.jpg)
លោក ជា ប៊ុនហេង និងក្រុមសូហ្វតិន្នីសកម្ពុជា ដែលត្រៀមចេញទៅប្រកួតនៅកូរ៉េខាងត្បូង។ ណន
ភ្នំពេញៈ សហព័ន្ធកីឡាសូហ្វតិន្នីសកម្ពុជា គ្រោងនឹងបញ្ជូនអត្តពលិករបស់ខ្លួន ជាលក្ខណៈទ្រង់ទ្រាយធំគឺរហូតដល់ ១៣ នាក់ ដើម្បីចូលរួមការប្រកួតជើងឯកយុវជនពិភពលោក លើកទី ៣ ឆ្នាំ ២០១៨ (3rd World Junior Soft Tennis Championship 2018) នៅកូរ៉េ ដោយរំពឹងថា អាចនឹងធ្វើឲ្យពិភពលោក បានស្គាល់ពីសមត្ថភាពពិតរបស់ ក្រុម សូហ្វតិន្នីសកម្ពុជា។
ទាក់ទងទៅនឹងការប្រកួតនេះ លោកឧត្តមសេនីយ៍ឯក ជា ប៊ុនហេង អនុប្រធានទី ១ សហព័ន្ធកីឡាសូហ្វតិន្នីសកម្ពុជា បាន ថ្លែងក្នុងសន្និសីទកាសែត កាលពីថ្ងៃសៅរ៍ថា៖ «នៅពេលនេះក្រុមសូហ្វតិន្នីសរបស់យើង បានបោះជំហានទៅចូលរួមការប្រកួតជើងឯកយុវជនពិភពលោក ជាលើកដំបូង ដោយយើងនឹងដាក់កីឡាករ ៧ នាក់ កីឡាការិនី ៦ នាក់ឲ្យចូលរួមប្រកួត ហើយរាល់ការចំណាយផ្សេងៗ យើងទទួលបានការឧបត្ថម្ភពីសម្តេចក្រឡាហោម ស ខេង»។
លោក ជា ប៊ុនហេង បានបន្ថែមថា៖ «ថ្វីដ្បិតតែ ព្រឹត្តិការណ៍នេះ យើងទើបតែនឹងចូលរួម ប៉ុន្តែក្មេងៗរបស់យើង បានបង្កើនម៉ោងហ្វឹកហាត់ទាំងព្រឹក ទាំងល្ងាច រយៈពេល ៣ ខែហើយ អ៊ីចឹងយើងមានសង្ឃឹមខ្លះ ក្នុងការដណ្តើមមេដាយ។ យើងមិនទាន់ហ៊ានអះអាងថា បានមេដាយ ឬយ៉ាងណានោះទេ ប៉ុន្តែយើងនឹងខិតខំប្រឹងប្រែងឲ្យអស់ពីសមត្ថភាព ដើម្បីឲ្យពិភពលោក បានស្គាល់ពីសមត្ថភាពក្រុមសូហ្វតិន្នីសកម្ពុជាយើង»។
ជាមួយការចេញទៅកូរ៉េលើកនេះ ក្រុមសូហ្វតិន្នីសកម្ពុជា នឹងចូលរួមការប្រកួត Korea Cup 2018 មួយទៀត មុនពេលពួកគេ ចូលរួមការប្រកួតកីឡាសូហ្វតិន្នីសជើងឯកយុវជនពិភពលោក នៅចុងខែវិច្ឆិកា ខាងមុខនេះ ហើយអត្តពលិកវ័យក្មេងចំនួន ៥ នាក់ ត្រូវបានសហព័ន្ធកីឡាសូហ្វតិន្នីសកម្ពុជា បញ្ជូនឲ្យទៅហាត់នៅកូរ៉េមុន ដោយពួកគេបានចាកចេញពីកម្ពុជា កាលពីយប់ថ្ងៃអាទិត្យ កន្លងមកនេះ។
តាមខ្លឹមសារ ដែលត្រូវបានប្រកាស នៅក្នុងសន្និសីទកាសែត គឺក្រុមអត្តពលិកទាំង ៥ នាក់ ដែលបានចេញទៅមុននោះ នឹងត្រូវហ្វឹកហាត់រយៈពេល ១០ ថ្ងៃ នៅកូរ៉េ បន្ទាប់មកពួកគេត្រូវចូលរួមការប្រកួត Korea Cup 2018 ហើយនៅថ្ងៃទី ២៨ ខែវិច្ឆិកា ពួកគេ នឹងត្រូវបន្តដំណើរជាមួយប្រតិភូកីឡាសូហ្វតិន្នីសកម្ពុជា (ក្រុមទើបចេញពីប្រទេសកម្ពុជាទៅ) ដើម្បីបន្តដំណើរទៅកាន់ទីក្រុង Suncheon ជាកន្លែងដែលពួកគេ ត្រូវប្រជែងរកមេដាយ នៅក្នុងការប្រកួតជើងឯកយុវជនពិភពលោក។
នៅក្នុងការប្រកួតជើងឯកយុវជន ឆ្នាំ ២០១៨ នេះ គេបែងចែកការប្រកួតជា ៣ កម្រិតអាយុ រួមមានក្រុមអាយុក្រោម ១៥ ឆ្នាំ ក្រោម ១៨ ឆ្នាំ និងក្រុមអាយុក្រោម ២១ ឆ្នាំ ប៉ុន្តែ លោក ជា ប៊ុនហេង បានបញ្ជាក់ថា៖ «ការប្រកួតនេះ មានប្រទេសប្រហែល ២០ ចូលរួម ហើយនៅក្នុងការប្រកួតទាំង ៣ កម្រិតនេះ ខ្ញុំមានការសង្ឃឹមច្រើន ទៅលើក្រុមអាយុ ១៥ ឆ្នាំ គឺខ្ញុំជឿថា ពួកគេនឹងលេងបានល្អ ក្នុង ការប្រកួតនេះ»។
គួររំឭកថា សម្រាប់ការចូលរួមការប្រកួតកីឡាសូហ្វតិន្នីសជើងឯកអាស៊ាន នៅហ្វីលីពីន កាលពីដើមខែតុលា ក្រុមសូហ្វតិន្នីសកម្ពុជា ដណ្តើមបានមេដាយមាស ២ ប្រាក់ ៤ និងសំរឹទ្ធ ៥ ហើយតាមរយៈជ័យជម្នះយ៉ាងធំនេះ បានធ្វើឲ្យសូហ្វតិន្នីសកម្ពុជា ពេលនេះឈរនៅចំណាត់ថ្នាក់លេខ ៨ ពិភពលោក ហើយបានក្លាយជាក្រុមខ្លាំងទាំង ៣ នៅតំបន់អាស៊ាន បន្ទាប់ពីក្រុមលេខ ១ ឥណ្ឌូនេស៊ី និងក្រុមលេខ ២ ថៃ៕
