.jpg)
វីរកីឡាការិនី ស៊ន សៀវម៉ី បានបង្ហាញទង់ជាតិកម្ពុជា ពេលកញ្ញាឡើងទទួលមេដាយមាស។ រូប CAMSOC
ភ្នំពេញ៖ វីរកីឡាការិនី ស៊ន សៀវម៉ី បានសារភាពថា ខ្លួនមានការភិតភ័យ និងជួបការលំបាកក្នុងការយកឈ្នះលើកីឡាការិនីម្ចាស់ផ្ទះ Alora Kirstie Elaine នៅវគ្គផ្តាច់ព្រ័ត្រ ដើម្បីឈ្នះមេដាយមាសឲ្យកម្ពុជាជាលើកទី ៣ នៅក្នុងការប្រកួតស៊ីហ្គេមលើកទី ៣០ ដែលកំពុងតែដំណើរការនៅប្រទេស ហ្វីលីពីន។
កីឡាការិនីតេក្វាន់ដូ ស៊ន សៀវម៉ី បាននិយាយក្រោយការឈ្នះមេដាយមាស កាលពីយប់ថ្ងៃអាទិត្យថា៖ «ខ្ញុំរាងភ័យដែរ ដោយសារឆ្នាំនេះហ្វីលីពីន ជាម្ចាស់ផ្ទះ ហើយយើងត្រូវជួបកីឡាការិនីហ្វីលីពីននៅវគ្គផ្តាច់ព្រ័ត្រ អ៊ីចឹងរាងពិបាកបន្តិចគ្រាន់តែថា មានកម្លាំងចិត្តគ្រប់គ្រាន់ ដ្បិតអីប្លែកត្រង់ថា ខ្ញុំធ្លាប់វ៉ៃជាមួយគាត់តែ ៣ ទឹកទេ ប៉ុន្តែលើកនេះ ទឹកទី ៣ គាត់ស្មើពិន្ទុជាមួយខ្ញុំ អ៊ីចឹងយើងត្រូវថែមមួយទឹកចុងក្រោយ»។
សម្រាប់ការប្រកួតនៅលើប្រភេទទម្ងន់លើ ៧៣ គីឡូក្រាម នៅប្រទេស ហ្វីលីពីន កាលពីថ្ងៃអាទិត្យនោះ ស៊ន សៀវម៉ី បានយកឈ្នះកីឡាការិនីវៀតណាម Lam Thi Ha Thanh ជាមួយពិន្ទុ ២៥-១ នៅក្នុងវគ្គជម្រុះ ៨ នាក់ ប៉ុន្តែការឡើងទៅជួបកីឡាការិនីហ្វីលីពីន Alora Kirstie Elaine នៅវគ្គផ្តាច់ព្រ័ត្រ គឺអ្នកទាំង ២ បានប្រកួតគ្នារហូតដល់ទឹកបន្ថែម ដើម្បីសម្រេចការឈ្នះចាញ់។
បើទោះបីជា ស៊ន សៀវម៉ី ធ្លាប់បានឈ្នះ Alora Kirstie Elaine ទាំង ៤ លើក សម្រាប់ការជួបគ្នាកន្លងមក ប៉ុន្តែក្នុងជំនួបវគ្គផ្តាច់ព្រ័ត្រលើកនេះ ស៊ន សៀវម៉ី បានចាញ់ប្រៀបកីឡាការិនីម្ចាស់ផ្ទះរូបនេះ ជាមួយពិន្ទុ ៤-៣ តែរកបានពិន្ទុ ២-១ វិញ នៅទឹកទី ២ ខណៈការប្រកួតទឹកទី ៣ អ្នកទាំង ២ បានស្មើគ្នា ៤-៤។
ការមានពិន្ទុស្មើគ្នា ៩-៩ នេះ ក្នុងការប្រកួត ៣ ទឹកនេះ ធ្វើឲ្យគណៈកម្មការ ឈានដល់ការថែមការប្រកួតទឹកទី ៤ (អ្នកវ៉ៃចូលមុនឈ្នះ ដោយមិនគិតនាទី) ក្នុងការកាត់សេចក្តី ហើយជាលទ្ធផល ស៊ន សៀវម៉ី បានទាត់ចំគោលដៅ ទៅលើកីឡាករម្ចាស់ផ្ទះបានមុន និងទទួលបាន ៣ ពិន្ទុបន្ថែម ដើម្បីយកឈ្នះជាមួយពិន្ទុសរុប ១២-៩។ ជ័យជម្នះនេះ ជួយឲ្យ សៀវម៉ី បានរក្សាការឈ្នះមេដាយមាសជាលើកទី ៣ ជាប់ៗគ្នា ជូនប្រទេសជាតិក្នុងការប្រកួតស៊ីហ្គេមនេះ។
