ក្រុងស៊ីដនីៈ លោក Peter McNamara អតីតតារាវាយកូនបាល់ (Tennis) និងជាម្ចាស់ជើងឯក Wimbledon បានស្លាប់ក្នុងអាយុ ៦៤ ឆ្នាំដោយមានការចូលរួមបុណ្យសពពីមនុស្សម្នាជាច្រើន។ នេះបើយោងតាមមន្ត្រីពាក់ព័ន្ធបានឲ្យដឹងពីថ្ងៃចន្ទ។
លោក McNamara ដែលជាតារាវាយកូនបាល់ដ៏ល្បីឈ្មោះទាំងផ្នែកនារី និងបុរសនេះត្រូវបានរាយការណ៍ថា គាត់បានស្លាប់ដោយសារជំងឺមហារីកពងស្វាស។
ក្លិប Tennis Australia បាននិយាយថា៖ «យើងទាំងអស់គ្នាមានការក្រៀមក្រំចិត្តយ៉ាងខ្លាំងនៅពេលបានឮដំណឹងមរណភាពរបស់លោក Peter McNamara ដែលជាសមាជិកគួរឲ្យស្រឡាញ់ និងគោរពរបស់ក្រុមគ្រួសារវាយកូនបាល់របស់យើង»។
ក្លិបនេះបានបន្ថែមថា៖ «ការរួមចំណែករបស់លោកចំពោះវិស័យកីឡាទាំងក្នុងនាមជាកីឡាករ ជាគ្រូបង្វឹក និងជាអ្នកណែនាំនោះនឹងធ្វើឲ្យយើងមិនអាចបំភ្លេចបានឡើយ។ ចិត្តគំនិតរបស់យើងគឺស្ថិតនៅជាមួយក្រុមគ្រួសារ និងមិត្តភក្តិរបស់លោក»។
លោក McNamara បានជាប់ចំណាត់ថ្នាក់លេខ ៧ ក្នុងពិភពលោកនៅក្នុងអាជីពកីឡាវាយកូនបាល់របស់គាត់ដោយឈ្នះបានពានចំនួន ៥ ដូចគ្នានឹងអតីតកីឡាករវាយកូនបាល់អូស្ត្រាលី Paul MaNamee ផងដែរ។
កីឡាករទាំង ២ រូបនេះបានឈ្នះពាន Wimbledon នៅឆ្នាំ ១៩៨០ និងឆ្នាំ ១៩៨២ ព្រមទាំងពាន Australian Open នៅក្នុងឆ្នាំ ១៩៧៩ ផងដែរ។
លោក McNamee បាននិយាយតាមប្រព័ន្ធ Tweeter ថា៖ «គេពិបាកនឹងជឿថា ក្រោយមិត្តភាពរយៈពេល ៥០ ឆ្នាំមកពេលនេះកីឡាករ McNamara បានទៅចោលខ្ញុំទាល់តែសោះ»។
លោក McNamee បានបន្ថែមទៀតថា៖ «អ្នកបានរស់នៅក្នុងជីវិតពោរពេញដោយមិត្តភាពដែលធ្វើឲ្យយើងគ្រប់គ្នានឹងមានការនឹករឭកអ្នក និងនឹកឃើញដល់គ្រាដ៏អស្ចារ្យរបស់យើង»។
ក្រោយពីចូលនិវត្តន៍ពីការលេងកីឡានេះហើយលោក McNamara បានធ្វើជាគ្រូបង្វឹក និងណែនាំកីឡាករ Mark Philippoussis និងកីឡាករ Grigor Dimitrov មុនពេលធ្វើការជាមួយក្លិប Wang Qiang នៅប្រទេសចិន។
គ្រូបង្វឹក Patrick Mouratoglou បានហៅគាត់ថាជាកីឡាករដែលមានទម្រង់លេងល្អបំផុតគួបផ្សំនឹងឆន្ទៈដ៏មុតស្រួចរបស់គាត់ផងដែរ»។
គ្រូបង្វឹករូបនេះបានបន្ថែមថា៖ «គាត់បានធ្វើការងារដ៏អស្ចារ្យដោយមានលោក Grigor Dimitrov ជួយជ្រោមជ្រែងរូបគាត់»។
លោក Boris Becker អតីតកីឡាករវាយកូនបាល់បាននិយាយថា៖ «សូមឲ្យវិញ្ញាណក្ខន្ធលោក Peter McNamara ទៅកាន់សុគតិភព។ គាត់ជាកីឡាករល្អម្នាក់ក្នុងវិស័យកីឡាវាយកូនបាល់» ចំណែកអតីតគ្រូបង្វឹករបស់កីឡាករ Simona Haley លោក Darren Cahill បានចាត់ទុកគាត់ថា ជាកីឡាករដ៏អស្ចារ្យ និងគ្រូបង្វឹកអស្ចារ្យ ១ រូបដែលបានជួយបណ្ដុះបណ្ដាលសមត្ថភាពគ្រប់កីឡាករដែលគាត់បានធ្វើការជាមួយ»៕ SN