.jpg)
សៀវភៅត្រូវបានដាក់លើក្បាល ដើម្បីជាជំនួយដល់ដំណើរមានលំនឹង។ រូបថត AFP
ក្រុងស៊ាងហៃ: កុមារី ដានីញ៉ែល លីវ សម្លឹងត្រង់ទៅមុខ ក្បាលទ្រសៀវភៅ រក្សាលំនឹងរាងកាយ និងដើរតាមបន្ទាត់យ៉ាងប្រុងប្រយ័ត្ន។
អ្នកម្ដាយរបស់កុមារីវ័យ ១០ ឆ្នាំរូបនេះសង្ឃឹមថា លំហាត់ដើរដូច្នេះនឹងជួយបង្កើនសមត្ថភាពកូនស្រីឲ្យលេចធ្លោក្នុងស្រទាប់អភិជននៅទឹកដីប្រកួតប្រជែងនៃសង្គមចិន។
ដានីញ៉ែល ស្ថិតក្នុងចំណោមកុមារ ៧ នាក់ផ្សេងទៀតដែលចំណាយពេលវេលានៅថ្ងៃសៅរ៍សំងំនៅជាន់លើនៃសណ្ឋាគារផ្កាយ ៥ កណ្ដាលក្រុងស៊ាងហៃក្នុងការហ្វឹកហាត់អត្ដចរិត និងពិធីការ។ កុមារា ៤ នាក់គ្រងឈុតបូ ក អាវធំ និងស្បែកជើងខ្មៅរលោងយ៉ាងស្រស់សង្ហា។ កុមារី ៤ នាក់ទៀតស្ថិតក្នុងសម្លៀកបំពាក់រ៉ូប និងរំលេចស្នាមញញឹមពព្រាយ។
អ្នកគ្រូបង្វឹកផ្នែកពិធីការនៅទីក្រុងស៊ាងហៃ ហ្គីយ៉ូម ដឺ ប៊ែរណាដាក ជាជនជាតិបារាំងដែលបានណែនាំកុមារាម្នាក់ឲ្យរៀបឫកដំណើរ ខណៈរក្សាលំនឹងសៀវភៅលើក្បាលបាននិយាយថា៖ «គាត់នៅមានបញ្ហាផ្នែកតុល្យភាពលំនឹង»។
អ្នកគ្រូជនជាតិបារាំងបង្រៀនពីបែបបទនៃការទទួលទានដូចអភិជន។ រូបថត AFP
ម្ដាយកុមារី ដានីញ៉ែល ចង់ឲ្យកូនស្រីរបស់ខ្លួនជាបុគ្គលល្អឥតខ្ចោះ។ អ្នកស្រីក៏ដូចជាឪពុកម្ដាយដទៃទៀតហ៊ានចាយប្រាក់ ៣៩០ ដុល្លារសម្រាប់ការបង្រៀន ៤ ម៉ោងឲ្យគ្រូបង្វឹកបារាំងអាយុ ៣១ ឆ្នាំរយៈពេល ៤ ម៉ោងចំពោះការបង្វឹកក្មេងម្នាក់។
តាមចង្វាក់តន្ដ្រីបែបបុរាណ កុមារទាំងនោះរៀនជំនាញសង្គម ការរៀបចំឫកពាពេលទទួលទានអាហារ និងដំណើរទំនងដោយការដាក់សៀវភៅលើក្បាលជាលំនឹង។
ការហ្វឹកហាត់ផ្សេងៗរួមមាន របៀបរបបនៃការណែនាំខ្លួន និងស្វាគមន៍ ក៏ដូចជា «ការថើប» និងថែមទាំងប្រធានបទអ្វីខ្លះគួរលើកយកមកជជែកក្នុងតុបាយ។ ក្រៅពីអាហារជួបគ្នាកុមារក៏រៀនពីរបៀបរបបធ្វើជាសុភាពបុរស និងសុភាពនារីនាពេលអនាគតផងដែរ។
ម្ដាយកុមារី ដានីញ៉ែល និយាយថា៖ «កុមារគួរតែជាកុមារពិតណាស់ តែយ៉ាងហោចណាស់ពួកគាត់គួរតែមានវិន័យខ្លះ»៕ HR
