ភ្នំពេញ: ទើបតែស្ងប់ពីរឿងស៊យដែលត្រូវបុរសម្នាក់ជានិស្សិតជះស្រាបៀរ និងបានព្រមព្រៀងគ្នានៅក្នុងសំណងចុងក្រោយត្រឹម ១ ម៉ឺនដុល្លារកាលពីឆ្នាំ ២០១៨ នោះក៏ស្រាប់តែថ្មីៗនេះឃើញតារាចម្រៀងស្រីពូកែចាក់ក្បាច់រាំលើឆាកកញ្ញា ទេព បូព្រឹក្ស បង្ហើរសារដ៏ចម្លែកហាក់ដូចជាកំពុងចង់បង្ហាញពីតម្រុយថា ខ្លួននាងជិតចេញពីទ្រនំហង្សមាស បង្កការភ្ញាក់ផ្អើលទៅដល់មហាជនសាជាថ្មី។
តារាស្រីដែលនិយមច្រៀងបទភាសាបរទេស មិនសូវជាច្បាស់ តែសម្បូរក្បាច់រាំប្លែកនៅលើទ្រនំហង្សមាសកញ្ញា ទេព បូព្រឹក្ស បានបង្ហោះសារដ៏ចម្លែកចុងក្រោយតាមបណ្តាញអ៊ីនសា្តក្រាមថា៖ «ក្រោកពីគេងមានអារម្មណ៍ថា ស្មុគស្មាញណាស់ថ្ងៃនេះ!ខ្ញុំពិតជាមិនចង់ដើរចេញទេ ព្រោះវាជាកន្លែងដែលខ្ញុំប្រាថ្នាចង់នៅតាំងពី ៧ ឆ្នាំមុន។ អ្នកទាំងអស់គ្នាហ៊ានសន្យាទេថា នៅតែស្រឡាញ់ខ្ញុំនោះ ទោះជាខ្ញុំនៅទីណាកន្លែងណាក៏ដោយ!»។
មួយរំពេចនោះក៏មានអ្នកគាំទ្រចូលទៅ Comment ដោយមានការសម្តែងទាំងអារម្មណ៍សោកស្តាយផង និងបង្ហាញនូវការឃាត់មិនចង់ឲ្យសម្រេចចិត្តផុយៗផងក្រោយពីបានឃើញសារតារាចម្រៀងស្រី ហង្សមាសកញ្ញា ទេព បូព្រឹក្ស មកនោះ។
គេឃើញមានអ្នកខ្លះបានសរសេរសារបង្ហាញពីអារម្មណ៍នៅតែស្រឡាញ់គាំទ្រដល់ Idol របស់ខ្លួនថា៖ «ចាស! ខ្ញុំនៅតែស្រឡាញ់បងដូចជាកាលពីមុនដដែលហើយ គាំទ្ររូបចែគឺខ្ញុំមិនមែនគាំទ្រទីកន្លែងចែឈរទេ!»។
ចំណែកអ្នកខ្លះបានសរសេរបែបសំណូមពរថា៖ «ខ្ញុំមិនចង់ឲ្យបងចេញពីកន្លែងចាស់ទេបងស្រី!តែ វាក៏ជាជម្រើសរបស់បងដែរ ដូច្នេះខ្ញុំនៅបន្តគាំទ្របងនូវអ្វីដែលបងបានសម្រេចចិត្តផងដែរ»។
គេក៏មិនទាន់បានដឹងពិតច្បាស់នៅឡើយថា តើកញ្ញា ទេព បូព្រឹក្ស គឺពិតជាបានសម្រេចចិត្តដើរចេញពីទ្រនំផលិតកម្មហង្សមាសមែនឬយ៉ាងណា? ភ្នំពេញប៉ុស្តិ៍បានទាក់ទងនាងសួរនាំរឿងនេះបញ្ជាក់តែនាងលើកទទួលហើយគ្រាន់តែស្តាប់ ក៏បិទទូរស័ព្ទវិញមួយរំពេច។
គួរបញ្ជាក់ថាចាប់តាំងពីពួកគេបានចាប់ជាដៃគូច្រៀងនឹងគ្នានៅផលិតកម្មហង្សមាសមកមហាជនក៏បានឧស្សាហ៍ ឃើញបង្ហាញនូវភាពស្និទ្ធស្នាលគ្នានៅក្រៅឆាកសិល្បៈរវាងតារាស្រីកញ្ញា ទេព បូព្រឹក្ស ឬអ្នកគាំទ្រហៅ CL ខ្មែរ និងលោក ងួន ចាន់ដេវីត G-Dragon ខ្មែរ ហើយក៏បានលេចឮរហិចរហៀងបែកចេញជាប្រភពនៃព័ត៌មានខ្សឹបខ្សៀវថា ពួកគេកំពុងតែបង្កាត់ភ្លើងស្នេហ៍លើសពីមិត្តធម្មតាក្នុងសិល្បៈដោយបានរួមគ្នាទិញឡាន និងបើកហាងលក់ទំនិញផងដែរ៕