.jpg)
កីឡាករថៃហាក់ស្រងាកចិត្តពេលលោកអាជ្ញាកណ្តាលលើកដៃឲ្យ ឡុង សំណាង ជាអ្នកឈ្នះ។ រូប យឺន ពន្លក
ភ្នំពេញៈ អ្នកប្រដាល់ឆ្នើម ឡុង សំណាង របស់ក្លិបសាលន្តកីឡាបានប្រកួតឈ្នះកីឡាករជើងខ្លាំងរបស់ថៃ Sen Khom ត្រឹមពិន្ទុទាំងវេទនាភ្នែកនាជំនួបក្នុងកម្មវិធី Boostrong Fighter On Fire នៅលើសង្វៀន SEATV កាលព្រឹកថ្ងៃអាទិត្យ ហើយជាមួយគ្នានេះកីឡាករចាស់វស្សា ឌុម កែវដប មកពីក្លិបវាលស្បូវច្បារអំពៅត្រូវបានកីឡាករជើងថ្មី ឡុង ណងសៅ វ៉ៃឲ្យអាជ្ញាកណ្តាលរាប់ដល់ទៅ ៣ លើកមុននឹងចាញ់ដោយពិន្ទុយ៉ាងគ្រាំគ្រាខ្លួន។
ឡុង សំណាង ដែលធ្លាប់សាងភាពល្បីល្បាញខ្លាំង និងយកឈ្នះកីឡាករថៃយ៉ាងច្រើននោះគឺការប្រកួតមួយរយៈចុងក្រោយនេះហាក់មិនសូវបានល្អដូចមុនៗហើយការឈ្នះថៃ Sen Khom លើកនេះដូចជាវេទនាភ្នែកខ្លាំងណាស់ ទោះបីជារូបគេបានខិតខំប្រឹងបញ្ចេញក្បាច់អស់ពីសមត្ថភាពក៏ដោយ។
ក្នុងការប្រកួត ៥ ទឹកពេញ ឡុង សំណាង មានប្រៀបបន្តិចបន្តួចក្នុងទឹកទី ១ និងទឹកទី ២ ប៉ុណ្ណោះ ចំណែកនៅ ៣ ទឹកចុងក្រោយកីឡាករថៃវាយចេញបានល្អជាង និងមានចំនួនច្រើនជាងទាំងក្បាច់ទាត់ និងជង្គង់ ហើយក្បាច់ទាំងនេះបានធ្វើឲ្យ ឡុង សំណាង អស់ថាមពល និងដួលញឹកញាប់ផងដែរ ព្រមទាំងខ្សោយកម្លាំង។ ទោះជាយ៉ាងណាលទ្ធផលផ្លូវការពីសំណាក់ចៅក្រមទាំង ៥ ដែលផ្តល់ពិន្ទុបានប្រគល់ជ័យជម្នះទៅឲ្យ ឡុង សំណាង ឈ្នះកីឡាករថៃក្នុងលទ្ធផលពិន្ទុ ៣ ទល់ ២ ដែលធ្វើឲ្យមហាជនអ្នកទស្សនាមួយចំនួនធំបានហៅការសម្រេចក្តីជ័យជម្នះនេះមិនយុត្តិធម៌។
តាមការកំណត់សម្គាល់នៅក្នុង ៣ ប្រកួតចុងក្រោយនេះ ឡុង សំណាង គឺប្រកួតមានលក្ខណៈធ្លាក់ចុះជាងលើកមុនៗ ខណៈដែលជ័យជម្នះលើកនេះទំនងជាយឹតយោងច្រើនជាង រីឯ ២ ប្រកួតទៀត ឡុង សំណាង បានសន្លប់ដោយក្បាច់ជង្គង់របស់កីឡាករថៃឈ្មោះ Chhouk Chhai ក្នុងទឹកទី ២ នៅសង្វៀន CNC បន្ទាប់មកគេបានឈ្នះថៃ Pektang Kiatpontip នៅសង្វៀន PNN កាលពីថ្ងៃអាទិត្យទី ១២ ខែឧសភាសប្តាហ៍មុន។
ទោះយ៉ាងណាជុំវិញការទទួលបានជ័យជម្នះទាំងមិនទំនងលើកនេះលោក រាជ សុផែន ប្រធានបច្ចេកទេសបានពន្យល់ប្រាប់ភ្នំពេញប៉ុស្តិ៍ថា៖ «កីឡាករ Sen Khom វាយចេញច្រើន ប៉ុន្តែស្រាលៗមិនចំគោលដៅពេញនោះទេ ឯ ឡុង សំណាង ទោះបីវាយចេញមួយៗគឺចំគោលដៅល្អ និងធ្ងន់ដែលបច្ចេកទេសឲ្យពិន្ទុពេញល្អមានប្រៀបជាង»។
លោក រាជ សុផែន បានបន្ថែមថា៖ «ចៅក្រមផ្តល់ពិន្ទុឲ្យ ឡុង សំណាង ទទួលបានលទ្ធផលឈ្នះនេះគឺត្រឹមត្រូវហើយ ប៉ុន្តែការរិះគន់របស់បងប្អូនអ្នកទស្សនាគេចមិនផុតនោះទេព្រោះទោះបីខាងភាគីកីឡាករថៃ Sen Khom ឈ្នះក៏នៅតែមានអ្នកតវ៉ា ឬរិះគន់ដូចតែគ្នាអីចឹង»។
ចំណែកគូប្រដាល់ប្រកួតជក់ចិត្តមួយគូទៀត កីឡាករចាស់វស្សា ឌុម កែវដប បានចាញ់កីឡាករជើងខ្លាំងជំនាន់ក្រោយឡុង ណងសៅ របស់ក្លិបសាលវ័ន្ត ដោយឈឺខ្លួនមិនតិចទេ។ ក្នុងការប្រកួតចំនួន ២ ទឹកដំបូង ក្បាច់ជង្គង់របស់ ឡុង ណងសៅ បោះចូលពោះ និងទ្រូងរបស់ កែវដប ពេញៗបណ្តាលឲ្យអាជ្ញាកណ្តាលរាប់ដល់ ៨ ចំនួនដល់ទៅ ៣ លើក។
ទោះជាយ៉ាងណាចាប់ពីទឹកទី ៣ ទៅ ឌុម កែវដប បានប្តូរយុទ្ធសាស្ត្រមកវាយប្រើកណ្តាប់ដៃវិញម្តង ហើយមានប្រសិទ្ធភាពល្អដែលអាចបន្តការប្រកួតឈានចូលដល់ទឹកទី ៥ ប៉ុន្តែអ្វីៗមិនអាចស្តារដើមបានទេ ព្រោះចាញ់គេដាច់រាប់ចំនួន ៣ លើកក្នុងរយៈពេល ២ ទឹកដំបូងធ្វើឲ្យ ឌុម កែវដប ចាញ់យ៉ាងគ្រាំគ្រាខ្លួន៕
