.jpg)
ប៉ូលិសចាប់ខ្លួនអ្នកគាំទ្របង្កបញ្ហាក្នុងប្រកួតរវាងឥណ្ឌូនេស៊ី និងម៉ាឡេស៊ីពីខែកញ្ញា។ AFP
ក្រុងហ្សាការតា៖ សមាគមបាល់ទាត់ជាតិប្រទេស ឥណ្ឌូនេស៊ី (PSSI) បានរងការពិន័យពីសហព័ន្ធបាល់ទាត់ពិភពលោក (FIFA) ដោយសារបញ្ហាហ្វូងអ្នកគាំទ្រក្នុងការប្រកួតវគ្គជម្រុះ World Cup ជាមួយជម្រើសជាតិម៉ាឡេស៊ី។ នេះបើយោងតាមសហព័ន្ធបាល់ទាត់ FIFA បានឲ្យដឹងកាលពីថ្ងៃពុធ។
សមាគមបាល់ទាត់ឥណ្ឌូនេស៊ីត្រូវបានពិន័យជាប្រាក់ចំនួន ៤៥.០០០ ដុល្លារអាមេរិក ដោយសារការបង្កឲ្យមានភាពចលាចលនៅក្នុងទីក្រុងហ្សាការតា ប្រទេស ឥណ្ឌូនេស៊ី កាលពីខែមុននៅពេលក្រុមអ្នកគាំទ្រជម្រើសជាតិម៉ាឡេស៊ីបានរងការគំរាមកំហែង និងរងរបួសដោយវត្ថុរឹងដែលត្រូវបានគេចោលទៅលើពួកគេនៅក្នុងការប្រកួតដែលក្រុមជាភ្ញៀវបានទទួលជ័យជម្នះក្នុងលទ្ធផល ៣-២ នៅពេលនោះ។
លោក Syed Saddiq រដ្ឋមន្ត្រីយុវជន និងកីឡា នៅប្រទេស ម៉ាឡេស៊ី ត្រូវបានជម្លៀសចេញពីការប្រកួតនោះ ខណៈអំពើហិង្សាបានកើតឡើងដែលបណ្ដាលឲ្យមានការសុំទោសពីសមភាគីនៃប្រទេស ឥណ្ឌូនេស៊ី ផងដែរ។
លោកស្រី Ratu Tisha Destria អគ្គលេខាធិការសមាគមបាល់ទាត់បាននិយាយក្នុងរបាយការណ៍កាលពីថ្ងៃពុធថា៖ «សមាគមបាល់ទាត់ឥណ្ឌូនេស៊ី (PSSI) គោរពតាមនីតិវិធីស្របច្បាប់ និងសេចក្ដីសម្រេចចិត្តរបស់សហព័ន្ធបាល់ទាត់ FIFA» ហើយលោកស្រីបានបន្ថែមថា គេនឹងធ្វើការកែប្រែ ដើម្បីកុំឲ្យអំពើហិង្សាបែបនេះនឹងកើតឡើងជាថ្មីទៀតនៅពេលអនាគត»។
ការប្រកួតជម្រុះជាមួយជម្រើសជាតិវៀតណាមដែលគេគ្រោងនឹងធ្វើនៅសប្ដាហ៍ក្រោយនោះ នឹងត្រូវប្ដូរចេញពីទីក្រុងហ្សាការតាទៅធ្វើនៅលើកោះបាលីវិញ ដើម្បីចៀសវាងបញ្ហាដែលបង្កឡើងដោយហ្វូងអ្នកគាំទ្រកើតឡើងបែបនេះម្ដងទៀត។
ឧប្បត្តិហេតុនេះបានកើតឡើងក្រោយពីសមាគម PSSI បាននិយាយនៅដើមឆ្នាំនេះថា ប្រទេស ឥណ្ឌូនេស៊ី និងអូស្ត្រាលី កំពុងជជែកគ្នាអំពីការដេញថ្លៃរួមគ្នាទទួលរៀបចំព្រឹត្តិការណ៍បាល់ទាត់ពិភពលោកឆ្នាំ ២០៣៤។
ឧប្បត្តិហេតុនេះបានបង្កឲ្យមានបញ្ហាសម្រាប់វិស័យបាល់ទាត់នៅប្រទេស ឥណ្ឌូនេស៊ី ជាទីដែលការប្រកួតលីក វិជ្ជាជីវៈត្រូវបានល្អក់កករដោយសារបញ្ហាជាច្រើនរួមទាំងរឿងអាស្រូវកំណត់លទ្ធផលប្រកួតជាមុន និងការបង្កហិង្សាដែលបណ្ដាលឲ្យស្លាប់មនុស្សនេះផងដែរ៕ AFP/SN
