ក្រុងមីឡាន៖ រដ្ឋមន្ត្រីកីឡានៅប្រទេស អ៊ីតាលី បានប្រកាសពីល្ងាចថ្ងៃចន្ទថា ការប្រកួតលីក Serie A មួយចំនួននៅប្រទេស អ៊ីតាលី និងការប្រកួតក្របខ័ណ្ឌ Europa League នឹងត្រូវបានធ្វើដោយបិទទ្វារ ដើម្បីប្រយុទ្ធប្រឆាំងនឹងការរាលដាលនៃមេរោគកូរ៉ូណា។
រដ្ឋមន្ត្រីកីឡាលោក Vincenzo Spadafora បាននិយាយក្រោយពីកិច្ចប្រជុំក្រុមប្រឹក្សាគណៈរដ្ឋមន្ត្រីថា៖ «ក្រោយពីមានតម្រូវការនៃពិភពកីឡា និងដោយដឹងថា ការហាមឃាត់ព្រឹត្តិការណ៍កីឡាជាសាធារណៈនៅតែមាននៅក្នុងតំបន់ចំនួន ៦ នៅភាគខាងជើងប្រទេស អ៊ីតាលី នោះ យើងបានយល់ព្រមធ្វើការប្រកួតមួយចំនួនដោយបិទទ្វារជិត»។
ក្លិប Inter Milan ផ្ទាល់បានប្រកាសពីការប្រកួតរបស់ខ្លួនជាមួយក្រុម Ludogorets នៅក្នុងក្របខ័ណ្ឌ Europa League នៅរាត្រីថ្ងៃពុធ នឹងត្រូវធ្វើដោយគ្មានវត្តមានរបស់អ្នកគាំទ្រនោះឡើយ។
សេចក្ដីប្រកាសរបស់ក្លិប Inter នេះបាននិយាយថា៖ «នៅក្នុងកិច្ចព្រមព្រៀងជាមួយសហភាពបាល់ទាត់ UEFA នោះ ក្រុមមន្ត្រីសុខាភិបាលនៅតំបន់ Lombardy និងក្រុមប្រឹក្សាក្រុងមីឡានបានកំណត់ថា ការប្រកួតរបស់យើងជាមួយក្រុម Ludogorets នឹងត្រូវធ្វើដោយបិទទ្វារជិត»។
រដ្ឋមន្ត្រីកីឡារូបនេះមិនបានបញ្ជាក់ច្បាស់ថា តើការប្រកួតនៅក្របខ័ណ្ឌ Serie A ចំនួនប៉ុន្មាននៅចុងសប្ដាហ៍នេះ នឹងត្រូវរួមបញ្ចូលនៅក្នុងបំរាមនេះ ឬយ៉ាងណានោះទេ។
មានការប្រកួតចំនួន ៦ នៅក្នុងតំបន់ដែលរដ្ឋមន្ត្រីរូបនេះបានបញ្ជាក់រួមទាំងការប្រកួតនៅល្ងាចថ្ងៃអាទិត្យ រវាងក្រុមឈរកំពូលតារាង Juventus និងក្រុម Inter ដែលឈរនៅលេខ ៣ ផងដែរ។
ប្រទេស អ៊ីតាលី បានរាយការណ៍ពីចំនួនអ្នកស្លាប់ដោយសារមេរោគនេះមានចំនួន ៧ នាក់កាលពីថ្ងៃចន្ទ ហើយប្រទេសនេះត្រូវបានបញ្ជាក់ថា មានករណីឆ្លងមេរោគនេះច្រើនជាងគេបំផុតនៅតំបន់អឺរ៉ុប។
ទីក្រុងចំនួន ១១ កន្លែងដែលក្នុងនោះ ១១ កន្លែងនៅតំបន់ Lombardy និងមួយទៀតនៅតំបន់ Veneto នោះត្រូវបានដាក់បំរាមដោយប្រជាពលរដ្ឋប្រហែលចំនួន ៥០ ០០០ នាក់ត្រូវបានហាមឃាត់មិនឲ្យចាកចេញពីតំបន់ទាំងនោះ។
ការប្រកួតក្របខ័ណ្ឌ Champions League រវាងក្រុម Napoli និងក្រុម Barcelona ពីថ្ងៃអង្គារ គឺមិនស្ថិតក្នុងហានិភ័យនោះទេ។
ការសម្រេចចិត្តហាមឃាត់អ្នកគាំទ្រមិនឲ្យចូលទស្សនានេះ គឺជាជម្រើសពិសេសមួយបើមិនដូច្នោះទេ គឺត្រូវពន្យារពេលប្រកួតប៉ុន្តែលោក Gabriele Gravina ជាប្រធានសហព័ន្ធបាល់ទាត់អ៊ីតាលីបានបញ្ជាក់យ៉ាងច្បាស់នៅព្រឹកថ្ងៃនោះថា គាត់បានជំទាស់នឹងរឿងនោះ។
លោក Gravina បានប្រាប់សារព័ត៌មានថា៖ «យើងបានស្នើសុំជាផ្លូវការសុំឲ្យរដ្ឋមន្ត្រីសុខាភិបាលលោក Roberto Speranza អនុញ្ញាតឲ្យមានការប្រកួតនេះដោយបិទទ្វារ ហើយយើងរំពឹងថា នឹងមានការឆ្លើយតបប៉ុន្តែយើងត្រូវបានគេប្រាប់ថា លទ្ធផលនេះនឹងវិជ្ជមាន»។
កីឡាផ្សេងទៀតក៏ត្រូវបានប៉ះទង្គិចជាមួយគណៈកម្មាធិការអូឡាំពិកអ៊ីតាលី (CONI) ផងដែរ ដោយបញ្ជាក់ថា តាមការណែនាំរបស់រដ្ឋាភិបាល គឺរាល់ព្រឹត្តិការណ៍ទាំងអស់នៅតំបន់ Lombardy និង Veneto នឹងត្រូវពន្យារពេល៕ AFP/SN