ្មានការប្រុងប្រយ័ត្ន ដោយអាងតែការប្រកួតបង្គ្រប់កិច្ច ព្រោះលទ្ធផលឈ្នះ ឬចាញ់ មិនសំខាន់ឡើយ៕
