ក្រុងប៉ារីស៖ ជម្រើសជាតិអ៊ុយក្រែនបានកក់កៅអីសម្រាប់ព្រឹត្តិការណ៍ Euro 2020 ក្រោយពីបានឈ្នះជម្រើសជាតិព័រទុយហ្គាល់ ២-១ ខណៈខ្សែប្រយុទ្ធ Cristiano Ronaldo រកបានគ្រាប់បាល់ទី ៧០០ ក្នុងរាត្រីមួយដែលក្រុមអ្នកគាំទ្រជម្រើសជាតិប៊ុលហ្គារីបានរើសអើងជាតិសាសន៍ នៅពេលពួកគេបានចាញ់ជម្រើសជាតិអង់គ្លេស ៦-០ នៅក្នុង ទីក្រុង Sofia ប្រទេស ប៊ុលហ្គារី។
ក្នុងប្រកួតរវាងក្រុមអ៊ុយក្រែន និងក្រុមព័រទុយហ្គាល់នេះ ក្រុមអ៊ុយក្រែនបាននាំមុខ ២ គ្រាប់មុន ដែលគ្រាប់ទី១ រកបានដោយកីឡាករ Roman Yaremchuk ក្នុងនាទីទី ៦ មុនពេលកីឡាករ Andriy Yarmolenko បានបន្ថែម ១ គ្រាប់ទៀត ក្នុងនាទីទី ២៧ ប៉ុន្តែក្នុងនាទីទី ៧២ កីឡាករ Ronaldo បានស៊ុតបាល់ពិន័យ ១១ ម៉ែត្រ សម្រាប់ក្រុមព័រទុយហ្គាល់ពីថ្ងៃចន្ទ ដែលជាគ្រាប់បាល់ទី ៧០០ របស់គាត់ក្នុងការប្រកួតទាំងអស់។
ឥឡូវនេះ ក្រុមអ៊ុយក្រែនបានចូលរួមនឹងក្រុមប៉ូឡូញ ក្រុមរុស្ស៊ី ក្រុមអ៊ីតាលី និងក្រុមបែលហ្ស៊ិក ដើម្បីកក់កៅអីលេងនៅ Euro 2020 ដែលនឹងចាប់ផ្ដើមធ្វើនៅទីក្រុងរ៉ូម ប្រទេស អ៊ីតាលី នៅថ្ងៃទី ១២ ខែមិថុនា។
ការឈរនៅលេខ ២ របស់ក្រុមព័រទុយហ្គាល់ក្នុងពូល B គឺនៅមានការប្រទាញប្រទង់គ្នាជាមួយក្រុមស៊ែប៊ីដែលចាញ់ក្រុមព័រទុយហ្គាល់ ១ ពិន្ទុប៉ុន្តែនៅសល់ ២ ប្រកួតទៀត ក្រោយពីពួកគេបានឈ្នះក្រុមលីទុយអានី ក្នុងលទ្ធផល ២-១។
ខ្សែបម្រើក្រុមព័រទុយហ្គាល់ Danilo បាននិយាយថា៖ «មានថ្ងៃជាច្រើនដូចថ្ងៃនេះនៅពេលបាល់មិនព្រមចូលទី ហើយឥឡូវនេះយើងត្រូវការឈ្នះ ២ ប្រកួតចុងក្រោយ ដើម្បីមានឱកាសលេងនៅ Euro 2020»។
ទន្ទឹមនេះដែរ ក្រុមអង់គ្លេសដែលឈរនៅលើកំពូលតារាងនៃពូល A នៅតែរង់ចាំការកក់កៅអីសម្រាប់ការប្រកួត Euro នេះនៅឡើយ ទោះជាបានលត់ក្រុមប៊ុលហ្គារី ចាស់ដៃ ៦-០ ក៏ដោយ ខណៈក្រុមអ្នកគាំទ្រប៊ុលហ្គារីបានស្រែកពាក្យសម្ដីរើសអើងជាតិសាសន៍ធ្វើឲ្យផ្អាកការប្រកួតនេះចំនួន ២ លើក។
នេះជាការប្រកួតមួយទៀតរបស់ក្រុមអង់គ្លេសដែលរងការរើសអើងជាតិសាសន៍ពីក្រុមគូប្រជែងរបស់ខ្លួន បន្ទាប់ពីកីឡាករស្បែកខ្មៅអង់គ្លេសបានក្លាយជាគោលដៅនៃការសើចចំអកនៅពេលពួកគេបានទទួលជ័យជម្នះ ៥-១ ទៅលើក្រុមម៉ុងតេណេហ្គ្រោកាលពីខែមីនា។
កម្រិតនៃការបៀតបៀនពីផ្នែកមួយនៃការគាំទ្រក្រុមប៊ុលហ្គារីនេះ បានធ្វើឱ្យសមាគមបាល់ទាត់អង់គ្លេសទាមទារឱ្យមានការស៊ើបអង្កេតពីគណៈគ្រប់គ្រងបាល់ទាត់អឺរ៉ុប ហៅកាត់ UEFA បើកការស៊ើបអង្កេតដែល «ជាបញ្ហាបន្ទាន់» មួយ។
កីឡាករ Tyrone Mings គឺជាជនរងគ្រោះម្នាក់ក្នុងចំណោមកីឡាករផ្សេងទៀតនៅក្នុងការប្រកួតនេះ ហើយរូបគេបាននិយាយថា ការបញ្ឈប់ការប្រកួតនេះពិតជាមានផលតាមបំណងនៃការកាត់បន្ថយការរើសអើងជាតិសាសន៍នៅក្នុងតង់ទី ២។
កីឡាករ Mings បាននិយាយថា៖ «យើងបានសម្រេចចិត្តនៅតង់ទី ១ ថា នឹងចេញពីទីលានប្រកួត ហើយចូលមកលេងវិញព្រោះយើងបានគិតថា វាជាការសម្រេចចិត្តត្រឹមត្រូវមួយ ហើយប្រសិនបើមានរឿងអ្វីមួយផ្សេងទៀតកើតឡើង យើងនឹងចាត់វិធានការសមរម្យតែម្ដង»។
ក្រុមរបស់លោក Gareth Southgate ឥឡូវនេះរកបាន ២៦ គ្រាប់ ក្នុង ៦ ប្រកួត និងមាន ៤ ពិន្ទុនាំមុខក្រុមកូសូវ៉ូ ដែលឈរនៅលេខ ៣ ជាមួយការនៅសល់ ២ ប្រកួតទៀត។
ទោះយ៉ាងណា ជ័យជម្នះរបស់ក្រុមកូសូវ៉ូទៅលើក្រុមម៉ុងតេណេហ្គ្រោ មានន័យថា ក្រុមអង់គ្លេសត្រូវការជ័យជម្នះ ១ លើកទៀត ក្នុងចំណោម ២ ប្រកួតដែលនៅសល់នោះ ដើម្បីធានាមានឱកាសលេងនៅព្រឹត្តិការណ៍អឺរ៉ុបកំពូលមួយនេះ៕ AFP/SN