.jpg)
ប្រាក់ ធីវ៉ា របស់ភ្នំពេញក្រោនត្រូវបានរារាំងដោយកីឡាកររបស់សូលទីឡូអង្គរ កាលជំនួបជើងទី ១។ ភ្នំពេញក្រោន
ភ្នំពេញៈ ក្រុមកំពុងមានពិន្ទុនាំមុខដាច់នៅលីកកំពូលកម្ពុជា ឆ្នាំ ២០១៩ ព្រះខ័នរាជស្វាយរៀងបានចាត់ទុកការវិលមកជួបក្រុមបឹងកេតក្នុងការប្រកួតជើងទី ២ នេះជាចំណុចកាត់សេចក្តី ថាតើពួកគេនឹងត្រូវបានលើកពាន ឬក៏ត្រូវថមថយភាគរយមួយកម្រិត ចំណែកក្រុមលេខ ២ ណាហ្គាវើលក៏ត្រូវប្រឈមការប្រកួតដែលមានភាពតានតឹងផងដែរ។
ការឈ្នះ ១៦ និងស្មើ ៤ មាន ៥២ ពិន្ទុដាច់ឆ្ងាយពីគេបានធ្វើឲ្យក្រុមព្រះខ័នរាជស្វាយរៀងមានភាគរយស្ទើរតែ ៧០ ភាគរយទៅហើយសម្រាប់ការឆ្ពោះទៅរកការឈ្នះពាននៅរដូវកាលនេះ ហើយការជួបក្រុមបឹងកេតដែលពួកគេធ្លាប់បានស្មើ ២-២ ក្នុងទឹកដីកាលពីជើងទី ១ លើកនេះក្រុមស្វាយរៀងបានប្តេជ្ញារួមគ្នាស្វែងរកជ័យជម្នះ ដើម្បីធ្វើឲ្យឱកាសលើកពានរបស់គេកើនដល់ ៩៩ ភាគរយ។
លោក ជូ សារឿន គ្រូជំនួយក្រុមស្វាយរៀងបានប្រាប់កាលពីម្សិលមិញថា៖ «ការជួបក្រុមបឹងកេតលើកនេះវាប្រៀបដូចជាការប្រកួតសេចក្តីអ៊ីចឹងដែរ ព្រោះបើយើងឈ្នះ យើងនឹងមានឱកាសលើកពានរហូតដល់ ៩៩ ភាគរយគឺយើងលែងសូវបារម្ភចំពោះការទៅជួបក្រុមវិសាខា ណាហ្គាវើល និងក្រសួងការពារជាតិទៀតហើយដោយសារយើងមានពិន្ទុដាច់ពីគេ ហើយបើយើងឈ្នះ ១ ទៀតក្នុងចំណោម ៣ ក្រុមខាងលើនេះយើងដឹងតែលើកពាន ១០០ ភាគរយតែម្តងគឺគ្មានក្រុមណាតាមយើងទាន់ទៀតទេ»។
យ៉ាងណាក៏ដោយលោក ជូ សារឿន បានសម្តែងការបារម្ភផងដែរសម្រាប់ការធ្វើដំណើរមកជួបក្រុមបឹងកេតនៅថ្ងៃសៅរ៍នេះ។ លោកនិយាយថា៖ «យើងក៏មានការបារម្ភទៅលើទីលានរបស់បឹងកេតផងដែរ ហើយម្យ៉ាងទៀតបឹងកេតក៏ជាក្រុមខ្លាំង និងធ្លាប់ឈ្នះពាន ខណៈពេលនេះពួកគាត់មានកីឡាករល្អៗច្រើន ឯ ចាន់ វឌ្ឍនាកា ក៏វិលមកជួយក្រុមនេះវិញផងដែរ អ៊ីចឹងជំនួបលើកនេះនឹងក្លាយជាការប្រកួតដ៏អស្ចារ្យដែលយើងត្រូវប្តេជ្ញាប្រឹងប្រែងទាំងអស់គ្នា ដើម្បីស្វែងរកជ័យជម្នះ»។
