អៀរឡង់: អតីតម្ចាស់ជើងឯកអាល្លឺម៉ង់ និងហូឡង់ នឹងត្រូវជួបគ្នាម្តងទៀតក្នុងការប្រកួតជម្រុះសម្រាប់ព្រឹត្តិការណ៍ Euro ឆ្នាំ ២០២០ ក្រោយពីត្រូវបានដាក់ឲ្យស្ថិតក្នុងពូលតែ ១ ក្នុងការចាប់ឆ្នោតកាលពីថ្ងៃអាទិត្យ ក្នុងទីក្រុង Dublin ប៉ុន្តែ ក្រុមបាល់ទាត់ជម្រើសជាតិអង់គ្លេស ដែលឈានទៅវគ្គពាក់កណ្តាលផ្តាច់ព្រ័ត្រនៃព្រឹត្តិការណ៍ World Cup មិនមានហេតុផលច្រើនក្នុងការត្អូញត្អែរឡើយ។
អាល្លឺម៉ង់ គឺជាក្រុមដែលផ្តល់នូវគ្រោះថ្នាក់បំផុត ក្នុងក្រុមកម្រិតទី ២ នៃចំណាត់ថ្នាក់ ក្រោយពីធ្លាក់ចេញពីលីកកំពូលរបស់ Nations League ក្រោយពីចាញ់ក្រុមជម្រើសជាតិហូឡង់ ក្នុងលទ្ធផល ៣-០ កាលពីខែតុលា។
អាល្លឺម៉ង់ នឹងបើកយុទ្ធនាការរបស់ពួកគេតាមរយៈការធ្វើដំណើរទៅកាន់ទឹកដីក្រុមហូឡង់ នៅថ្ងៃទី ២៤ ខែមីនា នៅមុនពេលធ្វើជាម្ចាស់ផ្ទះប្រទេសជិតខាងរបស់ពួកគេ នៅថ្ងៃទី ៦ ខែកញ្ញា។
ក្រុមជម្រើសជាតិអៀរឡង់ខាងជើង អេស្តូនី និងបេឡារុស គឺជាក្រុមដែលមានកាតព្វកិច្ចត្រូវបង្កើតឲ្យមានការភ្ញាក់ផ្អើលក្នុងពូល C។
ប៉ុន្តែ ទោះបីជាយ៉ាងណា ស្របពេលដែលក្រុមឈរលេខ ១ និងលេខ ២ ក្នុងពូលជម្រុះនីមួយៗ នឹងឈ្នះកៅអីជាស្វ័យប្រវត្តិសម្រាប់យុទ្ធនាការមាន ២៤ ក្រុម ដែលនឹងត្រូវរៀបចំឡើងក្នុងប្រទេសម្ចាស់ផ្ទះ ១២ ជាលើកទី ១ មានការរំពឹងទុកតិចតួចណាស់ដែលក្រុមខ្លាំងៗអវត្តមាននោះ។ កៅអីចំនួន ៤ ផ្សេងទៀត នឹងត្រូវផ្តល់ឲ្យតាមរយៈការប្រកួត Playoff ក្នុងយុទ្ធនាការ Nations League។
គ្រូបង្វឹកនៃក្រុមអាល្លឺម៉ង់ លោក Joachim Loew ដែលកំពុងតែស្ថិតក្រោមសម្ពាធក្នុងការស្តារមុខមាត់វិញ ក្រោយពីធ្លាក់ចេញត្រឹមវគ្គចែកពូលនៃព្រឹត្តិការណ៍ World Cup នៅរុស្ស៊ីនោះ បានឲ្យដឹងថា៖ «ពូលនេះ ពិតជាប្រជុំដោយក្រុមខ្លាំង។ ហូឡង់ និងអាល្លឺម៉ង់ គឺជាក្រុមមានក្តីសង្ឃឹមច្រើនជាងគេ ប៉ុន្តែ ក្រុមទាំង ២ គួរតែអាចមានសមត្ថភាពទៅវគ្គបន្ត»។
ក្រុមហូឡង់ដែលប្រជុំដោយកីឡាករវ័យក្មេង កំពុងតែវិលទៅរកភាពខ្លាំង ក្រោមការដឹកនាំរបស់លោក Ronald Koeman ក្រោយពីខកខានក្នុងការឈ្នះកៅអីទាំងក្នុងយុទ្ធនាការ Euro ឆ្នាំ ២០១៦ និង World Cup កាលពីពាក់កណ្តាលឆ្នាំនេះ។
ស្របពេល Amsterdam ជាទីក្រុងមួយក្នុងចំណោមទីក្រុងម្ចាស់ផ្ទះទាំងអស់ លោក Koeman ការឈ្នះកៅអីទៅវគ្គបន្ត គឺជាអាទិភាពជាងការយកឈ្នះមួយផ្សេងទៀតលើអាល្លឺម៉ង់។
លោក Koeman ដែលបានដឹកនាំឲ្យក្រុមជម្រើសជាតិហូឡង់ ទៅវគ្គ ៤ ក្រុមចុងក្រោយនៃយុទ្ធនាការ Nations League បានឲ្យដឹងថា៖ «ប្រសិនបើអ្នកសម្លឹងមើលត្រឡប់ទៅកាលពី ១ ឆ្នាំមុន និងការគិតរបស់អ្នកគាំទ្រលើក្រុមជម្រើសជាតិនេះ វាពិតជាមានភាពខុសគ្នាទាំងស្រុងក្នុងដំណាក់កាលនេះ»។
វគ្គពាក់កណ្តាលផ្តាច់ព្រ័ត្រ និងវគ្គផ្តាច់ព្រ័ត្រ នឹងត្រូវរៀបចំឡើងនៅកីឡដ្ឋាន Wembley ដែលនឹងធ្វើឲ្យក្រុមជម្រើសជាតិអង់គ្លេស ទទួលបាននូវការលើកទឹកចិត្តបន្ថែមទៀតក្នុងការឈ្នះពាន Euro ជាលើកទី ១ ក្រោយពីការឈានទៅវគ្គ ៤ ក្រុមចុងក្រោយក្នុង World Cup នៅឆ្នាំនេះ។
ក្រុមរបស់លោក Gareth Southgate គួរតែមានការបារម្ភតិចតួចណាស់ក្នុងពូល A ក្រោយពីត្រូវលេងការប្រកួតបើកឆាករបស់ខ្លួនលើទឹកដីខ្លួនឯងជាមួយនឹងសាធារណរដ្ឋឆែក នាថ្ងៃទី ២២ ខែមីនា នោះអង់គ្លេស ក៏ត្រូវប៉ះជាមួយនឹងក្រុមជម្រើសជាតិបេឡារុស ម៉ុងតេណេហ្រ្គោ និងកូសូវ៉ូ ផងដែរ៕