ក្រុងវែលីងតោន៖ អតីតគ្រូបង្វឹកនូវែលសេឡង់លោក Steve Hansen បានបញ្ជាក់កាលពីថ្ងៃចន្ទថា គាត់នឹងទទួលយកតួនាទីជាមួយក្លិបបាល់បោះ Toyota Verblitz ដែលលេងនៅក្នុងលីកកំពូលរបស់ប្រទេស ជប៉ុន។
អាណត្តិរបស់លោក Hansen ជាមួយក្លិប All Blacks បានបញ្ចប់ក្រោយពីពួកគេបានបញ្ចប់ត្រឹមចំណាត់ថ្នាក់ទី ៣ ក្នុងព្រឹត្តិការណ៍ Rugby World Cup នៅប្រទេស ជប៉ុន ជាទីដែលពួកគេបានប្រកួតឈ្នះក្រុម Wales ៤០-១៧ ក្នុងការប្រកួតយកមេដាយសំរឹទ្ធ។
ក្នុងសេចក្ដីថ្លែងការណ៍តាមវីដេអូ លោក Hansen បាននិយាយថា តួនាទីរបស់គាត់នៅក្លិប Toyota Verblitz នេះនឹងផ្ដោតលើការប្រឹក្សាយោបល់ច្រើនជាងធ្វើជាគ្រូបង្វឹក។
លោក Hansen បាននិយាយទៀតថា៖ «ខ្ញុំមានការងារថ្មីមួយដែលពាក់ព័ន្ធនឹងការបង្ហាត់បង្ហាញ ប្រឹក្សាយោបល់ និងដំបូន្មាននៅក្លិបជប៉ុន Toyota Verblitz»។
គ្រូបង្វឹករូបនេះបានបន្ថែមថា៖ «វាមិនមែនជាគ្រូបង្វឹកទេ ប៉ុន្តែវាជាអ្នកប្រឹក្សាយោបល់ អ្នកណែនាំហើយវាតម្រូវឱ្យខ្ញុំទៅទីនោះរយៈពេល ៥ ទៅ ១៧ សប្តាហ៍ក្នុង ១ ឆ្នាំ»។
នេះគឺជាការចុះកុងត្រាធំបំផុតទី ២ របស់ក្លិប All Blacks សម្រាប់ក្លិប Verblitz បន្ទាប់ពីលោក Kieran Read ដែលបានបញ្ចប់អាជីពជាអន្ដរជាតិចំនួន ១២៧ របស់គាត់ក្រោយពីការប្រកួតបាល់ឱបពិភពលោកនេះ បានប្រកាសកាលពីដើមឆ្នាំនេះថា គាត់ក៏នឹងផ្លាស់ទៅទីនោះផងដែរ។
លោក Hansen ដែលបានធ្វើជាគ្រូបង្វឹកក្លិប All Blacks នៅពេលពួកគេបានឈ្នះពានរង្វាន់ World Cup ២០១៥ និងជាជំនួយការគ្រូនៅពេលពួកគេបានឈ្នះពានរង្វាន់នៅឆ្នាំ ២០១១ នោះនឹងធ្វើការជាមួយលោក Simon Cron អតីតជំនួយការគ្រូនៅក្លិប New South Wales Waratahs ដែលបច្ចុប្បន្នគាត់ជាគ្រូបង្វឹកក្លិប Verblitz ផងដែរ។
គ្រូបង្វឹករូបនេះបាននិយាយថា៖ «ឱកាសនេះជួយឲ្យខ្ញុំមានការរីកចម្រើន និងជាអ្វីម្យ៉ាងដែលពិតជាធ្វើឲ្យខ្ញុំរំភើបចិត្តមែនទែន»។
គ្រូបង្វឹករូបនេះបានបន្ថែមថា៖ «នៅពេលយើងចង់ចូលរួមនឹងក្រុម Toyota Verblitz ដ៏ជោគជ័យមួយនេះ យើងក៏ចង់បានបរិយាកាសមួយនៅក្លិបនេះដែលមនុស្សអាចមានមោទនភាពជាមួយ ហើយនោះក៏ដូចជាគ្រួសារមួយ និងក៏ដូចជាប្រភេទនៃអ្វីមួយដែលយើងមាននៅក្នុងក្លិប All Blacks ផងដែរ»។
លោក Hansen បានបន្តថា៖ «បើទោះជាវាមិនមែនជាតួនាទីគ្រូបង្វឹកពេញម៉ោងពិតមែន ប៉ុន្តែវាជាតួនាទីមួយដែលធ្វើឲ្យខ្ញុំនៅតែពាក់ព័ន្ធកីឡានេះដដែល»៕ AFP/SN