ចំណែកលោក ហៅ សុជាតិ គ្រូបង្វឹកក្រុមបឹងកេតមិនអាចទាក់ទងសម្ភាសបានឡើងកាលពីម្សិលមិញ ប៉ុន្តែលោកធ្លាប់បានប្រាប់ភ្នំពេញថា៖ «ក្រុមបឹងកេតពេលនេះមានទម្រង់លេងល្អប្រសើរជាងជើងទី ១ ហើយបឹងកេតនៅតែរក្សាក្តីសង្ឃឹមក្នុងការប្រជែងជាមួយក្រុមស្វាយរៀង បើទោះបីជាបឹងកេតនៅសល់ភាគរយតិចតួចក៏ដោយ»។
ដោយឡែកក្រុមណាហ្គាវើលដែលកំពុងឈរនៅលេខ ២ មាន ៤៤ ពិន្ទុក៏ប្រឈមការលំបាកក្នុងការស្វែងរក ៣ ពិន្ទុបន្ថែមផងដែរ។ ទោះបីជា ណាហ្គាវើល ធ្លាប់ឈ្នះក្រុមឈរនៅលេខ ៥ អង្គរថាយហ្គឺរ ៤-០ កាលជើងទី ១ ប៉ុន្តែការទៅលេងនៅទីលានដ៏ស្មុគស្មាញរបស់អង្គរថាយហ្គឺរ វានឹងធ្វើឲ្យមានការប៉ះពាល់ដល់ទម្រង់លេងរបស់ណាហ្គាវើលជាមិនខាន។
ចំណែកក្រុមឈរនៅលេខ ៦ ភ្នំពេញក្រោន និងក្រុមទ័ពដែលមាន ៣៥ ពិន្ទុដូចគ្នានោះនឹងត្រូវប្រើកីឡដ្ឋានផ្ទាល់ខ្លួន ដើម្បីសងសឹកចំពោះការចាញ់កាលពីជើងទី ១ ដោយក្នុងនោះទ័ពត្រូវជម្រះបញ្ជីជាមួយក្រុមគិរីវង់ដែលពួកគេធ្លាប់ចាញ់ ៤-១ ហើយភ្នំពេញក្រោនត្រូវប៉ះសូលទីឡូអង្គរដែលពួកគេបានចាញ់ ១-០។ ផ្ទុយពីនេះក្រុមលេខ ៣ មាន ៤៤ ពិន្ទុ វិសាខាគឺមានភាគរយខ្ពស់បំផុតក្នុងការបន្តឈ្នះក្រុមយុវជនបាទីអាយុក្រោម ១៨ ឆ្នាំដែលពួកគេធ្លាប់បានឈ្នះ ៥-១ កាលជើងទី ១៕
កម្មវិធីប្រកួតនៅថ្ងៃសៅរ៍
-យុវជនបាទី.១៨ ឆ្នាំ v វិសាខា កីឡដ្ឋានសាលាបាល់ទាត់ជាតិបាទី ៣:៣០
-បឹងកេត v ស្វាយរៀង កីឡ.ខេមបូឌាអ៊ែរវ៉េ ៣:៣០
-ទ័ព v គិរីវង់ កីឡដ្ឋានស្តាតចាស់ ៦:០០
-ភ្នំពេញក្រោន v សូលទីឡូអង្គរ កីឡ.RSN ៦:០០
៣ ប្រកួតនៅថ្ងៃអាទិត្យ
-ខេត្តកំពង់ចាម v អាស៊ីអឺរ៉ុបនៅស្តាតចាស់ ៣:៣០
-អគ្គិសនីកម្ពុជា v ប៉ូលិស កីឡ.អគ្គិសនីកម្ពុជា ៣:៣០
-អង្គរថាយហ្គឺរ v ណាហ្គាវើល កីឡដ្ឋានខេត្តសៀមរាបម៉ោង ៣:៣០
