ភ្នំពេញៈ ដោយសារតែចង់ជំរុញវិស័យតន្ត្រីក្លាស៊ីកខ្មែរ (Classical Music) ឲ្យមានកម្រិតស្តង់ដារមួយដូចគេដូចឯងលើសកលលោក និងចង់ឲ្យមានការផ្លាស់ប្តូរវប្បធម៌គ្នារវាងកម្ពុជា និងជប៉ុននោះ កម្មវិធីប្រគំតន្ត្រីប្រកួតប្រជែងអាហារូបករណ៍សម្រាប់ឆ្នាំ ២០១៩ ឬ Catch a Cambodian Star 2019 នឹងប្រារព្ធធ្វើជាលើកទី ៧ នៅបរិវេណនៃផ្សារអ៊ីអន២ នារសៀលថ្ងៃស្អែកទី ១៨ ខែមិថុនានេះ។
កញ្ញា កាំង ហួត ជាអ្នកសម្របសម្រួលនៃកម្មវិធីប្រគំតន្ត្រីអាហារូបករណ៍ឆ្នាំ ២០១៩ ឬ Catch a Cambodian Star 2019 បានឲ្យដឹងត្រួសៗពីការរៀបចំកម្មវិធីនេះថា៖ «ព្រោះតែចង់លើកស្ទួយវិស័យតន្ត្រីក្លាស៊ីកខ្មែរឲ្យមានកម្រិតល្អដូចជាប្រទេសគេនោះ ទើបសមាគមសិល្បៈជប៉ុន-កម្ពុជា (JCPAA) ដែលជាអង្គការមិនស្វែងរកប្រាក់ចំណេញមួយបានរៀបចំឲ្យមានកម្មវិធី Catch a Cambodian Star ដំបូងចាប់តាំងពីឆ្នាំ ២០១៣ មកម្ល៉េះដោយយើងបានប្រារព្ធធ្វើកន្លងមកនោះ នៅឯទីកន្លែងផ្សេងៗគ្នាក្នុងរាជធានីភ្នំពេញនៃប្រទេសកម្ពុជា»។
អ្នកសម្របសម្រួលកម្មវិធីរូបនេះបន្តថា៖ «កម្មវិធីឆ្នាំនេះយើងមានយុវតីខ្មែរ ជួន សូស៊ុននី ដែលជាសិល្បការិនីធ្លាប់បានប្រកួតជាប់ក្នុងកម្មវិធី Catch a Cambodian Star 2017 គឺប្អូនក៏បានជាប់នៅត្រឹមវគ្គពាក់កណ្តាលផ្តាច់ព្រ័ត្រ កាលប្រកួតនៅឯទីក្រុងអូសាកា ប្រទេសជប៉ុនដែរហើយប្អូនស្រី ជួន សូស៊ុននី ដែលជាសិស្សរៀនសិល្បៈតន្ត្រីមកពីសាលាតន្ត្រីហ៊ឹមសុភីមកចូលរួមបង្ហាញសមត្ថភាពជាមួយជំនាញឧបករណ៍ព្យ៉ាណូ ខណៈប្អូនប្រុស សោម ពិសិដ្ឋ ដែលជាបេក្ខជនជាប់ជម្រើសចុងក្រោយកម្មវិធី Catch a Cambodian Star 2019 មានជំនាញឧបករណ៍ភ្លេងវីយូឡុង ដោយប្អូនប្រុសគឺជាសិស្សរៀននៅឯសាលាតន្ត្រីវិចិត្រសិល្បៈ»។
កាន់តែពិសេសទៅទៀតនោះ ការប្រគំតន្ត្រី និងល្ខោនអូប៉េរ៉ា Catch a Cambodian Star 2019 នេះក៏មានការចូលរួមពីសំណាក់ក្រុមសិល្បការិនី ជប៉ុនល្បី ២ រូបផងដែរគឺលោកស្រី សាតុមិ អូហ្គាវ៉ា (Satomi Ogawa) និងលោកស្រី ណូរីកូ ស៊ិមិសុ (Noriko Shimizu)។
កញ្ញា កាំង ហួត បង្ហើបប្រាប់ថា៖ «ក៏មានតារាកិត្តិយសចូលរួម ២ រូបទៀតដែរគឺលោក Mirab Babaian ជនជាតិអ៊ុយក្រែនសម្តែងឧបករណ៍ Viola ដែលមានលក្ខណៈស្រដៀងគ្នាទៅនឹងឧបករណ៍វីយូឡុងដែរ និងលោក Issei Sakano ជនជាតិជប៉ុននឹងសម្តែងនូវឧបករណ៍ព្យ៉ាណូ ខណៈខាងខ្មែរក៏មានសិល្បករ-សិល្បការិនី ២ រូបចូលរួមបង្ហាញសមត្ថភាពផ្នែកតន្ត្រីរបស់ខ្លួនផងដែរ នារសៀលថ្ងៃទី ១៨ ខែមិថុនា ឆ្នាំ ២០១៩ នេះ។
បើតាមសេចក្តីប្រកាសព័ត៌មាន និងកម្មវិធីនៃការប្រគំតន្ត្រីប្រកួតប្រជែងអាហារូបករណ៍ឆ្នាំ ២០១៩ នេះមុនកម្មវិធីនៅថ្ងៃទី ១៨ ខែមិថុនានេះក៏មានរៀបចំបើកបង្ហាញនូវការសម្តែងនានាចំនួន ២ លើកនៅថ្ងៃសៅរ៍ទី ១៥ ខែមិថុនាចុងសប្តាហ៍កន្លងមកនេះផងដែរ។
ចំពោះការប្រគំតន្ត្រី Catch a Cambodian Star 2019 នឹងចាប់ផ្តើមនៅម៉ោង ៣ រសៀលបន្តដល់ម៉ោង ៤ និង ៣០ នាទីនៅផ្សារអ៊ីអន ២ សែនសុខ ខណៈក៏មានការលក់សំបុត្រចូលទស្សនាផងដែរគឺ សំបុត្រ ១ តម្លៃ ២០ ដុល្លារ (កក់មុនតម្លៃ ១៥ ដុល្លារ) និង ១ សន្លឹកតម្លៃ ៥ ដុល្លារសម្រាប់សិស្ស ឬនិស្សិត៕