.jpg)
ទិដ្ឋភាពក្រុមយុវជន ដែលចូលរួមក្នុងកម្មវិធីពិព័រណ៍សៀវភៅកម្ពុជា នាឆ្នាំកន្លងមកនៅបណ្ណាល័យជាតិ។ ហុង មិនា
ភ្នំពេញ៖ កម្មវិធីពិព័រណ៍សៀវភៅកម្ពុជាលើកទី ៨ នឹងមានស្តង់ចំនួនប្រមាណជា ១៤០ ស្តង់ សម្រាប់ត្រៀមដាក់តាំងបង្ហាញសៀវភៅនានា ដែលនាំមកពីបណ្តាគ្រឹះស្ថានបោះពុម្ភជាង ៨០០ ធ្វើនៅបរិវេណនៃបណ្ណាល័យជាតិ មានរយៈពេល ៣ ថ្ងៃ គឺចាប់ថ្ងៃទី ១៣-១៥ ខែ ធ្នូ ឆ្នាំ ២០១៩ នាចុងសប្តាហ៍នេះ។
សម្រាប់កម្មវិធីពិព័រណ៍សៀវភៅដែលតែងប្រារព្ធធ្វើឡើងជារៀងរាល់ឆ្នាំ ខណៈការប្រារព្ធលើកដំបូងកាលពីឆ្នាំ ២០១១ ហើយមានអ្នកចូលរួមតិច និងចំនួនស្តង់តាំងសៀវភៅក៏តិចតួចនោះ តែឥឡូវនេះកំពុងតែទាក់ទាញចំណាប់អារម្មណ៍ទាំងអ្នកចូលរួមពីបណ្តាគ្រឹះស្ថានបោះពុម្ព ក៏ដូចក្រុមហ៊ុនស្ពនស័រ កាន់តែច្រើនឡើងពីមួយឆ្នាំទៅមួយឆ្នាំ ដោយគួរឲ្យកត់សម្គាល់នៅឆ្នាំនេះមានប្រធានបទថា «ផ្តើមក្តីស្រមៃដៃកាន់សៀវភៅ»។
លោកស្រី ខ្លូត វិបុលឡា ប្រធានបណ្ណាល័យជាតិកម្ពុជាបង្ហើបឲ្យដឹងពីភាពប្រែប្រួលនៃការរៀបចំពិព័រណ៍សៀវភៅកម្ពុជាលើក ៨ ក្នុងឆ្នាំនេះថា៖ «ចំពោះការរៀបចំ គឺនៅតែមានរបៀបវារៈដូចឆ្នាំមុន តែអ្វីដែលប្រែប្រួល គឺសកម្មភាពរៀបចំ។ ឆ្នាំនេះយើងមានការភ្ញាក់ផ្អើលខ្លាំង ដោយសារមានបណ្តាគ្រឹះស្ថានបោះពុម្ពជាច្រើនមានប្រមាណជាង ៨០០ គ្រឹះស្ថាន បានទំនាក់ទំនងដាក់ស្តង់ (Booth) តែយើងអាចមានកន្លែងដាក់អស់លទ្ធភាព ដោយការស្នើទៅកាន់សាលាក្រុង ដើម្បីសុំទីតាំងខាងក្រៅបន្ថែមសម្រាប់ចំនួនស្តង់ប្រមាណ ១៤០ ស្តង់ ព្រោះបរិវេណបណ្ណាល័យជាតិយើងមានទំហំតូច»។
ដោយសារមានការយល់ដឹងអំពីសារៈសំខាន់នៃការអានសៀវភៅ និងការរៀបចំពិធីពិព័រណ៍សៀវភៅកម្ពុជា នាពេលកន្លងមក ប្រកបដោយការសហការផ្សព្វផ្សាយបានទូលំទូលាយនោះទើបគេសង្កេតឃើញសម្ទុះនៃក្រុមសិស្ស និស្សិត ភ្ញៀវជាតិ និងភ្ញៀវអន្តរជាតិ មានការកើនឡើងគួរឲ្យកត់សម្គាល់ ខណៈចំនួនអ្នកចូលរួមកាលពីឆ្នាំ ២០១៨ មានចំនួន ១៣ ម៉ឺននាក់ ហើយកាលពីឆ្នាំ ២០១៧ មានអ្នកចូលរួមសរុបរយៈពេល ៣ ថ្ងៃ មានចំនួន ៥១ ០០០ នាក់។
