ក្រុង Madrid: ក្លិប Sevilla បាននិយាយពីថ្ងៃអង្គារថា ពួកគេបានចុះកុងត្រាជាមួយលោក Julen Lopetegui ដែលត្រូវបានបណ្ដេញចេញពីតំណែងជាគ្រូបង្វឹកក្រុមជម្រើសជាតិអេស្ប៉ាញនៅរយៈពេលមួយថ្ងៃមុនការរៀបចំប្រកួត World Cup ២០១៨ ឲ្យធ្វើជាអ្នកចាត់ការក្លិបនេះសម្រាប់រយៈពេល ៣ រដូវកាល។
គ្រូបង្វឹកវ័យ ៥២ ឆ្នាំដែលបានសម្រាកពីការងារតាំងពីក្លិប Real Madrid បានបណ្ដេញគាត់ចេញនៅចុងខែតុលាដោយសាររដូវកាលដ៏លំបាកនោះបានចូលកាន់តំណែងជាគ្រូបង្វឹកនៅក្លិប Sevilla ពីថ្ងៃពុធជំនួសលោក Joaquin Caparros។
លោក Caparros ដែលត្រូវបានគ្រូពេទ្យធ្វើរោគវិនិច្ឆ័យថាមានជំងឺឈាមសរ៉ាំរ៉ៃនោះបានប្រកាសនៅចុងរដូវកាលនេះថា គាត់នឹងចុះចេញពីតំណែងជាគ្រូបង្វឹក។
ក្រុម Sevilla បានជាប់ចំណាត់ថ្នាក់ទី ៦ ក្នុងក្របខ័ណ្ឌអេស្ប៉ាញ La Liga ក្រោយពីចាញ់ ៦ ប្រកួតចុងក្រោយធ្វើឲ្យក្រុមនេះបាត់ឱកាសលេងនៅក្របខ័ណ្ឌ Champions League រដូវកាលក្រោយ។
ក្លិប Sevilla បានធ្លាក់នៅវគ្គ ១៦ ក្រុមចុងក្រោយនៃក្របខ័ណ្ឌ Europa League នៅរដូវកាលនេះក្រោយពីក្រុម Slavia Prague របស់សាធារណរដ្ឋឆែក ៦-៥។
ខ្សែការពារ Sergio Escudero បានប្រាប់ស្ថានីយវិទ្យុរបស់ក្លិប Sevilla ថា៖ «ខ្ញុំគិតថាលោក Julen ត្រៀមខ្លួនជាស្រេចដើម្បីធ្វើការងារជាមួយពួកយើង។ គាត់គឺជាអ្នកកីឡាម្នាក់ដែលមានទំនាក់ទំនងនឹងក្រុមនេះ ក្លិបនេះ និងអ្វីៗផ្សេងទៀត»។
ខ្សែការពាររូបនេះបានបន្ថែមថា៖ «ខ្ញុំគិតថាយើងនឹងរៀនសូត្របានច្រើនក្នុងពេលដែលគាត់នៅទីនេះ។ ខ្ញុំជឿថា គាត់នឹងរកវិធីពង្រឹងសមត្ថភាពក្រុម ខិតខំធ្វើការ និងជួយឲ្យយើងឈរនៅចំណាត់ថ្នាក់ខ្ពស់នៅលើតារាង»។
ការដឹកនាំក្រុម Real Madrid របស់លោក Julen បានបញ្ចប់ទាំងភាពអាម៉ាស់នៅពេលពួកគេបានបណ្ដេញគាត់ចេញពីក្លិបនេះក្រោយពីចាញ់គូប្រជែងស៊ីសាច់ហុតឈាមរបស់ខ្លួនគឺក្លិប Barcelona ក្នុងលទ្ធផល ៥-១។
ពេលវេលារបស់គាត់នៅកីឡដ្ឋាន Santiago Bernabeu របស់ក្រុម Real Madrid មានរយៈពេលតែ ១៣៩ ថ្ងៃជាមួយការសម្រេចចិត្តចូលរួមក្លិបនេះបន្ទាប់ពីគាត់បានធ្វើជាគ្រូបង្វឹកក្រុមជម្រើសជាតិអេស្ប៉ាញសម្រាប់ព្រឹត្តិការណ៍ World Cup ឆ្នាំ ២០១៨ នៅប្រទេសរុស្ស៊ី។
សមាគមបាល់ទាត់អេស្ប៉ាញបានបណ្ដេញលោក Julen នៅខែមិថុនាឆ្នាំ ២០១៨ គឺនៅរយៈពេល ២ ថ្ងៃមុនពេលបើកឆាកប្រកួតរវាងប្រទេសអេស្ប៉ាញ និងព័រទុយហ្គាល់ក្រោយពីមានការលេចឮព័ត៌មានថា គាត់បានលួចលាក់ទៅចុះកុងត្រាជាមួយក្រុម Real។
អតីតអ្នកចាំក្រុម Real រូបនេះក៏ធ្លាប់បានដឹកនាំក្លិប Rayo Vallecano និងក្លិប Porto ផងដែរ៕ SN