ភ្នំពេញ៖ ក្រុមម្ចាស់ជើងឯកលីកកំពូលកម្ពុជា ព្រះខ័នរាជស្វាយរៀង បានចាប់ផ្តើមការហ្វឹកហាត់ជាផ្លូវការហើយ ដើម្បីត្រៀមប្រកួតជម្រុះវគ្គ Play-off round នៃពានរង្វាន់ AFC Cup 2020 ជាមួយក្រុមមកពីលីកកំពូលឡាវ Master7 FC នៅក្នុងខែមករា ខាងមុខនេះ ហើយកីឡាករជើងចាស់ ឈិន ឈឿន និង ទៀង ទិនី ក៏មានវត្តមាននៅក្នុងការប្រមូលផ្តុំនោះដែរ។
លោក ជូ សារឿន គ្រូជំនួយក្រុមព្រះខ័នរាជស្វាយរៀង បានប្រាប់ភ្នំពេញ ប៉ុស្តិ៍ កាលពីល្ងាចថ្ងៃពុធថា៖ «យើងបានចាប់ផ្តើមហ្វឹកហាត់តាំងពីថ្ងៃចន្ទ ព្រោះនេះជាលើកទី ១ ដែលក្លិបព្រះខ័នរាជស្វាយរៀង បានទៅចូលរួមការប្រកួតជម្រុះពានរង្វាន់ AFC Cup តំណាងឲ្យប្រទេស កម្ពុជា ហេតុនេះយើងត្រូវតែរៀបចំលក្ខណសម្បត្តិឲ្យបានគ្រប់គ្រាន់ និងបានល្អប្រសើរ ដើម្បីត្រៀមការប្រកួតដ៏សំខាន់មួយនេះ»។
យ៉ាងណាក៏ដោយ សម្រាប់ការហ្វឹកហាត់របស់ពេល ២ ថ្ងៃមកនេះ ត្រូវបានលោក ជូ សារឿន បានប្រាប់ថា នៅមិនទាន់ឃើញវត្តមានកីឡាករបរទេសមកហ្វឹកហាត់ទេ ប៉ុន្តែរឿងដែលគួរឲ្យចាប់អារម្មណ៍នោះ គឺខ្សែប្រយុទ្ធចាស់វស្សា ឈិន ឈឿន ដែលក្លិបក្រសួងការពារជាតិ ទើបតែបានប្រកាសពីការចែកផ្លូវកាលពីថ្ងៃពុធ និងខ្សែការពារជើងចាស់ ទៀង ទិនី ដែលបានបញ្ចប់កុងត្រាជាមួយក្លិបវិសាខា សុទ្ធតែបានចូលរួមហ្វឹកហាត់ជាមួយក្លិបស្វាយរៀង ដើម្បីត្រៀមការប្រកួតនេះ។
លោក សារឿន បានបញ្ជាក់ថា៖ «ពិតហើយ ឈិន ឈឿន និង ទៀង ទិនី បានចូលរួមហ្វឹកហាត់ជាមួយក្លិបរបស់យើងជាផ្លូវការហើយ ហើយការឆាប់ចាប់ផ្តើមប្រមូលផ្តុំហ្វឹកហាត់នេះ មិនមែនយើងត្រៀមតែការប្រកួតជម្រុះពាន AFC Cup 2020 ប៉ុណ្ណោះទេ ប៉ុន្តែយើងត្រៀមទាំងការប្រកួតលីកកំពូលកម្ពុជា និងការប្រកួតពានរង្វាន់សម្តេច ហ៊ុន សែន រដូវកាល ឆ្នាំ ២០២០ ផងដែរ»។
សម្រាប់ការទទួលបានឱកាស ទៅប្រកួតជម្រុះពានរង្វាន់ AFC Cup 2020 ជាលើកដំបូងនេះ ក្រុមស្វាយរៀង នឹងត្រូវប្រកួតក្រៅទឹកដី និងក្នុងទឹកដីជាមួយក្រុម Master7 FC គឺលើកទី១ ត្រូវធ្វើនៅថ្ងៃទី ២២ និងលើកទី ២ នៅថ្ងៃទី ២៩ ខែមករា។ ចំណែកក្រុមឈ្នះនឹងត្រូវឡើងទៅលេងនៅវគ្គចាប់ពូល គឺឈរនៅពូល G ជាមួយនឹងក្រុមជើងឯកលីកកំពូលហ្វីលីពីន Ceres Negros ក្រុមជើងឯកលីកកំពូលឥណ្ឌូនេស៊ី Bali United និងក្រុមលេខ ៣ មកពីលីកកំពូលវៀតណាម Than Quang Ninh។
ដោយឡែកក្រុមជម្រើសជាតិកម្ពុជាអាយុក្រោម ១៩ ឆ្នាំ នឹងចេញដំណើរទៅចូលរួមការប្រកួតពានមិត្តភាពមាន ៣ ប្រទេសចូលរួម BTV International Football Tournament Cup នៅប្រទេស វៀតណាម ថ្ងៃនេះ ហើយការប្រកួតនេះ U19 កម្ពុជា និងត្រូវជួបក្រុមU20 វៀតណាម នៅថ្ងៃទីសៅរ៍ ហើយក្រុមម្ចាស់ផ្ទះ Becamex Binh Duong ត្រូវជួបក្រុម U20 មីយ៉ាន់ម៉ា នៅថ្ងៃអាទិត្យ។
ចំពោះក្រុមដែលឈ្នះក្នុងការប្រកួតវគ្គជម្រុះទាំង ២ ក្រុម នឹងឡើងទៅប្រកួតដណ្តើមយកលេខ ១ និងលេខ ២ នៅថ្ងៃទី ១៨ ខណៈក្រុមចាញ់ ត្រូវប្រកួតគ្នាដណ្តើមយកលេខ ៣ នៅថ្ងៃទី ១៧ ខែធ្នូ ហើយការប្រកួតនេះ វាបានក្លាយជាការប្រកួតដកស្រង់បទពិសោធមួយផងដែរ ចំពោះក្រុម U19 កម្ពុជា សម្រាប់ត្រៀមការប្រកួតជុំផ្តាច់ព្រ័ត្រពានរង្វាន់ AFC U19 Championship 2020 នៅប្រទេស អ៊ូសបេគីស្ថាន ក្នុងអំឡុងខែតុលា ឆ្នាំ ២០២០៕