ក្រុមសិស្សានុសិស្សចូលរួមកម្មវិធីពិព័រណ៍សៀវភៅកម្ពុជាកន្លងមក។ ហុង មិនា
កាន់តែពិសេសទៅទៀតនោះ ក្នុងឆ្នាំ ២០១៩ នេះ សង្កេតឃើញថា ការបន្ថែមកម្មវិធីទាក់ទាញចំណាប់អារម្មណ៍កុមារ ក៏ដូចជាយុវវ័យ ពីសំណាក់ ក្រុមអ្នករៀបចំដែលជា ក្រុមអ្នកស្ម័គ្រចិត្តមានចំនួនប្រមាណ ២០០ នាក់ បានអញ្ជើញក្រុមសិល្បករ-សិល្បការិនីល្បីៗ ពីសំណាក់ក្រុមយុវវ័យផងដែរ រួមមានដូចជាក្រុមសិល្បៈប្រុស Ninja-Top ក្រុមសិល្បៈស្រី OMG ក្រុមតន្រ្តីករ Mustache Band តារាចម្រៀងស្រីកញ្ញា ចិត្ត កញ្ចនា តារាចម្រៀងកញ្ញា Chii Vitt កញ្ញា Gabbie Elle និងលោក Ting Tong ជាដើម។
លោកស្រី ខ្លូត វិបុលឡា បញ្ជាក់ថា៖ «ដោយសារតែគោលដៅរបស់យើងចង់ឲ្យកុមារ និងយុវវ័យមានការចាប់អារម្មណ៍ខ្លាំងលើការអានសៀវភៅ ឬស្វែងយល់ពីសារៈសំខាន់នៃការអានសៀវភៅ ទើបបានខិតខំរកកម្មវិធីកម្សាន្តប្លែកៗ ដើមទាក់ទាក់ចំណាប់អារម្មណ៍ពួកគាត់»។
កម្មវិធីពិព័រណ៍សៀវភៅកម្ពុជាលើកទី ៨ ប្រព្រឹត្តឡើងចាប់ពីថ្ងៃទី ១៣ ដល់ថ្ងៃទី ១៥ ខែ ធ្នូ ឆ្នាំ ២០១៩ ក្រោមប្រធានបទ «ផ្តើមក្តីស្រមៃ ដៃកាន់សៀវភៅ» នេះ ក៏មានការដាក់លក់សៀវភៅច្រើនប្រភេទជាជម្រើសសម្រាប់អ្នកទស្សនាតាមស្តង់ និងមានការចែកជូនសៀវភៅឥតគិតថ្លៃ ដែលជាការផ្តល់ជូនពីសំណាក់ថ្នាក់ដឹកនាំកំពូល គឺលោកនាយករដ្ឋមន្រ្តី ហ៊ុន សែន ផងដែរ។
ប្រធានបណ្ណាល័យជាតិកម្ពុជា លោកស្រី ខ្លូត វិបុលឡា បន្ថែមថា៖ «ឆ្នាំនេះយើងក៏ទទួលបានការផ្តល់ជូននូវសៀវភៅអាន ជាភាសាខ្មែរចំនួន ៤ ម៉ឺនក្បាល ពីសម្តេចនាយករដ្ឋមន្រ្តីរួចហើយ ដើម្បីចែកជូនដល់សិស្សានុសិស្ស និងអ្នកទស្សនា ដោយសៀវភៅទាំងនោះ គឺជាសៀវភៅកម្រងច្បាប់ទំនៀមទម្លាប់ប្រពៃណីរបស់លោកតា ក្រម ង៉ុយ និងច្បាប់ស្រីហិតោបរទេស របស់បណ្ឌិតប៉ាង ខាត់ ជាដើម។ លើសពីនេះនៅតាមស្តង់នានាក៏មានការលក់សៀវភៅ ដែលមានការបញ្ចុះតម្លៃពិសេសចន្លោះពី ២០ % ទៅដល់ ៧០ % ឯណោះ»៕
