.jpg)
ឈុត សេរីវ៉ាន់ថង បានទាត់សន្ធាប់ទៅលើជើងក្រោមរបស់ Phit Bunmey។ ស្រេង ម៉េងស្រ៊ុន
ភ្នំពេញៈ កីឡាករជើងខ្លាំងវ័យក្មេង ឈុត សេរីវ៉ាន់ថង បាននិងកំពុងធ្វើឲ្យអ្នកគាំទ្រមានការពេញចិត្តខ្លាំង បន្ទាប់ពីរូបគេ បានទាត់ជើងខ្លាំងវាយមិន ដកថយរបស់ថៃ Phit Bunmey ឲ្យខូចជើងត្រឹមទឹកទី ៤ ដើម្បីឡើងទៅឈរនៅលេខ ១ ប្រចាំពូល A ខាងភាគីកម្ពុជា នៅក្នុងការប្រកួតដណ្តើមពានអន្តរជាតិ «កំពូលអ្នកប្រដាល់កណ្តាប់ដៃដែក ISI Palm» ទម្ងន់ ៥៧ គ.ក្រនៅលើសង្វៀន CNC។
យ៉ាងណាក៏ដោយ គ្រូប្រដាល់ក្បាច់គុនបុរាណខ្មែរ លោក ឈុត សេរី ដែលជាឪពុកបង្កើតរបស់ឈុត សេរីវ៉ាន់ថង ហាក់នៅតែមានភាពស្រពេចស្រពិល ចំពោះកូនប្រុសរបស់ខ្លួន ក្នុងការស្វែងរកឱកាសឡើងទៅកាន់ការប្រកួតវគ្គពាក់កណ្តាលផ្តាច់ព្រ័ត្រ ហើយលោកថែមទាំងបានប្រៀបប្រដូច វ៉ាន់ថង ថា ត្រឹមជាតួរង បន្ទាប់ពី សុខ ធី ហៅ កាកា ដែលអ្នកគាំទ្រភាគច្រើនជឿថា នឹងឈ្នះបានពានអន្តរជាតិនេះ។
លោកឈុត សេរី បានប្រាប់កាលពីថ្ងៃចន្ទថា៖ «ការយកឈ្នះលើថៃ Phit Bunmey វាមានការលំបាកដែរ គឺបើយើងគ្មានយុទ្ធសាស្ត្រ ក៏មិនអាចយកឈ្នះគេបានដែរ ព្រោះថៃម្នាក់នេះមានក្បាច់សម្លាប់ច្រើន គួរឲ្យស្រៀវខ្នងផងដែរ ប៉ុន្តែការទាត់ថៃម្នាក់នេះឲ្យខូចជើង វាមិនមែនជារឿងចៃដន្យនោះទេ គឺយើងបានត្រៀមយុទ្ធសាស្ត្រយូរគួរសមដែរ ហើយការទាត់ជើងក្រោមនេះ គឺដើម្បីកាត់បន្ថយភាពរឹងមាំរបស់គេ ក្នុងការចូលវាយសង្គ្រប់មកលើយើង តែម្តង»។
តាមរយៈការប្រកួតនៅលើសង្វៀន CNC កាលពីថ្ងៃអាទិត្យ កន្លងមកនេះ Phit Bunmey បានដើរចូលវាយកែង និងបុកជង្គង់ទៅលើ ឈុត សេរីវ៉ាន់ថង ជាបន្តបន្ទាប់។ វ៉ាន់ថង មានការលំបាកច្រើន ក្នុងការគេចចេញពីការដាក់សម្ពាធនេះ ប៉ុន្តែរូបគេបានព្យាយាមវាយកាត់ដោយការទាត់ ម៉ាត់ ព្រមទាំងប្តូរជង្គង់ និងវាយកែង ដើម្បីរក្សាលំនឹងនៃការប្រកួតបានយ៉ាងល្អ។
ឈានចូលទឹកទី ៤ Phit Bunmey កាន់តែបង្កើនការវាយលុក ប៉ុន្តែការទាត់កាត់សំដៅទៅលើជើងក្រោមជាបន្តបន្ទាប់របស់ វ៉ាន់ថង បានធ្វើឲ្យជើងខ្លាំងរបស់ថៃម្នាក់នេះខូចជើងឆ្វេង និងដួល មិនអាចបន្តការប្រកួតទៀតបាន ត្រឹមពាក់កណ្តាលទឹកទី ៤ នេះ។ នេះជាជ័យជម្នះលើកទី ២ របស់ វ៉ាន់ថង បន្ថែមទៅលើការឈ្នះពិន្ទុ Phou Takvann ដែលធ្វើឲ្យរូបគេ មាន ៦ ពិន្ទុខ្ពស់ជាងគេប្រចាំពូល A ហើយតាមពីក្រោយដោយ សុខ ធី មាន ៣ ពិន្ទុ ដែលបានឈ្នះពិន្ទុថៃ Sophapnoy។
ផ្ទុយពីនេះកីឡាករ ឡុង ជិន ដែលបានចាញ់ដោយសន្លប់ក្រោមស្នាដៃ Phit Bunmey សម្រាប់ការប្រកួតលើកទី ១ នោះ បានបន្តចាញ់ដោយសន្លប់ នៅត្រឹមទឹកទី ៤ ក្រោមក្បាច់ជង្គង់របស់ថៃ Phou Takvann កាលពីថ្ងៃអាទិត្យនោះដែរ ហើយការចាញ់ ២ ប្រកួតជាប់ៗគ្នា បានធ្វើឲ្យ ឡុង ជិន ប្រឈមទៅនឹងការធ្លាក់ត្រឹមវគ្គជម្រុះតាមពូលនេះ ដោយមាន ២ ពិន្ទុ ច្រើនជាង តាញ់ មករា ដែលមាន ១ ពិន្ទុ ក្រោយចាញ់ពិន្ទុថៃ Thanousiklek សម្រាប់ការប្រកួតលើកទី ១។
យ៉ាងណាក៏ដោយ លោក ឈុត សេរី យល់ថា ការប្រជែងឡើងទៅវគ្គបន្តរបស់ វ៉ាន់ថង មានការលំបាក។ លោកនិយាយថា៖ «យើងមានសង្ឃឹមត្រឹម ៥០ ទៅ ៦០ ភាគរយទេ ក្នុងការទទួលបានឱកាស ឡើងទៅប្រកួតវគ្គបន្ត ព្រោះថៃ ២ នាក់ ដែល វ៉ាន់ថង ត្រូវជួបជាបន្តទៀត មានសមត្ថភាពខ្លាំង។
លោកបានបន្ថែមថា៖ «បើសិនជា យើងបានឡើងទៅវគ្គបន្ត យើងក៏នៅតែមានការបារម្ភទៅលើ សុខ ធី ព្រោះគ្រប់គ្នាគាំទ្រ សុខ ធី ហើយពួកគេរំពឹង ១០០ ភាគរយទៅហើយថា គេមកប្រកួតនេះ ដើម្បីយកពានមួយនេះ ចំណែកយើង គ្រាន់តែជាតួរងបន្ទាប់ សុខ ធី ទេ ដោយសារ សុខ ធី ជាកីឡាករល្អយូរមកហើយ»៕
