.jpg)
Kroos (ស) ស៊ុតបាល់ក្នុងប្រកួត Euro រវាងអាល្លឺម៉ង់និងបេឡារុសពីថ្ងៃសៅរ៍។ AFP
ក្រុងប៉ារីស៖ ក្រុមជម្រើសជាតិហូឡង់ អាល្លឺម៉ង់ និងក្រូអាត បានប្រកួតឈ្នះគូប្រជែងរៀងៗខ្លួន ដើម្បីមានឱកាសប្រកួតនៅក្របខ័ណ្ឌ Euro 2020 កាលពីថ្ងៃសៅរ៍ ខណៈប្រទេសទាំង ៣ នេះ បានកក់កៅអីរបស់ខ្លួនសម្រាប់ការប្រកួតចុងក្រោយនៅរដូវក្ដៅឆ្នាំក្រោយនេះ។
ជម្រើសជាតិហូឡង់របស់លោក Ronald Koeman ត្រូវការពិន្ទុថែមទៀត ដើម្បីមានឱកាសលេងក្នុងព្រឹត្តិការណ៍ធំនេះជាលើកដំបូងរបស់ពួកគេចាប់តាំងពីបានលេខ ៣ ក្នុងព្រឹត្តិការណ៍ World Cup ឆ្នាំ ២០១៤ និងទទួលបានអ្វីដែលពួកគេចង់បានក្រោយពីប្រកួត ០-០ ស្មើគ្នាជាមួយជម្រើសជាតិអៀរឡង់ខាងជើង នៅកីឡដ្ឋាន Belfast។
ខ្សែការពារ Van Dijk នៅក្លិប Liverpool បាននិយាយថា៖ «វាមានន័យច្រើនសម្រាប់យើងជាកីឡាករ ហើយសង្ឃឹមថា វាមានន័យច្រើនសម្រាប់ពលរដ្ឋហូឡង់ផងដែរ»។
លទ្ធផលនេះបានធ្វើឲ្យជម្រើសជាតិហូឡង់ឈរនៅលេខ ២ មាន ១៦ ពិន្ទុ ដែលកំពុងតាមពីក្រោយជម្រើសជាតិអាល្លឺម៉ង់ដែលមាន ១៨ ពិន្ទុ និងឈរនៅលេខ ១ នៃពូល C ក្នុងក្របខ័ណ្ឌ Euro 2020។
ទន្ទឹមនេះដែរ ក្រុមអាល្លឺម៉ង់បានប្រកួតឈ្នះជម្រើសជាតិបេឡារុស ៤-០ កាលពីថ្ងៃសៅរ៍ដែលធ្វើឲ្យពួកគេមានឱកាសឡើងទៅប្រកួត Euro ជាលើកទី ១៣ ជាប់ៗគ្នា។
គ្រាប់បាល់ ៤ គ្រាប់នេះ គឺ ២ គ្រាប់ រកបានដោយកីឡាករ Toni Kroos ហើយ ២ គ្រាប់ទៀត គឺរកបានដោយកីឡាករ Matthias Ginter និងកីឡាករ Leon Goretzka។
កីឡាករ Kroos បានបន្ទរតាមគ្រូបង្វឹកជម្រើសជាតិអាល្លឺម៉ង់លោក Joachim Loew ក្រោយពីការប្រកួតនេះថា៖ «ជារួម គឺយើងធ្វើបានល្អប៉ុន្តែនៅពេលនេះខ្ញុំមិនទាន់ហ៊ានថា យើងស្ថិតនៅក្នុងក្រុមដែលទទួលបានពានរង្វាន់អឺរ៉ុបនេះនៅឡើយទេ»។
ជ័យជម្នះទៅលើជម្រើសជាតិអៀរឡង់ខាងជើងនៅទីក្រុង Frankfurt ប្រទេស អាល្លឺម៉ង់ នៅថ្ងៃអង្គារនេះ នឹងធានាឲ្យក្រុមរបស់លោក Loew ជាក្រុមដែលបានកក់កៅអីមុនគេ។
ស្របពេលនោះដែរ ជម្រើសជាតិក្រូអាតបានប្រកួតឈ្នះជម្រើសជាតិស្លូវ៉ាគី ក្នុងលទ្ធផល ៣-១ នៅទីក្រុង Rijeka ប្រទេស ក្រូអាត ដើម្បីធានាបាននូវកៅអីសម្រាប់វគ្គបន្តនៅក្របខ័ណ្ឌអឺរ៉ុបនេះ។
ម្ចាស់ជើងឯករង World Cup មួយនេះត្រូវការតែ ១ ពិន្ទុប៉ុណ្ណោះ ដើម្បីធានាបាននូវការឆ្លងផុតពីវគ្គជម្រុះនៅក្នុងពូល E នេះប៉ុន្តែកីឡាករ Robert Bozenik បានធ្វើឱ្យអ្នកគាំទ្រភ្ញាក់ផ្អើលយ៉ាងខ្លាំងនៅពេលដែលរូបគេរកបាន ១ គ្រាប់ នាំមុខក្រុមម្ចាស់ផ្ទះក្រូអាតនៅនាទីទី ៣២។
ទោះយ៉ាងណា នៅក្នុងតង់ទី ២ កីឡាករ Nikola Vlasic រកបាន ១ គ្រាប់ សម្រាប់ក្រុមក្រូអាតវិញ ដើម្បីលុបចោលការនាំមុខរបស់ក្រុមភ្ញៀវនោះ ហើយកីឡាករ Bruno Petkovic បានបន្ថែម ១ គ្រាប់ទៀត មុនពេលកីឡាករ Ivan Perisic រកបាន ១ គ្រាប់ទៀត ដើម្បីធ្វើឲ្យក្រុមម្ចាស់ផ្ទះឈ្នះក្រុមភ្ញៀវ ៣-១។
កីឡាករ Petkovic បាននិយាយថា៖ «យើងកំពុងព្យាយាមអត់ធ្មត់នៅក្នុងបន្ទប់សម្រាកនៅក្នុងតង់ទី ១ ហើយយើងច្បាស់ថា យើងនៅតែមានគុណភាព។ យើងបានបន្តវាយបកនិងបង្កើតឱកាសរហូតរកបាន ៣ គ្រាប់បែបនេះ»៕ AFP/SN
