ក្រុង Santiago៖ សមាគមបាល់ទាត់ប្រទេស ស៊ីលី ហៅកាត់ ANFP បាននិយាយពីសប្ដាហ៍មុនថា ក្រុមជម្រើសជាតិស៊ីលីបានបដិសេធការប្រកួតមិត្តភាពជាមួយជម្រើសជាតិប៉េរូនៅសប្ដាហ៍នេះ ដោយសារវិបត្តិជាតិរយៈពេលជាច្រើនសប្ដាហ៍នៅក្នុងប្រទេសរបស់ពួកគេ។
គ្រូបង្វឹកជម្រើសជាតិស៊ីលីលោក Reinaldo Rueda បានប្រាប់ឲ្យកូនក្រុមរបស់គាត់ត្រឡប់ទៅលេងនៅតាមក្លិបរៀងៗខ្លួនវិញ។
ប្រទេស ស៊ីលី គ្រោងនឹងលេងជាមួយប្រទេស ប៉េរូ ដែលបានឈ្នះពួកគេនៅវគ្គពាក់កណ្ដាលផ្ដាច់ព្រ័ត្រនៃពានរង្វាន់ Copa America នៅប្រទេស ប្រេស៊ីល កាលពីខែកក្កដា ហើយនេះជាការប្រកួតមិត្តភាពមួយគ្រោងនឹងធ្វើនៅក្នុងទីក្រុង Lima ប្រទេស ប៉េរូ នៅថ្ងៃអង្គារស្អែកនេះ។
ប្រធានក្រុមជម្រើសជាតិស៊ីលី Gary Medel ដែលបានលេងជាខ្សែការពារសម្រាប់ក្លិប Bologna នៅប្រទេស អ៊ីតាលី នោះបានសរសេរលើបណ្ដាញ Twitter ថា៖ «យើងជាក្រុមបាល់ទាត់ ប៉ុន្តែជាងនេះទៅទៀតយើងក៏ជាប្រជាពលរដ្ឋផងដែរ»។
ប្រធានក្រុមរូបនេះបានបន្ថែមថា៖ «ឥឡូវនេះប្រទេស ស៊ីលី មានបញ្ហាជាអាទិភាពសំខាន់ជាងការប្រកួតនៅ ថ្ងៃអង្គារសប្ដាហ៍នេះទៅទៀត»។
សមាគមបាល់ទាត់ ANFP បាននិយាយថា ការសម្រេចចិត្តនេះត្រូវបានធ្វើឡើងក្រោយពី «មានការប្រជុំជាក្រុមមួយ» កាលពីថ្ងៃពុធនៅមជ្ឈមណ្ឌលហ្វឹកហាត់នៃប្រទេស ស៊ីលី នៅជាយទីក្រុង Santiago។
សមាគមដដែលនេះបានបន្តថា ខ្លួនបានបញ្ជាក់ជាមួយសមភាគីប្រទេស ប៉េរូ ពីការសម្រេចចិត្តនេះរួចហើយ។
នៅពេលទៅដល់ទីក្រុង Lima ក្រោយពីធ្វើដំណើរមកពីក្លិបរៀងៗខ្លួនពីសប្ដាហ៍មុននោះ កីឡាករមួយចំនួនបានបង្ហាញពីភាពស្ទាក់ស្ទើរក្នុងការប្រកួតមិត្តភាពនេះ។
ខ្សែបម្រើ Charles Aranguiz ដែលលេងបាន ៧៤ លើក ឲ្យក្លិប Bayer Leverkusen នោះ បាននិយាយពីថ្ងៃអង្គារថា៖ «មានបរិយាកាសលំបាក ហើយតាមគំនិតខ្ញុំ យើងមិនគួរលេងដោយមិនគោរពចំពោះអ្វីដែលកំពុងកើតឡើងនៅក្នុងប្រទេសជាតិនោះទេ»។
កីឡាករមួយចំនួនបានសម្ដែងពីការគាំទ្រចំពោះចលនាតវ៉ាប្រឆាំងនឹងប្រធានាធិបតីស៊ីលី លោក Sebastian Pinera ដែលធ្វើឲ្យមានអំពើហិង្សាកាលពីថ្ងៃទី ១៨ ខែតុលា ហើយតាំងពីនោះមកបានធ្វើឲ្យមនុស្សចំនួន ២១ នាក់ស្លាប់។
ក្រុមបាតុករដែលខឹងសម្បានឹងវិសមភាពសេដ្ឋកិច្ច និងសង្គម កំពុងទាមទារឲ្យមានការកែប្រែរដ្ឋធម្មនុញ្ញ និងទាមទារឲ្យលោក Pinera ចុះចេញពីតំណែងផងដែរ។
ប្រធានក្រុម Medel បាននិយាយថា៖ «មានការប្រកួតសំខាន់ជាងនេះមួយទៀតដែលជាការប្រកួតទាមទារសមភាព ដើម្បីឲ្យពលរដ្ឋស៊ីលីរស់នៅក្នុងប្រទេសមួយឲ្យកាន់តែមានភាពយុត្តិធម៌ថែមទៀត»។
ប្រធានក្រុមរូបនេះបានបន្ថែមថា៖ «យើងគាំទ្របាតុកម្មប៉ុន្តែគ្មានអំពើហិង្សានិងគ្មានអ្នករងរបួសទាំងទៅលើក្រុមបាតុករ និងទៅលើកងកម្លាំងប្រដាប់អាវុធ»។
ក្រៅពីមានអ្នកស្លាប់ហើយ មនុស្សប្រហែល ២ ០០០ នាក់ទៀតបានរងរបួស ហើយក្នុងនោះមាន ២០០ នាក់បានរងរបួសភ្នែកដោយសារត្រូវអំបែងគ្រាប់ដែលបាញ់ដោយកងកម្លាំងសន្តិសុខ។
ខ្សែបម្រើជើងចាស់ Arturo Vidal របស់ក្លិប Barcelona បាននិយាយថា៖ «ខ្ញុំនៅជាមួយប្រជាពលរដ្ឋព្រោះពួកគេបានក្រោកឈរទាមទារយុត្តិធម៌ ដូច្នេះហើយអ្នកត្រូវតែគាំទ្រពួកគេឲ្យបានពេញទំហឹងបំផុត»។
ប្រទេស ស៊ីលី បានលុបចោលការប្រកួតមិត្តភាពម្ដងមកហើយដែលគ្រោងនឹងប្រកួតពីសប្ដាហ៍មុនជាមួយប្រទេស បូលីវី ដោយសារប្រជាពលរដ្ឋស៊ីលីបាននាំគ្នាដើរជាក្បួតតវ៉ាតាមផ្លូវប្រឆាំងនឹងលទ្ធផលបោះឆ្នោតកាលពីថ្ងៃទី ២០ ខែតុលា៕ AFP/SN