រដ្ឋស៊ីកាហ្គោ: ខ្សែការពារ DeAndre Yedlin របស់ក្រុម Newcastle នឹងដឹកនាំក្រុមជម្រើសជាតិសហរដ្ឋអាមេរិកប្រជុំដោយកីឡាករវ័យក្មេង ដែលត្រូវបានជ្រើសរើសកាលពីថ្ងៃអាទិត្យ សម្រាប់ការប្រកួតមិត្តភាពជាមួយនឹងក្រុមបាល់ទាត់ជម្រើសជាតិប្រេស៊ីល និងម៉ិកស៊ិក ខណៈដែលពួកគេមានតែកីឡាករ ៤ នាក់ប៉ុណ្ណោះដែលបានបង្ហាញខ្លួនជាអន្តរជាតិ ២០ លើក ឬច្រើនជាងនេះ។
ក្រុមជម្រើសជាតិអាមេរិក នឹងត្រូវប៉ះជាមួយនឹងក្រុមជម្រើសជាតិប្រេស៊ីល នៅថ្ងៃសុក្រនេះ នៅទីក្រុង East Rutherford រដ្ឋ New Jersey មុននឹងជួបជាមួយនឹងក្រុមជម្រើសជាតិម៉ិកស៊ិក ក្នុងទីក្រុង Nashville រដ្ឋ Tennessee នៅថ្ងៃទី ១១ ខែកញ្ញា។
Yedlin គឺជាកីឡាករមានបទពិសោធច្រើនជាងគេជាមួយនឹងការបង្ហាញខ្លួនជាអន្តរជាតិ ៥២ លើក ខណៈដែលខ្សែការពារ John Brooks (៣៣ លើក) របស់ក្លិប Wolfsburg និងខ្សែប្រយុទ្ធ Bobby Wood (៣៩ លើក) របស់ក្លិប Hannover 96 និង Gyasi Zardes (៣៧ លើក) របស់ក្លិប Columbus Crew គឺជា កីឡាករមានបទពិសោធច្រើនផ្សេងទៀតក្នុងក្រុមមួយ ដែលមានអាយុជាមធ្យម ២៣ ឆ្នាំ និង ២៤១ ថ្ងៃ។
លោក Dave Sarachan ដែលជាគ្រូបង្វឹកនៃក្រុមបាល់ទាត់ជម្រើសជាតិសហរដ្ឋអាមេរិក បានឲ្យដឹងថា៖ «សម្រាប់ការប្រកួតជាមួយនឹងក្រុមជម្រើសជាតិប្រេស៊ីល និងក្រុមម៉ិកស៊ិក គោលបំណងគឺនៅដដែល ខណៈយើងនឹងប្រើប្រាស់ឱកាសនៅពេលប្រកួតជាមួយនឹងក្រុមខ្លាំងទាំងនេះ ដើម្បីបន្តការកសាងមូលដ្ឋានគ្រឹះ ដែលយើងបានព្យាយាមបង្កើត»។
លោកបានប្រាប់បន្ថែមឲ្យដឹងទៀតថា៖ «យើងមានអារម្មណ៍ថា វាជារឿងដ៏ត្រឹមត្រូវក្នុងការបន្តការអនុញ្ញាតឲ្យក្រុមនេះទទួលបានបទពិសោធដ៏មានតម្លៃសម្រាប់គោលដៅដ៏ធំ ដែលក្នុងនោះរាប់បញ្ចូលទាំងការប្រកួតនានាទៅថ្ងៃអនាគត ដូចជាការប្រកួតជម្រុះក្នុងយុទ្ធនាការ Gold Cup អូឡាំពិក និង World Cup»។
ខ្សែបម្រើ Tim Weah វ័យ ១៨ ឆ្នាំរបស់ក្លិប Paris Saint-Germain គឺជាកីឡាករវ័យក្មេងជាងគេបំផុតដែលទទួលបានការកោះហៅ។
រូបគេបានស៊ុតបាល់បញ្ចូលទី ១ គ្រាប់ក្នុងពេលក្រុម PSG បានយកឈ្នះលើក្រុម Caen ក្នុងលទ្ធផល ៣-០ ក្នុងការប្រកួតបើករដូវកាលនៃក្របខ័ណ្ឌ Ligue កាលពីខែមុន។
Brooks ទើបតែបានរកគ្រាប់បាល់ទី ១ របស់គេសម្រាប់ក្រុមអាល្លឺម៉ង់ Wolfsburg ក្នុងពេលយកឈ្នះលើក្រុម Schalke ២-១ កាលពីខែមុន។
ខ្សែប្រយុទ្ធ Andrija Novakovich ដែលមកពីក្លិបហូឡង់ Fortuna Sittard នឹងចូលរួមជាមួយនឹងខ្សែប្រយុទ្ធជើងចាស់ ស្របពេលដែលខ្សែបម្រើ Julian Green របស់ក្លិបអាល្លឺម៉ង់ Greuther Furth នឹងស្ថិតក្នុងចំណោមខ្សែបម្រើផ្សេងទៀតក្នុងក្រុមនេះ។
កីឡាករផ្សេងទៀតដែលទទួលបានការកោះហៅមកពីក្លិបនៅអឺរ៉ុប រួមមានអ្នកចាំទី Ethan Horvath របស់ក្លិបបែលហ្ស៊ិក Brugge និងខ្សែការពារ Matt Miazga របស់ក្លិបបារាំង Nantes, Eric Lichaj របស់ក្លិប អង់គ្លេស Hull, Cameron Carter-Vickers របស់ក្លិបអង់គ្លេស Swansea, Shaq Moore របស់ក្លិបអេស្ប៉ាញ Reus Deportivo និង Antonee Robinson របស់ក្លិប Wigan៕