ភ្នំពេញៈ និស្សិតផ្នែក IT ហេង សៅឌី ដែលជាស្តេចអុក ប្រចាំឆ្នាំ ២០១៧ បានបាត់បង់ឱកាសទាំងស្រុង ក្នុងការឡើងទៅប្រកួតការពារតំណែងស្តេចអុក ឆ្នាំ ២០១៨ នៅអង្គរសង្រ្កាន្ត ខេត្តសៀមរាប ក្នុងថ្ងៃបុណ្យចូលឆ្នាំប្រពៃណីខ្មែរ ខាងមុខនេះហើយ បន្ទាប់ពីរូបគេ បានធ្លាក់ក្នុងការប្រកួតវគ្គជម្រុះថ្នាក់ជាតិ កាលពីព្រឹកថ្ងៃអាទិត្យនេះ។
ចំណែកអតីតស្តេចអុក ឆ្នាំ ២០១៦ ហូយ សូណា ក៏បានធ្លាក់ត្រឹមវគ្គជម្រុះផងដែរ ប៉ុន្តែជើងឯករងស្តេចអុក ឆ្នាំ ២០១៧ ប៊ិន គាសេង និងអតីតស្តេចអុក២សម័យកាល ឈាវ បូរ៉ា សុទ្ធតែឆ្លងផុតការប្រកួតវគ្គជម្រុះតាមពូល រួមជាមួយអ្នកចំណូលថ្មីចំនួន ៩ នាក់ទៀត។
សម្រាប់ការប្រកួតថ្នាក់ជាតិ ឆ្នាំ ២០១៨ រវាងជើងខ្លាំងទាំង ២៤ នាក់ ដែលសម្រិតសម្រាំងមកពី ៧ មណ្ឌល នៅទូទាំងប្រទេសកម្ពុជានោះ ហេង សៅឌី ដែលឈរនៅពូល F បានឈ្នះត្រឹម ១ ប្រកួត និងចាញ់ ២ ប្រកួត នាំឲ្យរូបគេធ្លាក់ចេញពីការប្រកួតនេះ ជាផ្លូវការហើយ ព្រោះការប្រកួត ដែលចែកចេញជា ៦ ពូលនេះ គេកំណត់យកត្រឹមអ្នកបានលេខ ១ និងលេខ ២ តាមពូលនីមួយៗ ឡើងទៅប្រកួតខ្វែង រកអ្នកឈ្នះចំនួន ៨ នាក់ ឡើងទៅប្រកួតជុំផ្តាច់ព្រ័ត្រ យកតំណែងស្តេចអុក ឆ្នាំ ២០១៨ នៅអង្គរសង្រ្កាន្ត ខេត្តសៀមរាប។
កីឡាករជម្រើសជាតិ ហេង សៅឌី បានចាញ់ការប្រកួតលើកទី ១ ក្រោមស្នាដៃគូសត្រូវចាស់ គឺម្ចាស់ជើងឯករងស្តេចអុក ឆ្នាំ ២០១៧ កីឡាករជើងចាស់ ប៊ិន គាសេង ដែលធ្លាប់ចាញ់រូបគេ នៅវគ្គផ្តាច់ព្រ័ត្រ នៅអង្គរសង្រ្កាន្ត។ ក្រោយមក សៅឌី បានបន្តចាញ់ ឃុត ប្រិមប្រិយ មុនពេលរូបគេបានយកឈ្នះ សុខ សំបូរ ក្នុងការប្រកួតបង្រ្គប់កិច្ច លើកទី៣ ចុងក្រោយ។
យ៉ាងណាក៏ដោយ កីឡាករ ប៊ិន គាសេង ដែលទទួលបានចំណាត់ថ្នាក់លេខ ១ ប្រចាំពូលFនេះ ដោយឈ្នះទាំង៣ប្រកួតនោះ នៅតែសរសើរពីភាពរីកចម្រើនរបស់ ហេង សៅឌី ដែលជាកីឡាករសដ្ថិតក្នុងក្រុមជម្រើសជាតិ ជាមួយគ្នា។ លោកបាននិយាយក្រោយយកឈ្នះ ហេង សៅឌី ថា៖«ខ្ញុំមើលឃើញថា ហេង សៅឌី មានការរីកចម្រើនជាងមុន ប៉ុន្តែការចាញ់របស់គាត់ ដោយសារគាត់ភ្លាត់ស្នៀត ក្នុងការដើរកូនថយក្រោយមួយជើង ធ្វើឲ្យខ្ញុំអាចយកប្រៀបលើគាត់បាន»។
ផ្ទុយពីនេះអតីតស្តេចឆ្នាំ២០១៤ និងឆ្នាំ២០១៥ ឈាវ បូរ៉ា បានទទួលចំណាត់ថ្នាក់លេខ១ប្រចាំពូលC ដោយឈ្នះ២ និងស្មើ១ប្រកួត ឯលេខ២បានទៅកីឡាករ ធីម ឌីណា។ ចំណែកកីឡាករ អេង សេងហៀក បានលេខ១ប្រចាំពូលA លេខ២ ស៊ីវ ស៊ីន ខណៈពូលB លេខ១ សុខ លឹមហេង លេខ២ កែវ វឌ្ឍនា ពូលD លេខ១ ប៉ោ សារិទ្ធ លេខ ២ មាស សុភក្តិ ពូល E លេខ ១ ប៊ូ ប៉ុណ្ណម៉ាលីកា លេខ២ ឃឹម ឃឹម ហើយពូលF លេខ១ ប៊ិន គាសេង និងលេខ២ ឃុត ប្រិមប្រិយ។
ចំពោះការប្រកួតវគ្គខ្វែងនៅរសៀលនេះ កីឡាករ អេង សេងហៀក ត្រូវជួប ឃុត ប្រិមប្រិយ ស្របពេល ស៊ីវ ស៊ីន ត្រូវប្រឈមជាមួយ ប៊ិន គាសេង ហើយ សុខ លឹមហេង ត្រូវប៉ះ ឃឹម ឃឹម។ រីឯ កែវ វឌ្ឍនា ត្រូវប្រកួតជាមួយ ប៊ូ ប៉ុណ្ណម៉ាលីកា ខណៈ ឈាវ បូរ៉ា ត្រូវជួប មាស សុភក្តិ ហើយ ធីម ឌីណា ត្រូវប៉ះ ប៉ោ សារិទ្ធ។
អ្នកឈ្នះចំនួន ៦ នាក់ ក្នុងវគ្គខ្វែងនេះ នឹងទទួលបានឱកាសទៅប្រកួតជុំផ្តាច់ព្រ័ត្រ យកតំណែងស្តេចអុក ដោយស្វ័យប្រវត្តិ។ ចំណែកអ្នកចាញ់ទាំង ៦ នាក់ ត្រូវដាក់ឲ្យប្រកួតវិលជុំ ហើយអ្នកមានពិន្ទុខ្ពស់ជាងគេ គឺអ្នកបានលេខ ១ និងលេខ ២ នឹងទទួលបានឱកាសទៅប្រកួតជុំផ្តាច់ព្រ័ត្រ នៅអង្គរសង្រ្កាន្តដែរ៕