.jpg)
កីឡាករថៃ Keng Kat (ឆ្វេង) និងកីឡាករកម្ពុជា ម៉ាជ សុខរ៉ា។ សហការី
ភ្នំពេញ: អ្នកប្រដាល់ចាស់វស្សាម៉ាជ សុខរ៉ា មកពីតាព្រហ្មមានជ័យនឹងឡើងទៅវគ្គផ្តាច់ព្រ័ត្រជាមួយកីឡាករថៃ Keng Kat ក្នុងវគ្គដណ្ដើមខ្សែក្រវាត់ភេសជ្ជៈវើកទម្ងន់ ៦៧ គីឡូក្រាម នៃសង្វៀនអាស៊ីអាគ្នេយ៍នៅល្ងាចថ្ងៃអាទិត្យសប្តាហ៍នេះ។
ការប្រកួតនេះ ត្រូវបានគេសម្លឹងឃើញថា គឺជាការងារប្រកួតដ៏លំបាកមួយសម្រាប់កីឡាករកម្ពុជា ដោយសារតែកីឡាករថៃ Keng Kat មានសមត្ថភាពល្អជាង និងមានក្បាច់វាយជង្គង់ច្បាស់ជាង។
ជាមួយគ្នានេះ ការឈានចូលដល់វគ្គផ្តាច់ព្រ័ត្ររបស់ម៉ាជ សុខរ៉ា បានកើតឡើងទាំងការមានសំណាងច្រើនជាងសមត្ថភាព ពីព្រោះឆ្លងកាត់ការវគ្គជម្រុះ ៤ លើក ឈ្នះ ២ លើក និងចាញ់ ២ លើក មានតែ ៨ ពិន្ទុស្មើជាមួយពុទ្ធ ឆាយរិទ្ធី និងរឿង សារ័ត្ន ប៉ុន្តែមានអាទិភាពដោយសារបានឈ្នះដោយការផ្តួលដៃគូឲ្យសន្លប់បានលឿនជាងគេក្នុងការឈ្នះទាំង ២ លើក។
អ្នកទស្សនាភាគច្រើនបានចាត់ទុកថា ម៉ាជ សុខរ៉ា ថាជាកីឡាករហេង និងមានសំណាងជាងគេដែលឡើងមកដល់វគ្គចុងក្រោយ ដើម្បីមានឱកាសដណ្តើមទឹកប្រាក់ចំនួន ៥ ពាន់ដុល្លារ ហើយទោះបីជាបរាជ័យ ក៏នៅតែទទួលបានទឹកប្រាក់ចំនួន ៣០០០ ដុល្លារដែរ។
កំណត់ត្រាប្រកួតក្នុងអំឡុងវគ្គជម្រុះនេះ ម៉ាជ សុខរ៉ា បានឡើងទៅវគ្គបន្ត ដោយសារតែកីឡាកររឿង សារ័ត្ន បានភ្លាត់ស្នៀតចាញ់ពិន្ទុកីឡាករថៃ Keng Kat។ ចំណែកកីឡាករថៃ KengKat បានឆ្លងវគ្គជម្រុះចំនួន ៤ លើក ឈ្នះទាំង ៤ លើក មាន ១២ ពិន្ទុ និងធ្លាប់ឈ្នះកីឡាករម៉ាជ សុខរ៉ា ផងដែរ។ កីឡាករថៃ Keng Kat មានប្រៀបជាង ដោយសារតែរូបគេមានបទពិសោធប្រកួតច្រើនជាងដល់ទៅ ៤៣ លើក។
កីឡាករថៃរូបនេះ ប្រកួតបានចំនួន ១០៧ លើក ឈ្នះ ៩៤ លើក ចាញ់ ១២ និងស្មើ ១ លើក ប៉ុន្តែ កីឡាករទាំង ២ មានកម្ពស់ ១,៧០ ម៉ែត្រដូចគ្នា។
ចំណែកម៉ាជ សុខរ៉ា មានប្រវត្តិប្រកួតបានចំនួន ៦៤ លើក ឈ្នះ ៥៤ លើក ចាញ់ ៩ លើក និងស្មើ ១ លើក។ លោកថាញ់ វ៉ាឡេក គ្រូបង្វឹកកីឡាករថៃ បាននិយាយថា៖ «សម្រាប់ការប្រកួតវគ្គផ្តាច់ព្រ័ត្រនេះ Keng Kat ហ្វឹកហាត់ត្រៀមបានល្អ ហើយបើនិយាយពីសមត្ថភាពបច្ចេកទេសវិញ រូបគេមានទំនុកចិត្តខ្ពស់ក្នុងការយកឈ្នះ»។
លោកថាញ់ វ៉ាឡេក បានបន្ថែមថា៖ «ប្រសិនបើគ្មានបញ្ហាបែកឈាម ឬគ្រូពេទ្យបញ្ឈប់ ឬករណីចៃដន្យណាមួយទេ សម្រាប់ខ្ញុំជាគ្រូបង្វឹក មានទំនុកចិត្តឈ្នះដល់ ៩០ ភាគរយ ពីព្រោះ Ken gKat ល្អទាត់ ល្អឱបឡើងក្បាច់ជង្គង់ និងមានស្នៀតវាយចំគោលដៅល្អ។ ទោះជាយ៉ាងណា យើងក៏មិនអាចសង្ឃឹមឈ្នះ ១០០ ភាគរយបានដែរ ព្រោះ សុខរ៉ា នឹងវាយសម្រុកគ្មានស្ទាបស្ទង់ទេ ហើយការចូលសម្រុកគ្មានញញើតបែបនេះធ្វើឲ្យយើងអាចចាញ់ដោយភ្លាត់ស្នៀតប៉ុណ្ណោះ»។
លោកញាន សុធី នាយកគ្រប់គ្រងការប្រកួតប្រចាំសង្វៀនអាស៊ីអាគ្នេយ៍ បាននិយាយថា៖ «ការប្រកួតឈានដល់វគ្គផ្តាច់ព្រ័ត្រគឺមិនអាចវាយតម្លៃមុនបានទេ ពីព្រោះម្នាក់ៗសុទ្ធតែប្រឹងអស់ពីសមត្ថភាពរៀងៗខ្លួន ក្នុងនោះល្បិចនៃការប្រកួតសុទ្ធតែលាក់រៀងៗខ្លួន និងមានយុទ្ធសាស្ត្រអាថ៌កំបាំង ដើម្បីប្រជែងយកឈ្នះដូចគ្នា»។
លោកបានបន្តថា៖ «អ្វីៗអាចប្រែប្រួលទៅតាមលក្ខណៈជាក់ស្តែងដូចជាពីដំបូងយើងវាយតម្លៃថា សុខរ៉ា មិនអាចមានលទ្ធភាពឡើងមកដល់វគ្គនេះទេ ប៉ុន្តែ អ្នកមានសមត្ថភាពខ្លាំងបែរជាធ្លាក់ទៅវិញ៕