កីឡាការិនី Tubbs Casandre Nicole (ឆ្វេង) និង ឈឿង អាលីហ្សា ពេលបំពាក់មេដាយប្រាក់។ CAMSOC
ជាមួយជ័យជម្នះនេះ ស៊ន សៀវម៉ី បានសារភាពថា កញ្ញាបានប្រើក្បាច់ដែលមិនធ្លាប់ប្រើកន្លងមក ដើម្បីយកឈ្នះ Alora Kirstie Elaine។ សៀវម៉ី បានបញ្ជាក់ថា៖ «ខ្ញុំឈ្នះគាត់ ដោយសារខ្ញុំទាត់លើកពីក្រោយ ហើយតាំងពីមុនមក ខ្ញុំមិនដែលវ៉ៃក្បាច់នេះនោះទេ ប៉ុន្តែដោយសារឱកាសវាមានហើយ អ៊ីចឹងខ្ញុំក៏ដាច់ចិត្តប្រើវាទៅ»។
យ៉ាងណាក៏ដោយ ម្ចាស់មេដាយមាសកីឡាស៊ីរូបនេះ បានទទួលស្គាល់ថា ការឈ្នះមេដាយមាសលើកទី ៣ នេះ វាពិបាកជាងលើកមុនៗ។«ជាទូទៅ គាត់ចូលច្រើនជាងខ្ញុំចូល ដល់អ៊ីចឹងយើងស្រួលវ៉ៃ ប៉ុន្តែ ការវ៉ៃលើកនេះ គាត់រាងប្រយ័ត្នដែរ គឺគាត់អត់សូវចូលទេ ព្រោះគាត់ដឹងថា ជើងមុខរបស់យើង រាងលឿនដែរ ហើយការរង់ចាំដូចគ្នាបែបនេះ វាធ្វើឲ្យយើងពិបាកស្មានថា តើគាត់ទាត់អី និងចង់ធ្វើអី ព្រោះពេលគាត់ចូលមកយើងច្រើន យើងដឹងថា យើងចង់ទាត់អីលឿនជាង ព្រោះខ្ញុំភាគច្រើនពូកែតែជើងមុខ»។
ស៊ន សៀវម៉ី បានបន្ថែមថា៖ «មេដាយមាសនេះ ខ្ញុំផ្ញើទៅប្រជាពលរដ្ឋខ្មែរជាង ១៦ លាននាក់ គឺវាមិនមែនតែសម្រាប់ខ្ញុំម្នាក់ទេ ហើយខ្ញុំជូនមេដាយនេះ ជាពិសេសទៅដល់ប្រធានសហព័ន្ធកីឡាតេក្វាន់ដូ ឯកឧត្តម ហង់ជួន ណារ៉ុន ដែលគាត់តែងតែផ្តល់កម្លាំងចិត្ត លើកទឹកចិត្ត និងជួយជំរុញដល់ក្រុមអត្តពលិកតេក្វាន់ដូទាំងអស់គ្នា»។
សម្រាប់ការប្រកួតកាលពីថ្ងៃអាទិត្យនោះដែរ កីឡាការិនីកូនកាត់ខ្មែរ-អាមេរិក Tubbs Casandre Nicole បានឈ្នះមេដាយប្រាក់ ក្នុងការប្រកួតទម្ងន់ក្រោម ៦២ គីឡូក្រាម បន្ទាប់នាងបានចាញ់កីឡាការិនីវៀតណាម Pham Thi Tiem ដោយពិន្ទុ ១១-៩ ឯកីឡាការិនី ឈឿង អាលីហ្សា ក៏បានឈ្នះមេដាយប្រាក់ លើទម្ងន់ក្រោម ៥៧ គីឡូក្រាមផងដែរ បន្ទាប់ពីកញ្ញាបានចាញ់ហ្វីលីពីន Lobez Pauline Louise ដោយពិន្ទុ ១៧-៣ នៅវគ្គផ្តាច់ព្រ័ត្រនោះ៕
