.jpg)
តារាសម្តែងសិចស៊ីកញ្ញា វ៉ាន់ វល័ក្ខ ចេញសារពន្លះអ្នកចូលចិត្តដឹងរឿងផ្ទាល់ខ្លួននាង។ រូបថត ហ្វេសប៊ុក
ភ្នំពេញ៖ បន្ទាប់ពីបាត់មុខស្ងាត់មួយរយៈក្នុងសិល្បៈ តារាសម្តែងស្រីសិចស៊ី ចូលចិត្តលែងល្វែងលើទាក់ក្រសែភ្នែកបុរសៗមើលភ្លឹក កញ្ញា វ៉ាន់ វល័ក្ខ ស្រាប់តែបង្ហើរសារបង្ហាញពីអារម្មណ៍មិនពេញចិត្ត និងពន្លះមនុស្សប្រុសម្នាក់ដែលចូលចិត្តដឹងរឿងផ្ទាល់ខ្លួននាងតាមសង្គមហ្វេសប៊ុក ដោយបញ្ចេញចរិតហ្ស៊ីនតែម្តង។
នៅក្នុងអត្ថន័យសារនោះ កញ្ញា វ៉ាន់ វល័ក្ខ ក៏បានបង្ហោះសារពន្លះភ្លាមៗថា៖ «មនុស្សប្រុសដែលស្តីថាឲ្យខ្ញុំបាន មានតែអាណាព្យាបាលខ្ញុំតែប៉ុណ្ណោះ មនុស្សប្រុសផ្សេងមិនថា អ្នកស្គាល់ខ្ញុំក្នុងនាមជាអ្វីក៏ដោយ គឺគ្មានសិទ្ធិមកថាឲ្យខ្ញុំបានឡើយនេះជាចរិតខ្ញុំ»។
តារាស្រីសាច់សខ្ចី រាងស្រឡូន ក៏ប្រាប់ភ្នំពេញប៉ុស្តិ៍បន្ថែមថា៖ «វាទាក់ទងជាមួយការងាររកស៊ីតិចតួច ធម្មតាទេ យើងជាមនុស្សស្រី ហើយក៏នៅក្មេងខ្ចីចំពោះការរកស៊ី ដូច្នេះហើយការងារយើងតែងតែប៉ះពាល់គ្នាទៅវិញទៅមកហើយ។ ខ្ញុំក៏ប្រកាន់គោលជំហរខ្ញុំ បើនិយាយជាមួយខ្ញុំស្រួល ខ្ញុំស្តាប់ បើមកនិយាយក្នុងន័យបញ្ជាក្បាលខ្ញុំអត់បានទេ ព្រោះខ្ញុំយកលុយខ្ញុំមកធ្វើ មិនបានយកលុយអ្នកណាមកធ្វើទេ ហើយមនុស្សប្រុសដែលអាចនិយាយថាឲ្យខ្ញុំបានមានតែអ្នកមានគុណខ្ញុំតែប៉ុណ្ណោះ។ បញ្ហាដែលកើតឡើងវាពាក់ព័ន្ធជាមួយអាជីវកម្ម ដែលខ្ញុំកំពុងតែធ្វើតែម្តង គេឃើញយើងក្មេង គេនិយាយមិនធ្ងន់អីប៉ុន្មានទេ តែចូលក្នុងន័យចង់បញ្ជាក្បាលយើង ចង់ឲ្យយើងស្តាប់គេ ហើយខ្ញុំក៏ផូស្តចោលទៅ បើអ្នកណាមានខ្លួនក៏យកទៅចុះ ខ្ញុំក៏សុំមិនបង្ហើបថាជាអ្នកណាដែរ»។
តារាសម្តែងស្រីល្បីខាងតួឆ្នាស់ឆ្នើម កញ្ញា វ៉ាន់ វល័ក្ខ ក៏ប្រាប់ឲ្យដឹងតម្រុយពីការបើកអាជីវកម្មផងដែរថា ចំពោះអាជីវកម្មដែលតារាសិចស៊ីរូបនេះត្រៀមបើកដំណើរការខាងមុខនេះ ក៏បានបង្ហើបដែរថា ជាលក្ខណៈបាងហ្គាឡូ មានទីតាំងនៅជាយរាជធានីភ្នំពេញ បានសាងសង់ជិត ៥០ ភាគរយហើយដែរ ក៏ប៉ុន្តែនៅមិនទាន់អាចកំណត់ពេលណានឹងបើកសម្ពោធនោះដែរ។
រយៈពេលកន្លះឆ្នាំដែល វ៉ាន់ វល័ក្ខ បាត់មុខពីសិល្បៈបន្ទាប់ពីថតបញ្ចប់កុនភាគហង្សមាសរឿង «កូនពស់កេងកង» និងរឿង «កន្ទោងខៀវ» ឬថត MV ផ្សេងៗ។
កញ្ញា វ៉ាន់ វល័ក្ខ បង្ហើបថា៖ «ពេលនេះខ្ញុំបានចាប់ផ្តើមទទួលការងារក្នុងសិល្បៈវិញហើយ ព្រោះ Business ខ្ញុំក៏ដំណើរការហើយ។ តែក៏បានត្រឹមតែសង្ឃឹមថា Business នេះអាចចិញ្ចឹមខ្លួនបានមួយរស់ៗប៉ុណ្ណោះ។ យ៉ាងណាក៏មានការងារ និងមុខរបរផ្សេងទៀតទប់ដែរ គ្រាន់តែមុខរបររកស៊ីខ្លះ ខ្ញុំមិនអាចបង្ហើបប្រាប់បាន ព្រោះវាមានការប្រកួតប្រជែងខ្លាំង»៕
