ភ្នំពេញៈ អតីតបេក្ខនារីប្រឡងចម្រៀង The Voice Cambodia 2 នារដូវកាលទី ២ កញ្ញា រ៉េត ស៊ូហ្សាណា តារាស្រីវ័យក្មេង សម្រស់កាន់តែស្រស់សោភា ដែលកាក់កបទីផ្សារឡើងឆាកតន្ត្រីតាមខេត្តជាប់យ៉ាងរដឹក ឥឡូវនេះកំពុងតែមមាញឹកកើបលុយដុំនឹងអាជីពសម្តែងស្ប៉តពាណិជ្ជកម្ម និងជាតារាទូតសុច្ឆន្ទៈនៃផលិតផលនានា រហូតធ្វើឲ្យនាងពុំអាចចាំចំនួនបានច្បាស់លាស់គួរឲ្យភ្ញាក់ផ្អើល។
មួយរយៈពេលចុងក្រោយនេះ សង្កេតឃើញតារាចម្រៀងស្រីវ័យ ១៨ ឆ្នាំ កំពុងតែកសាងបានកេរ្តិ៍ឈ្មោះល្បីលើវិថីសិល្បៈតាមរយៈសូរសំនៀងដ៏ពីរោះជាភាសាអង់គ្លេស កាលពីប្រឡងនោះ មានរាសីឡើងក្រឺតៗ ដោយបានក្លាយជាតារាសុច្ឆន្ទៈ ២ ឆ្នាំជាប់គ្នារបស់ក្រុមហ៊ុនទូរស័ព្ទស្មាតហ្វូន OPPO ជាមួយនឹងតារាចម្រៀងកំពូលនៅហង្សមាសគឺអ្នកនាង ពេជ្រ សោភា និងតារាចម្រៀងប្រុសរូបសង្ហាលោក Step។ ក្រៅពីនេះ ក៏ឃើញតារាចម្រៀងស្រី អតីតជាយុវតី រៀននៅឯសាលាចំណេះដឹងទូទៅឯកជនឈ្មោះសាលាអន្តរជាតិសិង្ហបុរី (SIS) ក៏មានវត្តមាននៅក្នុងការថតស្ប៉តពាណិជ្ជកម្មផ្សេងៗដែរដូចជាផលិតផលរក្សាសម្ផស្ស ផលិតផលអាហារ និងការថតកុនដុំឲ្យផលិតកម្មហង្សមាសបានចំនួន ២-៣ រឿងផងដែរ។
ពេលចង់ដឹងថា តើនាងមានការមមាញឹកថតស្ប៉តអ្វីខ្លះ និងថតប៉ុន្មានផលិតផលហើយមកដល់ពេលបច្ចុប្បន្ននេះ គឺបេក្ខនារី ដែលប្រឡងធ្លាក់ត្រឹមវគ្គពាក់កណ្តាលផ្តាច់ព្រ័ត្រនៃកម្មវិធី The Voice Cambodia 2 រដូវកាលទី ២ ស៊ូហ្សាណា មិនបានបរិយាយឲ្យដឹងនោះឡើយ។ ខណៈកញ្ញា រ៉េត ស៊ូហ្សាណា បានទទួលទូរស័ព្ទ ហើយឆ្លើយយ៉ាងខ្លីដោយសំអាងហេតុផលកំពុងជាប់រវល់ថតនោះថា៖ «ចាស!រឿងថតស្ប៉តនោះគឺមានច្រើនណាស់ សុំទោសផងខ្ញុំពុំអាចចាំបានថាមានប៉ុន្មានទេ ហើយក៏មិនដែលកត់សម្គាល់ដែរ។ សុំអធ្យាស្រ័យផងបង ពេលនេះត្រូវទៅថត ចាំល្ងាចបន្តិចចាំបងតេមកទៀតចុះព្រោះពេលនេះ គេកំពុងចាំនាងខ្ញុំថត!» ប៉ុន្តែការទាក់ទងតាមសន្យាគ្មានអ្នកទទួលឡើយ។
ខណៈដំណើរលើវិស័យសិល្បៈចម្រៀងក៏កាន់តែលេចធ្លោនៅទ្រនំហង្សមាស ជាពិសេសការស្រូបយកប្រជាប្រិយពីមិត្តអ្នកគាំទ្រជាយុវវ័យនោះ ក៏ធ្លាប់រងព្រនង់ពាក្យរិះគន់ពីមហាជនដែរពេលច្រៀងបទ «Shape of you» ដោយគេថា នាងច្រៀងមិនសូវច្បាស់បែបបន្លំៗស្ដាប់មិនបាន។
តែតារាចម្រៀងស្រីកាន់តែស្រស់ផូរផង់ កាន់តែស្រូបបានទីផ្សារសិល្បៈច្រើនរូបនេះ ហាក់ដូចជាមិនបានអាក់អន់ស្រពន់ចិត្តនឹងការរិះគន់ឡើយ ដោយនាងបានប្រាប់ ភ្នំពេញប៉ុស្តិ៍ថា៖ «នាងខ្ញុំមិនបានខឹងសម្បា ឬអន់ចិត្តនឹងបងប្អូនជាមហាជនគាំទ្រឡើយ។ ផ្ទុយទៅវិញនាងខ្ញុំមានតែអរគុណពួកគាត់ចំពោះការបញ្ចេញនូវមតិយោបល់ទាំងអស់នោះ ព្រោះថានេះក៏អាចរាប់ទុកថាជាបទពិសោធដំបូងមួយថ្មីទៀតសម្រាប់រូបនាងខ្ញុំផងដែរ ព្រោះវាគឺជាបទចម្រៀងថ្មីរបស់ខ្ញុំ»៕