.jpg)
ឆេង ម៉េង របស់វិសាខា បានព្យាយាមអូសបាល់រំលងខ្សែការពារស្វាយរៀង នាជំនួបជើងទី ១។CNCC
ភ្នំពេញ៖ ក្រុមខ្លាំងទាំង ៦ ដែលមានមូលដ្ឋានរឹងមាំជាងគេនៅលីកកំពូលកម្ពុជា រួមមានព្រះខ័នរាជស្វាយរៀង ណាហ្គាវើល បឹងកេត ក្រសួងការពារជាតិ និងភ្នំពេញក្រោន នឹងត្រូវវិលមកជួបគ្នា នៅចុងសប្តាហ៍នេះ ហើយវាក៏ជាជំនួប ដែលស្វាយរៀងសម្លឹងរកការឈ្នះពាន នៅមុនបិទរដូវកាល ឆ្នាំ ២០១៩ នេះផងដែរ។
ការប្រកួតប្រចាំសប្តាហ៍ទី ២២ នេះ ស្វាយរៀង និងត្រូវជួបក្រុមម្ចាស់ផ្ទះវិសាខា ហើយការវិលមកជួបគ្នារវាងក្រុមទាំង ២ នេះ វាបានក្លាយជាការប្រកួតដ៏សំខាន់ ដើម្បីបញ្ជាក់ថា តើក្រុមស្វាយរៀង អាចបន្តឈ្នះលើវិសាខា ដើម្បីឈ្នះពាន មុនបិទរដូវកាល ឬក៏វិសាខា ជាអ្នកឈ្នះ ដើម្បីបន្តក្តីសង្ឃឹមក្នុងការប្រជែងយកលេខ ១ ពីស្វាយរៀង នៅសប្តាហ៍បន្ទាប់។
ក្រុមស្វាយរៀង ធ្លាប់បានឈ្នះ វិសាខា ៥-៣ កាលជើងទី ១ ប៉ុន្តែលោក Conor Nestor គ្រូបង្វឹកក្រុមស្វាយរៀង បានទទួលស្គាល់ថា ការជួបក្រុមវិសាខា លើកនេះ ក្រុមរបស់លោកមានបញ្ហាប្រឈមច្រើនទាក់ទងទៅនឹងបញ្ហារបួសកីឡាករ និងការធ្វើការងារធ្ងន់ពេកនៅលើទីលាន ដោយសារតែ ស្វាយរៀង ទើបតែប្រកួតវគ្គ ១/២ ផ្តាច់ព្រ័ត្រពានសម្តេច ហ៊ុន សែន ជាមួយភ្នំពេញក្រោនកាលពីយប់ម្សិលមិញ។
ចំណែកក្រុមវិសាខា ក៏កំពុងតែមានបញ្ហាលើការប្រមូលអារម្មណ៍ផងដែរ ព្រោះការធ្លាក់ចេញពីការប្រកួត ១/២ ផ្តាច់ព្រ័ត្រពានសម្តេច ហ៊ុន សែន ដោយចាញ់បឹងកេត ៤-០ នោះ វាពិតជាធ្វើឲ្យមានការប៉ះពាល់អារម្មណ៍ខ្លាំងដល់សមាជិកវិសាខា។ ទោះយ៉ាងណា ពិតជាត្រូវការ ៣ ពិន្ទុ ជាចាំបាច់ ព្រោះការបរាជ័យនឹងធ្វើឲ្យពួកគេ លែងមានឱកាសប្រជែងយកលេខ ១ ទៀតហើយ ដោយសារពេលនេះ វិសាខា មាន ៥០ ពិន្ទុ គឺតិចជាង ក្រុមស្វាយរៀង ៨ ពិន្ទុទៅហើយ។
យ៉ាងណាមិញ ក្រុមកំពុងឈរនៅលេខ ៣ មាន ៤៧ ពិន្ទុ ណាហ្គាវើល នឹងត្រូវសងសឹកក្រុមបឹងកេត ដែលពួកគេធ្លាប់ចាញ់ ២-០ កាលពីជើងទី ១ ហើយក្រុមទាំង ២ នេះ មានមហិច្ឆតាចង់ឈ្នះបាន ៣ ពិន្ទុបន្ថែមដូចគ្នា។
ណាហ្គាវើល ត្រូវការឈ្នះ ដើម្បីឆ្ពោះទៅសម្រេចបំណង គឺការឡើងទៅឈរនៅលេខ ២ ឯបឹងកេត ត្រូវការ ៣ ពិន្ទុ ដើម្បីឡើងទៅឈរនៅតំបន់ Top4 វិញ ដូច្នេះជំនួបនេះនឹងមានភាពតានតឹងខ្លាំង។
ជាមួយគ្នានេះ ក្រុមក្រសួងការពារជាតិ (ទ័ព) នឹងត្រូវប្រើកីឡដ្ឋានរបស់ខ្លួន ដើម្បីសងសឹកក្រុមភ្នំពេញក្រោនវិញ។ ក្រុមកំពុងឈរនៅលេខ ៧ មាន ៣៥ ពិន្ទុ ទ័ពបានចាញ់ក្រុមឈរនៅលេខ ៦ មាន ៣៨ ពិន្ទុ ភ្នំពេញក្រោន ៣-១ កាលពីជើងទី ១ ហើយភ្នំពេញក្រោនក៏ជាអ្នកទម្លាក់ពួកគេចេញពីពានសម្តេច ហ៊ុន សែន ត្រឹមវគ្គ ៨ ក្រុមផងដែរ អ៊ីចឹងការជួបគ្នាលើកនេះ វាជាពេលវេលាដ៏ល្អសម្រាប់ទ័ព ក្នុងការជម្រះបញ្ជីចាស់ ខណៈភ្នំពេញក្រោន ក៏កំពុងថមថយកម្លាំងផងដែរ ដោយសារពួកគេទើបតែប្រកួតជាមួយក្រុមស្វាយរៀងកាលពីយប់ថ្ងៃព្រហស្បតិ៍៕
កម្មវិធីប្រកួតនៅថ្ងៃសៅរ៍
-ខេត្តកំពង់ចាម v ប៉ូលិស កីឡដ្ឋានស្តាតចាស់ ៣:៣០
-អគ្គិសនីកម្ពុជា v គិរីវង់ កីឡដ្ឋានអគ្គិសនីកម្ពុជា ៣:៣០
-អង្គរថាយហ្គឺរ v សូលទីឡូអង្គរ កីឡដ្ឋានសៀមរាប ៣:៣០
៤ ប្រកួត នៅថ្ងៃអាទិត្យ
-U18 យុវជនបាទី v អាស៊ីអឺរ៉ុប កីឡដ្ឋានសាលាបាល់ទាត់ ជាតិបាទី ៣:៣០
-បឹងកេត v ណាហ្គាវើល កីឡដ្ឋានខេមបូឌាអ៊ែរវ៉េ ៣:៣០
-វិសាខា v ស្វាយរៀង កីឡដ្ឋាន វិសាខា ៦:០០
-ទ័ព v ភ្នំពេញក្រោន កីឡដ្ឋានស្តាតចាស់ ៦:០០
